2 โค​ลิน​โท 6 - ฉบับอักษรลาว

¹ ເຢຍ ບົວ ເຖສົາ ທິນ-ຮູ່ງ ຈວັ່ງ ກົງ ໂຕສ໋ວ ຕສ່ຽວ ຂວິນ ເມີ່ຍ ບົວ. ເມີ່ຍ ບົວ ຕສິ໊ບ ລິ໌ວ ທິນ-ຮູ່ງ ເຍີຍ ເອນ, ໄມ້ ຕູ໋ງ ປູ໋ງ ດ໊ອດ.

² ເຫວີ່ຍ ຕສຸ ທິນ-ຮູ່ງ ກ໊ອງ, “ຢຽມ ເຢຍ ເຖສີຍ ເອນ ເຍີຍ ຕສຢັ້ງ ໂຫ່, ເຢຍ ໄຮ໌ ເມີ່ຍ ບົວ ເຍີຍ, ຢຽມ ຕຸ໊ ໂອຈ໋ວ ເຍີຍ ຮນອຍ, ເຢຍ ຢ່າ ເຖງ ເມີ່ຍ ບົວ ໝີ່ ອ໊ະ.” ໝວັງ ມ່າະ! ອີ້ ຕສັ່ນ ເຊ ທິນ-ຮູ່ງ ເຖສີຍ ເອນ ເຍີຍ ຕສຢັ້ງ ໂຫ່. ອີ້ ຮນອຍ ເຊ ຕຸ໊ ໂອຈ໋ວ ເຍີຍ ຮນອຍ.

ເປົາ​ໂລ ເຍີຍ ໜ່ານ ຕສີ້ງ

³ ເຢຍ ບົວ ໄມ້ ອ໋ອຍ ຫາຍ ເຕົ້າ ຕ້ານ ເຢຍ ບົວ ໂຕສ໋ວ ເຍີຍ ກົງ, ເຢຍ ບົວ ຕສ່ຽວ ໄມ້ ອ໋ອຍ ໂຕສ໋ວ ຫາຍ ຫຍູ່ງ ປຸນ ມ່ຽນ ເອກ້ມ.

⁴ ຕ໋າວ ດສ໋ວນ ເຢຍ ບົວ ໂຕສ໋ວ ຫຍູ່ງໆ ເຫວີ່ຍ ປຸນ ມ່ຽນ ເຕສັ໊ຍ ຕຸ໊ ເຢຍ ບົວ ໂຕສ໋ວ ທິນ-ຮູ່ງ ເຍີຍ ໂປວ. ເຢຍ ບົວ ຕສ່ຽວ ຫລົ່ງ ໜ່ອຍ ສ່ຽວ ຫຍູ່ງໆ ຂວນ ນ່ານ, ໜ່ານ ຕສີ້ງ ເຖສົາ ຕົ້ມ ເຮີ້ຍ ສີ່.

⁵ ເຢຍ ບົວ ສ່ຽວ ມ່ຽນ ເບ໊າະ, ເຕ໊ຍ ຫວວນ ໂລ່, ຕສຸ ມ່ຽນ ເຖສວ ຫລຸ່ນ, ຕສຸ ໂຕສ໋ວ ກົງ ໂຄ້ວ, ຕສຸ ກວັ່ງ ມອຈ້ອມ ຈ໋າ ຢ່າ ເຕ໊ຍ ຫງໍ່.

⁶ ເຢຍ ບົວ ໂຕສ໋ວ ທສີງ-ເດສ່ງ ເຍີຍ, ມ່າຍ ວ່ວນ ຕສາງ, ມ່າຍ ໜ່ອຍ ຍ໌ຽນ ຕຸ໊, ໂຕສ໋ວ ຫລົງ ປຸນ ມ່ຽນ, ມ່າຍ ສີງ ລີ່ງ ຢ່າ ຕສະເກ້ງ ຮນ້ຳ ມ່ຽນ ຕສ່ຽວ ປຸນ ທສີງ ເຢຍ ບົວ ໂຕສ໋ວ ທິນ-ຮູ່ງ ເຍີຍ ໂປວ.

⁷ ເຢຍ ບົວ ຂູງ ກ໊ອງ ຕສຽນ ເລີ໌ຍ ຮນັ້ງ ຢ່າ ມ່າຍ ທິນ-ຮູ່ງ ເຍີຍ ທຈະ. ມ່າຍ ຄູ້ ສີ່ ໂຕສ໋ວ ເບ໊າະ ຈ໋າ ເຍີຍ ຫວົວະ ກິ່ນ ຫລົ່ງ ເບ໊າະ, ຫລົ່ງ ບູ້ງ.

⁸ ເຢຍ ບົວ ຕຸ໊ ມ່ຽນ ທ່າຍ ຢ່າ ຕສຸ ມ່ຽນ ໝັ່ງ ເຜຍ, ຕສຸ ມ່ຽນ ຕ້ານ ຢ່າ ຕຸ໊ ມ່ຽນ ເທສງ, ຕສຸ ມ່ຽນ ກ໊ອງ ເຢຍ ບົວ ກ໊ອງ-ແປະ ດົ໊ວ ມ່ຽນ, ມປ່າ ເຢຍ ບົວ ຂູງ ກ໊ອງ ຕສຽນ ຮນັ້ງ.

⁹ ເຢຍ ບົວ ຕສຸ ມ່ຽນ ໂຕສ໋ວ ຕ້າຍ ຮນັ້ງ ໄມ້ ຮິ້ວ ເຢຍ ບົວ ນໍ, ມປ່າ ນິ່ນ ບົວ ຕສະເກ້ງ ຮິ້ວ ຕຸ໊ ເຢຍ ບົວ ເຍີຍ. ເຢຍ ບົວ ເຊ ຮນັ້ງ ໄຕ່ ໝີ່ ອ໊ະ ນໍ, ມປ່າ ເມີ່ຍ ບົວ ປວັດ ເຢຍ ບົວ ຖສໍ່ ມ່າຍ ແໝ່ງ ຕສຢັ້ງ ເຍີຍ. ຕສຸ ມ່ຽນ ເບ໊າະ ມປ່າ ໄມ້ ເຖົາ ໄຕ່,

¹⁰ ຕສຸ ມ່ຽນ ໂຕສ໋ວ ປຸນ ເຢຍ ບົວ ເດສົ້າ, ມປ່າ ເຢຍ ບົວ ຕສັ່ນໆ ອຈຽນ-ໂຢ້ວ ເຍີຍ. ເຢຍ ບົວ ຮນັ້ງ ຈົ່ມ ເຍີຍ ມປ່າ ປຸນ ມ່ຽນ ທສ້ຳ ປຸ໊ດ ຕສ້ອຍ. ເຢຍ ບົວ ຮນັ້ງ ໄມ້ ມ່າຍ ຫາຍ ຫຍູ່ງ ມປ່າ ຫຍູ່ງໆ ມ່າຍ ດສ້ອຍ.

¹¹ ທສຽນ ຮນ້ຳ ເຍີຍ ໂຄ​ລິນ​ໂທ ກໍ໋-ໂຢ໌ວ ອ້າ! ເຢຍ ບົວ ເຖສົາ ເມີ່ຍ ບົວ ກ໊ອງ ຕສະ, ໄມ້ ປີ໋ງ. ເຢຍ ບົວ ແມະ ອກອຍ ບະດສິວ ປຸນ ເມີ່ຍ ບົວ ໝັ່ງ.

¹² ເຊ ກ໊ອງ ມ່າຍ ຫາຍ ຕິ່ວ ແອກ໊ະ ຈ໊ຽນ ເຊ ໄມ້ ເຕສີ໌ຍ ຢຽມ ເຢຍ ບົວ. ເຊ ຢຽມ ເມີ່ຍ ບົວ ກັ້ນ ເຍີຍ ໂຮຍ້ວ.

¹³ ເຢຍ ເຖສົາ ເມີ່ຍ ບົວ ກ໊ອງ ຮນັ້ງ ເຕຍ ເຖສົາ ນິ່ນ ເຍີຍ ຝຸຈ໊ວຍ ກ໊ອງ ນໍ. ໂທ້ ເມີ່ຍ ບົວ ແມະ ອກອຍ ບະດສິວ ວິ່ນ ເຢຍ ບົວ.

ສຽນ ເຍີຍ ເຖສົາ ໄມ້ ສຽນ ເຍີຍ ໄມ້ ໄຮ່ ຈວັ່ງ

¹⁴ ສຽນ ເຍີຍ ມ່ຽນ ເຖສົາ ໄມ້ ສຽນ ເຍີຍ ມ່ຽນ ໄມ້ ຕູ໋ງ ຈິວ ຕ່ອຍ. ຄູ້ ສີ່ ເຖສົາ ຫວ່າຍ ສີ່ ຮນັ້ງ ຫາຍ ນໍ ໄຮ່ ຈິວ ທົງ? ອຈັງ ເຖສົາ ຫຮມວັງ ຮນັ້ງ ຫາຍ ນໍ ໄຮ່ ຈວັ່ງ ຢຽມ?

¹⁵ ກີ​ຕູ່ ເຖສົາ ເບ​ລີ​ອັນ ຮນັ້ງ ຫາຍ ນໍ ໄຮ່ ຕະກ້ອຍ? ສຽນ ເຍີຍ ມ່ຽນ ເຖສົາ ໄມ້ ສຽນ ເຍີຍ ມ່ຽນ ມ່າຍ ຫາຍ ຫຍູ່ງ ຈວັ່ງ ຈ໊ຽນ ເຍີຍ ປ່ວນ?

¹⁶ ທິນ-ຮູ່ງ ເຍີຍ ສີງ ຕິ່ນ ເຖສົາ ໝິ່ວ-ຝັງ ຮນັ້ງ ຫາຍ ນໍ ໄຮ່ ຕ໋ອຍ-ຕົ້ງ? ເຫວີ່ຍ ຕສຸ ເຢຍ ບົວ ໂຕສ໋ວ ຕສຢັ້ງ ຈ໊ຽນ ເຍີຍ ທິນ-ຮູ່ງ ເຍີຍ ສີງ ຕິ່ນ. ຮນັ້ງ ທິນ-ຮູ່ງ ກ໊ອງ ນໍ, “ເຢຍ ອ໋ອຍ ເຖສົາ ເຢຍ ເຍີຍ ແປະ ຝີງ ຢຽມ, ອ໋ອຍ ຢຽມ ນິ່ນ ບົວ ບຸດົ໋ງ. ເຢຍ ຕສ່ຽວ ໂຕສ໋ວ ນິ່ນ ບົວ ເຍີຍ ທິນ-ຮູ່ງ, ນິ່ນ ບົວ ຢ່າ ໂຕສ໋ວ ເຢຍ ເຍີຍ ແປະ ຝີງ.”

¹⁷ ເຫວີ່ຍ ນ້າຍ ຕສ໊ຽວ ກ໊ອງ, “ເມີ່ຍ ບົວ ຢຽມ ນິ່ນ ບົວ ບຸດົ໋ງ, ອ໋ອຍ ຕສຸ ທສວດ ຕ້າຍ. ອ໋ອຍ ຕສຸ ເຖສົາ ນິ່ນ ບົວ ປຸນ ອກອຍ. ໄມ້ ຕູ໋ງ ມົວະ ມ່າຍ ຫວຸຍ ເຍີຍ ກະນ້າຍ, ເຢຍ ຕສ່ຽວ ຕສິ໊ບ ເມີ່ຍ ບົວ ອ໊ະ.”

¹⁸ “ເຢຍ ອ໋ອຍ ໂຕສ໋ວ ເມີ່ຍ ບົວ ເຍີຍ ເຕຍ, ເມີ່ຍ ບົວ ຕສ່ຽວ ເປ໋ນ ເຢຍ ເຍີຍ ນ່າມ ໂຍ໌ວ. ເນິ່ນ ເຈ໋ຍ ເຍີຍ ຕສ໊ຽວ ຮນັ້ງ ນ້າຍ ນໍ ກ໊ອງ.”