ธ้วด อี​ยิบ 19 - ฉบับอักษรลาว

ອິ​ສະ​ລາ​ເອນ ມ່ຽນ ຢຽມ ຊີ​ນາຍ ບົງ

¹ ອິ​ສະ​ລາ​ເອນ ມ່ຽນ ທສວດ ອີ​ຢິ໊ບ ເຕີ່ຍ-ປູງ, ອກະຮ້າ ປວັ໊ງ ປົວ ຫຮລາ ເຫຍັຍ ວົ້ວ ຮນອຍ, ນິ່ນ ບົວ ມີ່ງ ເຖົາ ຊີ​ນາຍ ເຕີ່ຍ-ປູງ-ຮວາງ.

² ນິ່ນ ບົວ ທສວດ ເລ​ຟີ​ດິມ ເຕີ່ຍ ຊຸ້ຍ ມີ່ງ ເຖົາ ຊີ​ນາຍ ເຕີ່ຍ-ປູງ-ຮວາງ, ຫລຽບ ທສຢັ້ງ ຢຽມ ຊີ​ນາຍ ບົງ ດສະຮມຽນ ແໝງ.

³ ໂມ​ເຊ ຕສ່ຽວ ຝາວ ເຖົາ ທິນ-ຮູ່ງ ວົ້ວ. ຕສ໊ຽວ ຢ່າ ຢຽມ ວົ້ວ ບົງ ເຫ່ວ ໂມ​ເຊ. ເມີ່ຍ ອ໋ອຍ ຕສຸ ຮນັ້ງ ນ້າຍ ນໍ ກ໊ອງ ບົ໋ວ ຢາ​ໂຄບ ເຍີຍ ເຕສີ໊ຍ-ຟຸນ, ນ້າຍ ເຕີ໋ຍ ອິ​ສະ​ລາ​ເອນ ມ່ຽນ,

⁴ ‘ເມີ່ຍ ບົວ ກັ້ນ ປວັດ ເຢຍ ຮນັ້ງ ຫາຍ ນໍ ໂຕສ໋ວ ປຸນ ອີ​ຢິ໊ບ ມ່ຽນ. ຢ່າ ຮິ້ວ ຕຸ໊ ເຢຍ ຮນັ້ງ ຫາຍ ນໍ ຕໍ້ ເມີ່ຍ ບົວ ຕ້າຍ ເຖົາ ເຢຍ ນ້າຍ, ເຊ ຮນັ້ງ ຕົ້ມ ຈ໊າງ ເຕສ໊າະ ຕອນ ອັນ ຈ໊ຽນ ດ໊າດ ກູ້ ຫງວ່າຍ ໄດ໋ ນໍ.

⁵ ເຊ ກ໊ອງ ເມີ່ຍ ບົວ ໝວັງ ເຢຍ ເຍີຍ ຫວ່າ ຢ່າ ເອີຍ ຈ໊ຽນ ເຢຍ ເຍີຍ ແຫງ່ງ ຫວ່າ ໂຕສ໋ວ, ເມີ່ຍ ບົວ ຕສ່ຽວ ເປ໋ນ ເຢຍ ຢຽມ ໝ່ານ ຝີງ ບຸດົ໋ງ ກິ໊ນ ຕ້າຍ ເຍີຍ ມ່ຽນ, ເຫວີ່ຍ ຕສຸ ນ້າຍ ລູ່ງ ເດ໊ຍ ຢຽດ ຕສູ໊ງ ເຊ ເຢຍ ເຍີຍ.

⁶ ເມີ່ຍ ບົວ ອ໋ອຍ ໂຕສ໋ວ ຢຽດ ຝີງ ໄຊ ມ່ຽນ ຟູ-ສູ ເຢຍ, ຢ່າ ເປ໋ນ ເຢຍ ເຍີຍ ທສີງ-ເດສ່ງ ຝີງ.’ ນ້າຍ ເຕີ໋ຍ ຫວ່າ ເມີ່ຍ ອ໋ອຍ ຕສຸ ກ໊ອງ ບົ໋ວ ອິ​ສະ​ລາ​ເອນ ມ່ຽນ.”

⁷ ໂມ​ເຊ ຕສ່ຽວ ດສ໋ວນ ມີ່ງ ເຫ່ວ ອິ​ສະ​ລາ​ເອນ ມ່ຽນ ເຍີຍ ຕສວັ໋ງ ມ່ຽນ ໂກ໋ ຕ້າຍ ຕສຸ໊ນ, ຕສຢັງ ຕສ໊ຽວ ກ໊ອງ ບົ໋ວ ນິ່ນ ເຍີຍ ຢຽດ ຕສູ໊ງ ຫວ່າ ບົ໋ວ ນິ່ນ ບົວ.

⁸ ຕສວັ໋ງ ມ່ຽນ ລົ່ມ ດສ້ອຍ ເຕົາ, “ ຕສ໊ຽວ ກ໊ອງ ເຍີຍ ຫວ່າ ເຢຍ ບົວ ຢ່າ ອ໋ອຍ ເອີຍ ຈ໊ຽນ ໂຕສ໋ວ ເດສ່ງ.” ໂມ​ເຊ ແອ໋ງ ໂຕ່ວ ແປະ ຝີງ ເຍີຍ ຫວ່າ ບົ໋ວ ຕສ໊ຽວ

⁹ ຕສ໊ຽວ ກ໊ອງ ບົ໋ວ ໂມ​ເຊ, “ເຢຍ ອ໋ອຍ ຢຽມ ບ໋ວນ ໂຮ໌ ເຍີຍ ຕ້າຍ ລໍ໌ ເມີ່ຍ, ເຫວີ່ຍ ປຸນ ແປະ ຝີງ ໝວັງ ຕຸ໊ ໄຮ໌ ເຢຍ ເຖສົາ ເມີ່ຍ ກ໊ອງ ຫວ່າ ຕສ່ຽວ ຢຽດ ລິ໌ວ ສຽນ ເມີ່ຍ.” ໂມ​ເຊ ແອ໋ງ ໂຕ່ວ ແປະ ຝີງ ເຍີຍ ຫວ່າ ບົ໋ວ ຕສ໊ຽວ.

¹⁰ ຕສ໊ຽວ ກ໊ອງ ບົ໋ວ ໂມ​ເຊ, “ເມີ່ຍ ອ໋ອຍ ຕສຸ ບົ໋ວ ແປະ ຝີງ, ອີ້ ຮນອຍ ເຖສົາ ອຈັງ ຮນອຍ ອ໋ອຍ ຕສຸ ປຸນ ກັ້ນ ທສີງ-ເດສ່ງ, ຢ່າ ໂດສ໋ ເດສ່ງ ລຸຍ-ໂຫວ.

¹¹ ເຖົາ ຕະຟາມ ຮນອຍ ວົ້ວ ຮນອຍ, ອ໋ອຍ ຕສຸ ຫລິ່ວ ເລີ໌ຍ ຕສຢັ໋ງ, ເຫວີ່ຍ ຕສຸ ຕະຟາມ ຮນອຍ ຕສ໊ຽວ ອ໋ອຍ ເອຈ່ຍ ຊີ​ນາຍ ບົງ ປຸນ ຕສວັ໋ງ ແປະ ຝີງ ປວັດ.

¹² ອ໋ອຍ ຕສຸ ຕີ່ງ ຕສຢັ໋ງ ບົງ-ເອກ໋ນ ຮວີງ ກ໋ອມ ບົງ ແອ໋ງ ບົ໋ວ ມ່ຽນ, ‘ອ໋ອຍ ຕສຸ ໄຝ ຟິມ, ໄມ້ ຕູ໋ງ ຝາວ ບົງ ຢ່າ ໄມ້ ຕູ໋ງ ຄວັດ ຕສຸ ບົງ-ຈົ໊ວະ. ຫາຍ ເຕົ້າ ຄວັດ ຕສຸ ຕສູ໊ງ ອ໋ອຍ ຕສຸ ໄຕ໋ ໄຕ່.

¹³ ຢ່າ ໄມ້ ຕູ໋ງ ຫລົ່ງ ປົ໌ວ ມົວະ ນິ່ນ. ອ໋ອຍ ຕສຸ ເຕສ໊າະ ຫລະເປຢີ໊ຍ ຕສົງ ໄຕ່ ໄຟ ຫລົ່ງ ຈວັງ-ຕສິ໋ນ ປ໊ວນ ໄຕ່. ໄມ້ ກຸ໊ນ ມ່ຽນ ໄຟ ແຊງ-ຄູ້, ໄມ້ ຕູ໋ງ ລ່ຽວ ນິ່ນ ເຍີຍ ແໝ່ງ.’ ເຖົາ ໄຮ໌ ປຢົ໊ມ ດສັດ ເຍີຍ ເຖຈຍ ດ໊າວ ເຍີຍ ຕສຢັ້ງ ໂຫ່ ຖສີງ ຕ້າຍ ໄຮ່ ມີ່ງ ນິດ ຟັດ ບົງ.”

¹⁴ ໂມ​ເຊ ຢຽມ ບົງ ເອຈ່ຍ ຕ້າຍ ບົ໋ວ ແປະ ຝີງ ປຸນ ກັ້ນ ທສີງ-ເດສ່ງ, ໂດສ໋ ເດສ່ງ ລຸຍ-ໂຫວ.

¹⁵ ນິ່ນ ແອ໋ງ ບົ໋ວ ນິ່ນ ບົວ, “ເຖົາ ຕະຟາມ ຮນອຍ ວົ້ວ ຮນອຍ ອ໋ອຍ ຕສຸ ຫລິ່ວ ເລີ໌ຍ ຕສຢັ໋ງ. ຢ່າ ອ໋ອຍ ຕສຸ ເກ່, ໄມ້ ຕູ໋ງ ເຖສົາ ມເຊັຍ ຕອນ ເປວີ໋ຍ.”

¹⁶ ຕະຟາມ ຮນອຍ ວົ້ວ ດອມ ປ໌ອງ ບະຫລີ່ງ, ບະອົງ ບຸຍ. ມ່າຍ ບ໋ວນ ໂຮ໌ ເຍີຍ ຕ້າຍ ອົມ ຈ໊ຽນ ບົງ. ແອ໋ງ ມ່າຍ ດສັດ ເຍີຍ ເຖຈຍ ບຸຍ. ຢຽມ ທສຢັ້ງ ເຍີຍ ມ່ຽນ ຢຽດ ຕສູ໊ງ ກ້ຳ ເດສ໋ຍ ໄຫ່, ຊິນ ຕສິ໋ນ ເດສ່ງ.

¹⁷ ໂມ​ເຊ ຕໍ້ ແປະ ຝີງ ທສວດ ດົ໊ບ-ລິ່ວ ທສຢັ້ງ ມີ່ງ ປວັ້ງ ທິນ-ຮູ່ງ. ນິ່ນ ບົວ ຕສ່ຽວ ມີ່ງ ໂຊ້ວ ຈ໊ຽນ ບົງ-ຈົ໊ວະ.

¹⁸ ໂຕ໌ວ-ສຽວ ອົມ ຈ໊ຽນ ຊີ​ນາຍ ບົງ ເຫວີ່ຍ ຕສຸ ຕສ໊ຽວ ຢຽມ ໂຕ໌ວ ກະຍົ໌ວ ເອຈ່ຍ ບົງ. ໂຕ໌ວ-ສຽວ ທສຸດໆ ເຍີຍ ຝາວ ຮນັ້ງ ປົ໊ວ ຕົ້ມ ໂຕ໌ວ-ເດສົ່າ ນໍ. ຕສຢັ້ງ ນອມ ບົງ ຢ່າ ຕົ໌ງ ຕຸ໊ ເສີຍ ໄຫ່.

¹⁹ ດສັດ ເຍີຍ ເຖຈຍ ຢ່າ ກຸ໊ນ ໂຕສ໋ວ ກຸ໊ນ ບຸຍ. ໂມ​ເຊ ເຖສົາ ທິນ-ຮູ່ງ ກ໊ອງ ຫວ່າ, ທິນ-ຮູ່ງ ຢ່າ ເຕົາ ໂມ​ເຊ ຮນັ້ງ ບະອົງ ບຸຍ ນໍ.

²⁰ ຕສ໊ຽວ ເອຈ່ຍ ເຖົາ ຊີ​ນາຍ ບົງ-ນີ້ງ ແອ໋ງ ເຫ່ວ ໂມ​ເຊ ຝາວ ວົ້ວ ບົງ-ນີ້ງ. ໂມ​ເຊ ຕສ່ຽວ ຝາວ ອ໊ະ.

²¹ ຕສ໊ຽວ ກ໊ອງ ບົ໋ວ ນິ່ນ, “ເມີ່ຍ ອ໋ອຍ ຕສຸ ເອຈ່ຍ ມີ່ງ ຫັດ ແປະ ຝີງ ໄມ້ ຕູ໋ງ ເຈ໋ຍ ດ່າງ ບົງ-ເອກ໋ນ ຕ້າຍ ໝັ່ງ ເຢຍ. ເດສ໋ຍ ໄຮ່ ມ່າຍ ມ່ຽນ ທສ້ຳ ເຍີຍ ຕສຸ ໄຕ່.

²² ລ່ຽມ ຕ້າຍ ຟັດ ເຢຍ, ຕສ໊ຽວ, ວົ້ວ ເຕີ໋ຍ ໄຊ ມ່ຽນ ອ໋ອຍ ຕສຸ ສາ ກັ້ນ ທສີງ-ເດສ່ງ. ໄມ້ ເຕສີຍ ແອ໊ະ, ເຢຍ ອ໋ອຍ ຕີ່ງ ນິ່ນ ບົວ ເຍີຍ ຕສຸ໌ຍ.”

²³ ໂມ​ເຊ ກ໊ອງ ບົ໋ວ ຕສ໊ຽວ, “ອິ​ສະ​ລາ​ເອນ ມ່ຽນ ໄມ້ ໄຮ່ ຝາວ ຊີ​ນາຍ ບົງ ເຫວີ່ຍ ຕສຸ ເມີ່ຍ ກັ້ນ ຫັດ ເຢຍ ບົວ, ‘ອ໋ອຍ ຕສຸ ຕີ່ງ ຕສຢັ໋ງ ບົງ-ເອກ໋ນ ກ໋ອມ ນ້າຍ ນອມ ບົງ, ຝຸນ ນ້າຍ ນອມ ບົງ ໂຕສ໋ວ ທສີງ-ເດສ່ງ ບົງ.’”

²⁴ ຕສ໊ຽວ ກ໊ອງ ບົ໋ວ ໂມ​ເຊ, “ເອຈ່ຍ ມີ່ງ ຕໍ້ ອາ​ລົນ ເຖສົາ ເມີ່ຍ ຝາວ ນ້າຍ ຕ້າຍ. ມປ່າ ໄມ້ ຕູ໋ງ ປຸນ ໄຊ ມ່ຽນ ເຖສົາ ແປະ ຝີງ ເຈ໋ຍ ບົງ-ເອກ໋ນ ຝາວ ເຢຍ ນ້າຍ. ໄມ້ ເຕສີຍ ແອ໊ະ, ເຢຍ ອ໋ອຍ ຕີ່ງ ນິ່ນ ບົວ ເຍີຍ ຕສຸ໌ຍ.”

²⁵ ໂມ​ເຊ ຕສ່ຽວ ເອຈ່ຍ ມີ່ງ ຕສຢັງ ນ້າຍ ເຕີ໋ຍ ຫວ່າ ບົ໋ວ ແປະ ຝີງ.