1 Bide 5 - ฉบับอักษรลาว

ຂວິນ ຈິວ-ປາງ ເຍີຍ ມ່ຽນ ໂກ໋ ເຖສົາ ມ່ຽນ ຫລຸນ ມ່ຽນ

¹ ເຢຍ ຂວິນ ຢຽມ ເມີ່ຍ ບົວ ໜ່າຍ ຈິວ-ປາງ ເຍີຍ ຕສວັ໋ງ ມ່ຽນ ໂກ໋. ເຢຍ ຢ່າ ໂຕສ໋ວ ມ່ຽນ ໂກ໋, ຢ່າ ໂຕສ໋ວ ກີ​ຕູ່ ສ່ຽວ ໂຄ້ວ ເຍີຍ ຕສອງ-ເຕສ໋ງ. ເຢຍ ຢ່າ ອ໋ອຍ ຈວັ່ງ ຈ໊ຽນ ຕສິ໊ບ ອກະຮ້າ ອ໋ອຍ ຫິ່ນ ທສວດ ເຍີຍ ອຈັງ-ຫລ່າງ.

² ເຢຍ ຂວິນ ເມີ່ຍ ບົວ ໂກ໋ວ ຫລົງ ທິນ-ຮູ່ງ ປຸນ ເມີ່ຍ ບົວ ໂກ໋ວ ວົ້ວ ກວັ້ນ ມ່ຽນ ຮນັ້ງ ໂກ໋ວ ປະກີ ຢູ້ງ ມ່ຽນ ໂກ໋ວ ນິ່ນ ບົວ ເຍີຍ ປະກີ ຢູ້ງ ນໍ. ອ໋ອຍ ຕສຸ ປວັ໊ງ ໂຮຍ້ວ ໂກ໋ວ, ຮນັ້ງ ທິນ-ຮູ່ງ ອ໋ອຍ ເມີ່ຍ ບົວ ໂຕສ໋ວ ນໍ, ໄມ້ ເຕສີ໌ຍ ຮນັ້ງ ຕສຸ ອ໊າບ ຈ໊ຽນ ໂຕສ໋ວ. ຢ່າ ໄມ້ ຕູ໋ງ ໂຕສ໋ວ ເຫວີ່ຍ ໂຕ້ວ ຕຸ໊ ຍ່ານ. ອ໋ອຍ ຕສຸ ປວັ໊ງ ໂຮຍ້ວ ໂຕສ໋ວ.

³ ຢ່າ ໄມ້ ຕູ໋ງ ກຸ໊ນ ປະຫລະ ເຮນ້ຍ ທິນ-ຮູ່ງ ປຸນ ເມີ່ຍ ບົວ ໂກ໋ວ ວົ້ວ ເຕີ໋ຍ. ອ໋ອຍ ຕສຸ ໂຕສ໋ວ ຫລົງ ເຍີຍ ຫຍູ່ງ ເຕສີ໊ຍ ປຸນ ນິ່ນ ບົວ ຕສວດ.

⁴ ເຖົາ ກີ​ຕູ່, ຕົ້ງ ໂກ໋ວ ປະກີ ຢູ້ງ ເຍີຍ ຕົ້ມ ຕສ໊ຽວ, ຕ້າຍ ວົ້ວ ຕສັ່ນ, ເມີ່ຍ ບົວ ຕສ່ຽວ ຕຸ໊ ໄມ້ ໄຮ່ ໝິດ ເຍີຍ ອຈັງ-ຫລ່າງ ນີ້ງ.

⁵ ເມີ່ຍ ບົວ ຫລຸນ ວົ້ວ ເຕີ໋ຍ ມຈັ່ງ ຕອນ ຟີ່ ຮນັ້ງ ເຍີຍ ອ໋ອຍ ຕສຸ ບົວະ ໂກ໋ ວົ້ວ ເຕີ໋ຍ ກຸ໊ນ. ອ໋ອຍ ຕສຸ ຫຍ່ຽມ ກັ້ນ ໂຕສ໋ວ ໄຝ, ລ່ານ ຟູ-ສູ ລ່ານ, ເຫວີ່ຍ ຕສຸ ກີງ-ໂຊວ ກ໊ອງ, “ທິນ-ຮູ່ງ ແຫງ່ງ ຈ໊ຽນ ໂຕສ໋ວ ເໝົາ ເຍີຍ ມ່ຽນ, ມປ່າ ນິ່ນ ເຖສີຍ ເອນ ປຸນ ຫຍ່ຽມ ກັ້ນ ໂຕສ໋ວ ໄຝ ວົ້ວ ເຕີ໋ຍ.”

⁶ ຮນັ້ງ ໜ່າຍ ອ໋ອຍ ຕສຸ ຫຍ່ຽມ ກັ້ນ ໂຕສ໋ວ ໄຝ ຢຽມ ທິນ-ຮູ່ງ ມ່າຍ ທຈະ ເຍີຍ ປົ໌ວ-ເດ໊ຍ. ເຖົາ ນິ່ນ ຕີ່ງ ເຍີຍ ຕສຢັ້ງ ໂຫ່ ນິ່ນ ຕສ່ຽວ ທ່າຍ ເມີ່ຍ ບົວ ຝາວ.

⁷ ອ໋ອຍ ຕສຸ ເຕສ໊າະ ຢຽດ ຕສູ໊ງ ໂຢວ-ເດສົ້າ ກວັ່ງ ປຸນ ນິ່ນ ເຫວີ່ຍ ຕສຸ ນິ່ນ ໂກ໋ວ ຈ໊ຽນ ເມີ່ຍ ບົວ.

⁸ ອ໋ອຍ ຕສຸ ກີງ ໂຮຍ້ວ ບູ້ງ ຈ໊ຽນ. ເມີ່ຍ ບົວ ເຍີຍ ວິນ-ວັ້ງ, ມ້ຽນ ເຍີຍ ຮູ່ງ, ຮນັ້ງ ຊ່ຽນ ນໍ ອຈຸ້ນ ຈ໊ຽນ ມີ່ງໆ ຕ້າຍໆ ລໍ໌ ມ່ຽນ ຫງາດ ຫຍັ່ນ.

⁹ ອ໋ອຍ ຕສຸ ສຽນ ວ້ວນ, ແຫງ່ງ ຈ໊ຽນ ມ້ຽນ ເຍີຍ ຮູ່ງ, ເຫວີ່ຍ ຕສຸ ເມີ່ຍ ບົວ ຮິ້ວ ຕຸ໊ ຢຽມ ນ້າຍ ລູ່ງ ເດ໊ຍ ສຽນ ເຢ​ຊູ ເຍີຍ ກໍ໋-ໂຢ໌ວ ຢ່າ ຮນັ້ງ ເມີ່ຍ ບົວ ນໍ, ຕສຸ ປວັ້ງ ນ້າຍ ຫຍູ່ງ ໂຄ້ວ.

¹⁰ ມປ່າ ຕສົ໊ວ ເມີ່ຍ ບົວ ຕສຸ ສ່ຽວ ໂຄ້ວ ຖສາມ ປ໊າ ລິ໌ວ, ເຖສີຍ ຫຍູ່ງໆ ເອນ ເຍີຍ ທິນ-ຮູ່ງ, ຕົ້ງ ເຫ່ວ ເມີ່ຍ ບົວ ເຖສົາ ກີ​ຕູ່ ຈວັ່ງ ແໝ່ງ ຕສຢັ້ງ, ຢຽດ ລິ໌ວ ຈວັ່ງ ນິ່ນ ເຍີຍ ອຈັງ-ຫລ່າງ ວົ້ວ ເຕົ້າ, ອ໋ອຍ ປຸນ ເມີ່ຍ ບົວ ຕຸ້ນ ຢຸ້ນ, ສຽນ ເຮ້ນ ຢ່າ ສຽນ ວ້ວນ.

¹¹ ທິນ-ຮູ່ງ ເຍີຍ ທຈະ ຢຽດ ລິ໌ວ ຢຽມ ເຖົາ ໝ່ານ ໂກ໊ວ ໝ່ານ ຕ່ອຍ. ອາ​ເມນ.

ເຊດ ເມວີ໌ຍ ຫວ່າ

¹² ຊີ​ລາ ເຖງ ເຢຍ ເຟ້ຍ ນ້າຍ ເຕສີ໊ຍ ຝຽນ ເຊ ນັ້ງ ເຍີຍ. ເຢຍ ຢ່າ ຝຸນ ນິ່ນ ໂຕສ໋ວ ຕສຽບ ຕສົ໊ວະ ເຍີຍ ກໍ໋-ໂຢ໌ວ. ເຢຍ ເຟ້ຍ ຂວິນ ເມີ່ຍ ບົວ ຢ່າ ໂຕສ໋ວ ຕສອງ-ເຕສ໋ງ ກ໊ອງ ນ້າຍ ເຊ ທິນ-ຮູ່ງ ເຍີຍ ຕສຽນ ເອນ. ເມີ່ຍ ບົວ ອ໋ອຍ ຕສຸ ເຂົາ ວ້ວນ ນິ່ນ ເຍີຍ ເອນ ອ໊ະ.

¹³ ບາ​ບີ​ລົນ ຕສີ້ງ ເຍີຍ ຈິວ-ປາງ ຢ່າ ຈັ໋ງ ເຖົາ ເມີ່ຍ ບົວ. ທິນ-ຮູ່ງ ຢ່າ ກິ໊ນ ນິ່ນ ບົວ ຮນັ້ງ ກິ໊ນ ເມີ່ຍ ບົວ ນໍ. ເຢຍ ເຍີຍ ຕອນ, ມາ​ໂຄ, ຢ່າ ຈັ໋ງ ເຖົາ ເມີ່ຍ ບົວ.

¹⁴ ເມີ່ຍ ບົວ ຫວຸ່ຍ ປວັ້ງ ອ໋ອຍ ຕສຸ ໂຕສ໋ວ ໂຮຍ້ວ ທສີງ-ເດສ່ງ ຕສົມ ຮມຽນ ປຸນ ທສີງ ລ່ານ ຮນ້ຳ ລ່ານ. ໂທ້ ທິນ-ຮູ່ງ ປຸນ ເມີ່ຍ ບົວ ຢຽດ ຕສູ໊ງ ເຖສົາ ກີ​ຕູ່ ຈວັ່ງ ແໝ່ງ ຕສຢັ້ງ ເຍີຍ ມ່ຽນ ຕຸ໊ ແປ້ງ ອອນ.