โค​โล​สี 4 - ฉบับอักษรลาว

¹ ເມີ່ຍ ບົວ ໂຕສ໋ວ ຕສ໊ຽວ ເຍີຍ ມ່ຽນ ອ້າ! ເມີ່ຍ ບົວ ອ໋ອຍ ຕສຸ ໂຕສ໋ວ ແປ້ງ ຟິມ ຢ່າ ໂຕສ໋ວ ໂຮຍ້ວ ຢ້ວນ ປຸນ ເມີ່ຍ ບົວ ເຍີຍ ໂນ່ວ, ເຫວີ່ຍ ຕສຸ ເມີ່ຍ ບົວ ຮິ້ວ ຕຸ໊ ເມີ່ຍ ບົວ ມ່າຍ ເຕົ້າ ຕສ໊ຽວ ຢຽມ ວົ້ວ ທິນ-ຕ້ອງ.

ເປົາ​ໂລ ຂວິນ ມ່ຽນ

² ເມີ່ຍ ບົວ ອ໋ອຍ ຕສຸ ຕສັ່ນໆ ຈ້ຽນ ເຕົ໋າ ເກົ໋າ, ກີງ ຈ໊ຽນ ໂຮຍ້ວ ຢ່າ ແລ໌ງ ຕສີ້ງ ທິນ-ຮູ່ງ.

³ ຢ່າ ອ໋ອຍ ຕສຸ ເຖງ ເຢຍ ບົວ ເຕົ໋າ ເກົ໋າ, ໂທ້ ທິນ-ຮູ່ງ ປຸນ ເຢຍ ບົວ ມ່າຍ ຖຈັງ ປຸນ ເຢຍ ບົວ ຕສຸ້ນ ກ໊ອງ ກີ​ຕູ່ ບຢ໋າງ ຢ້າງ ເຍີຍ ສີ່. ເຢຍ ອີ້ ຕສັ່ນ ຫລາຍ ໂຕສ໋ວ ນ້າຍ ຫຍູ່ງ ກົງ ຕສຸ ຫວວນ ຈ໊ຽນ ໂລ່.

⁴ ອ໋ອຍ ຕສຸ ໂທ້ ທິນ-ຮູ່ງ ເຖງ ເຢຍ ໄຮ່ ກ໊ອງ ເມ່ງ ນ້າຍ ເຕີ໋ຍ ບຢ໋າງ ຢ້າງ ເຍີຍ ສີ່ ຮນັ້ງ ເຢຍ ຫອບ ຕສຸ ກ໊ອງ ນໍ.

⁵ ອ໋ອຍ ຕສຸ ຫລົ່ງ ທສົງ-ເມ່ງ ເຖສົາ ໄມ້ ສຽນ ເຍີຍ ມ່ຽນ ຈິວ ທົງ. ຢ່າ ອ໋ອຍ ຕສຸ ໄມ້ ຕູ໋ງ ກວັ່ງ ຕສຢັ້ງ ໂຫ່.

⁶ ເມີ່ຍ ບົວ ອ໋ອຍ ຕສຸ ກ໊ອງ ຫວ່າ ຄູ່ ໝວັງ ຢູ໌ງ ມ່ຽນ, ຮນັ້ງ ອັນ ເດສົ໊າ ປຸນ ກະນ້າຍ ມ່າຍ ເໝວີຍ ນໍ, ເຫວີ່ຍ ປຸນ ເມີ່ຍ ບົວ ຮິ້ວ ຕຸ໊ ຮນັ້ງ ຫາຍ ນໍ ເຕົາ ຕຸ໊ ຫອບ ເຕົ້າໆ ມ່ຽນ ໜ່າຍ ເຍີຍ ຫວ່າ.

ເຊດ ເມວີ໌ຍ ຫວ່າ

⁷ ບົວ ຮນ້ຳ ໄຫ່ ເຍີຍ ກໍ໋-ໂຢ໌ວ, ທີ​ຄິ​ກັດ, ອ໋ອຍ ກ໊ອງ ເດສ່ງ ເຢຍ ເຍີຍ ຢຽດ ຕສູ໊ງ ສີ່ ບົ໋ວ ເມີ່ຍ ບົວ. ນິ່ນ ເຊ ຕສຽບ ຕສົ໊ວະ ຟູ-ສູ ເຍີຍ ມ່ຽນ ຢ່າ ເຖສົາ ເຢຍ ຈວັ່ງ ໂຕສ໋ວ ຕສ໊ຽວ ເຍີຍ ໂປວ.

⁸ ເຊ ເຫວີ່ຍ ນ້າຍ ເຢຍ ພ້າຍ ນິ່ນ ມີ່ງ ເມີ່ຍ ບົວ ໜ່າຍ, ອ໋ອຍ ປຸນ ນິ່ນ ບົ໋ວ ເມີ່ຍ ບົວ, ເຢຍ ບົວ ຢຽມ ນ້າຍ ຮນັ້ງ ຫາຍ ນໍ ຢ່າ ປຸນ ນິ່ນ ອອນ ເມີ່ຍ ບົວ ເຍີຍ ໂຮຍ້ວ.

⁹ ແອ໋ງ ມ່າຍ ເຕົ້າ ຮນ້ຳ ໄຫ່, ຕສຽບ ຕສົ໊ວະ ເຍີຍ ກໍ໋-ໂຢ໌ວ, ເຊ ເມີ່ຍ ບົວ ກັ້ນ ເຍີຍ ມ່ຽນ, ໂອ​ເນ​ສິ​ມັດ, ເຖສົາ ຈ໊ຽນ ນິ່ນ ມີ່ງ. ນິ່ນ ບົວ ອີ ລ່ານ ອ໋ອຍ ເຕສ໊າະ ເຢຍ ບົວ ຢຽມ ນ້າຍ ເຍີຍ ສີ່ ກ໊ອງ ເດສ່ງ ບົ໋ວ ເມີ່ຍ ບົວ.

¹⁰ ເຖສົາ ເຢຍ ຕສຸ ຫວວນ ຈ໊ຽນ ໂລ່ ວົ້ວ ເຕົ້າ ອາ​ລິດ​ທາ​ຄັດ ຈັ໋ງ ເຖົາ ເມີ່ຍ ບົວ. ບາ​ນາ​ບັດ ເຍີຍ ແປ໊ະ-ມົ໌ວ ຕອນ, ມາ​ໂຄ, ຢ່າ ຈັ໋ງ ເຖົາ ເມີ່ຍ ບົວ. ເຢຍ ຢ່າ ບົ໋ວ ເຈ໋ຍ ເມີ່ຍ ບົວ, ເຊ ກ໊ອງ ມາ​ໂຄ ເຖົາ ເມີ່ຍ ບົວ ໜ່າຍ, ອ໋ອຍ ຕສຸ ຕສິ໊ບ ຫລົງ ນິ່ນ ໂອ່.

¹¹ ເຢ​ຊູ, ແອ໋ງ ມ່າຍ ນອມ ບົ໋ວ ເຫ່ວ ຢຸ​ສະ​ທັດ ວົ້ວ ເຕົ້າ, ຢ່າ ຈັ໋ງ ເຖົາ ເມີ່ຍ ບົວ. ຂູງ ມ່າຍ ນ້າຍ ເຕີ໋ຍ ປົວ ລ່ານ ສຽນ ເຢ​ຊູ ເຍີຍ ຢິວ​ໄທ ມ່ຽນ ເຖສົາ ເຢຍ ຈວັ່ງ ທິນ-ຮູ່ງ ເຍີຍ ກົ໊ວະ ເຍີຍ ກົງ ໂຕສ໋ວ. ນິ່ນ ບົວ ຢ່າ ອອນ ເຢຍ ເຍີຍ ໂຮຍ້ວ ທສ້ຳ ໄຫ່.

¹² ເອ​ປາ​ຟາ ໂຕສ໋ວ ເມີ່ຍ ບົວ ກັ້ນ ເຍີຍ ມ່ຽນ ຢ່າ ໂຕສ໋ວ ກີ​ຕູ່ ເຢ​ຊູ ເຍີຍ ໂປວ. ນິ່ນ ຢ່າ ຈັ໋ງ ເຖົາ ເມີ່ຍ ບົວ. ເອ​ປາ​ຟາ ຕສັ່ນໆ ເຫວີ່ຍ ເມີ່ຍ ບົວ ເອຈ່ຍ ທຈະ ເຕົ໋າ ເກົ໋າ ໂທ້ ທິນ-ຮູ່ງ ປຸນ ເມີ່ຍ ບົວ ສຽນ ຕຸ໊ ວ້ວນ, ເອີຍ ສຽນ ເຍີຍ ເຈົ໊າ ເປ໋ນ ຕົ້ມ ມ່ຽນ, ໄຮ່ ກັນ ເດສ່ງ ທິນ-ຮູ່ງ ຕຸ້ນ ຢຸ້ນ ເຍີຍ ຕສະເອີ໋ຍ.

¹³ ເຢຍ ເຖງ ເອ​ປາ​ຟາ ໂຕສ໋ວ ຕສອງ-ເຕສ໋ງ ນິ່ນ ເຫວີ່ຍ ເມີ່ຍ ບົວ ຢ່າ ເຫວີ່ຍ ເລົາ​ດີ​ເຊຍ ເຖສົາ ຮີ​ເອ​ລາ​ບຸ​ລີ ຕສີ້ງ ເຍີຍ ມ່ຽນ ໂຕສ໋ວ ກົງ ໂຄ້ວ.

¹⁴ ບົວ ຮນ້ຳ ໄຫ່ ເຍີຍ ເດຍ-ໄຊ, ລູ​ກາ, ເຖສົາ ເດ​ມາດ ຢ່າ ຈັ໋ງ ເຖົາ ເມີ່ຍ ບົວ.

¹⁵ ໂທ້ ບົ໋ວ ເລົາ​ດີ​ເຊຍ ຕສີ້ງ ເຍີຍ ກໍ໋-ໂຢ໌ວ ເຖສົາ ນິມ​ຟາ ແອ໋ງ ເຖສົາ ຢຽມ ນິ່ນ ເຍີຍ ເປຢົ໊າ ເຍີຍ ຈິວ-ປາງ, ເຢຍ ຈັ໋ງ ເຖົາ ນິ່ນ ບົວ.

¹⁶ ມ່ຽນ ໂຕະ ນ້າຍ ເຕສີ໊ຍ ຝຽນ ປຸນ ເມີ່ຍ ບົວ ໝວັງ ລິ໌ວ, ອ໋ອຍ ຕສຸ ຈຸ໋ຍ ມີ່ງ ປຸນ ເລົາ​ດີ​ເຊຍ ຕສີ້ງ ເຍີຍ ຈິວ-ປາງ ມ່ຽນ ໂຕະ. ເມີ່ຍ ບົວ ຢ່າ ອ໋ອຍ ຕສຸ ໂຕະ ເລົາ​ດີ​ເຊຍ ຈິວ-ປາງ ຈຸ໋ຍ ຕ້າຍ ເຍີຍ ຝຽນ.

¹⁷ ຢ່າ ອ໋ອຍ ຕສຸ ບົ໋ວ ອານ​ຄິບ​ປັດ, “ອ໋ອຍ ຕສຸ ຈ໊ຽນໆ ໂຕສ໋ວ ເຖົາ ຕສຢັ໋ງ ຕສ໊ຽວ ພ້າຍ ເມີ່ຍ ໂຕສ໋ວ ເຍີຍ ກົງ.”

¹⁸ ເຢຍ ກັ້ນ ນັ້ນ ປັ໊ດ ເຟ້ຍ ນ້າຍ ເຕີ໋ຍ ຫວ່າ, “ເຢຍ, ເປົາ​ໂລ, ຈັ໋ງ ເຖົາ ເມີ່ຍ ບົວ. ໂທ້ ເມີ່ຍ ບົວ ຈັ໋ງ ຈ໊ຽນ ເຢຍ ຕສຸ ຫວວນ ຈ໊ຽນ ນ້າຍ ໂລ່. “ໂທ້ ທິນ-ຮູ່ງ ເຖສີຍ ເອນ ປຸນ ເມີ່ຍ ບົວ.”