1 เท​สะ​โล​นิ​กา 3 - ฉบับอักษรลาว

¹ ໂຕສ໋ວ ເກົາ, ໄຮ໌ ຕສົ໊ວ ໄມ້ ຕຸ໊ ອ໊ະ, ຕສ່ຽວ ຕີ່ງ ເຢຍ ບົວ ກັ້ນ ຢຽມ ອາ​ເທນ ຕສີ້ງ ຮນັ້ງ,

² ແອ໋ງ ພ້າຍ ເຢຍ ບົວ ເຍີຍ ໂຢ໌ວ, ທິ​ໂມ​ໄທ, ມີ່ງ ເມີ່ຍ ບົວ ໜ່າຍ. ນິ່ນ ໂຕສ໋ວ ທິນ-ຮູ່ງ ເຍີຍ ກົງ-ມ່ຽນ, ຕສຸ້ນ ກີ​ຕູ່ ເຍີຍ ຄູ້ ຝຽນ, ເຖງ ຫລຽບ ວ້ວນ ເມີ່ຍ ບົວ ເຍີຍ ສຽນ ຟິມ ຢ່າ ນຸ໌ນ ເມີ່ຍ ບົວ ເຍີຍ ໂຮຍ້ວ,

³ ເຫວີ່ຍ ຕສຸ ໄມ້ ອ໋ອຍ ຫາຍ ເຕົ້າ ຫລາຍ ຕສຸ ມ່ຽນ ໂຕສ໋ວ ໂຕະ ໄຮ່ ຖຸຍ ໂປ່ວ. ເມີ່ຍ ບົວ ຢ່າ ຮິ້ວ ຕຸ໊ ບົວ ຕສຸ ມ່ຽນ ໂຕສ໋ວ ໂຕະ ເຊ ຈາ-ດ່າງ ຕີ່ງ ຕສຢັ໋ງ ບົວ ອ໋ອຍ ຕສຸ ປວັ້ງ ເຍີຍ ສີ່.

⁴ ເຢຍ ບົວ ຖສໍ່ ເຖສົາ ເມີ່ຍ ບົວ ຢຽມ ເຍີຍ ຕສຢັ້ງ ໂຫ່, ເຢຍ ບົວ ຈາ-ດ່າງ ບົ໋ວ ລິ໌ວ ເມີ່ຍ ບົວ, ບົວ ຕສູ໊ງ ອ໋ອຍ ຕສຸ ປວັ້ງ ມ່ຽນ ໂຕສ໋ວ ໂຕະ. ເມີ່ຍ ບົວ ຢ່າ ຮິ້ວ ຕຸ໊ ສີ່ ຕສະເກ້ງ ຮນັ້ງ ນ້າຍ ນໍ ທສວດ ຕ້າຍ ຕສຽນ ເຍີຍ.

⁵ ເຫວີ່ຍ ນ້າຍ ເຢຍ ໄຮ໌ ຕສົ໊ວ ໄມ້ ຕຸ໊ ເກົ້າ ເລົ່າ, ຕສ່ຽວ ພ້າຍ ທິ​ໂມ​ໄທ ມີ່ງ ເມີ່ຍ ບົວ ໜ່າຍ, ອ໋ອຍ ຮິ້ວ ຕຸ໊ ເມີ່ຍ ບົວ ເຍີຍ ສຽນ ຟິມ ຮນັ້ງ ຫາຍ ນໍ. ເດສົ້າ ເຫີຍ ດົ໊ວ ມ່ຽນ ວົ້ວ ເຕົ້າ ດົ໊ວ ຕສຸ ເມີ່ຍ ບົວ, ເຢຍ ບົວ ໂຕສ໋ວ ເຍີຍ ກົງ ຕສ່ຽວ ດ໊ອດ ເດສ່ງ ໝີ່ ອ໊ະ.

ທິ​ໂມ​ໄທ ຕໍ້ ຝຽນ ດສ໋ວນ

⁶ ອີ້ ຕສັ່ນ ທິ​ໂມ​ໄທ ມີ່ງ ເມີ່ຍ ບົວ ໜ່າຍ ດສ໋ວນ ຕ້າຍ ອ໊ະ. ນິ່ນ ຕໍ້ ຫລົງ ໄຫ່ ເຍີຍ ຝຽນ ຕ້າຍ ບົ໋ວ ເຢຍ ບົວ ເມີ່ຍ ບົວ ຖສໍ່ ສຽນ ຫລົງ, ຮນ້ຳ ເຢ​ຊູ. ນິ່ນ ຢ່າ ກ໊ອງ ເມີ່ຍ ບົວ ອະເຮນີ້ຍ ຕສັ່ນໆ ຈັ໋ງ ເຖົາ ເຢຍ ບົວ, ອ໋ອຍ ປວັດ ໄຫ່ ເຢຍ ບົວ, ຮນັ້ງ ເຢຍ ບົວ ອ໋ອຍ ປວັດ ເມີ່ຍ ບົວ ນໍ.

⁷ ກໍ໋-ໂຢ໌ວ ອ່າ, ເຢຍ ບົວ ປວັ້ງ ຕສຸ ຂວນ ນ່ານ ຢ່າ ຕສຸ ສ່ຽວ ໂຄ້ວ, ມປ່າ ເຢຍ ບົວ ໄຮ໌ ກ໊ອງ ເມີ່ຍ ບົວ ສຽນ ຫລົງ, ເຢຍ ບົວ ຕສ່ຽວ ຕຸ໊ ອອນ ໂຮຍ້ວ ອ໊ະ.

⁸ ເຫວີ່ຍ ຕສຸ ເມີ່ຍ ບົວ ເຂົາ ວ້ວນ ຕສ໊ຽວ ເຢ​ຊູ, ເຢຍ ບົວ ເຍີຍ ແໝ່ງ ຕສ່ຽວ ໄຮ໌ ຮນັ້ງ ຟີ້ງ ເຈ໌ຍ ຕ້າຍ ນໍ.

⁹ ເຢຍ ບົວ ອ໋ອຍ ຕສຸ ຮນັ້ງ ຫາຍ ນໍ ເຫວີ່ຍ ເມີ່ຍ ບົວ ແລ໌ງ ຕສີ້ງ ທິນ-ຮູ່ງ? ເຢຍ ບົວ ແລ໌ງ ຕສີ້ງ ນິ່ນ ເຫວີ່ຍ ຕສຸ ເມີ່ຍ ບົວ ປຸນ ເຢຍ ບົວ ຕຸ໊ ຢຽມ ນິ່ນ ເຍີຍ ດສະຮມຽນ ອອນ-ເຫລາະ ໄຫ່.

¹⁰ ເຢຍ ບົວ ຮນອຍໆ ມ໌ວນໆ ທຈະ ໂທ້ ທິນ-ຮູ່ງ ປຸນ ເຢຍ ບົວ ແອ໋ງ ຕຸ໊ ປວັດ ເມີ່ຍ ບົວ ເຍີຍ ຮມຽນ. ເມີ່ຍ ບົວ ເຍີຍ ສຽນ ຟິມ ທສາ ຕສຸ ຫາຍ ຫຍູ່ງ ເຢຍ ບົວ ຕສ່ຽວ ໄຮ່ ທິບ ປຸນ ເມີ່ຍ ບົວ.

¹¹ ໂທ້ ບົວ ເຍີຍ ຕສັ່ງ ເຕ໋ຍ ທິນ-ຮູ່ງ ຢ່າ ໂທ້ ບົວ ເຍີຍ ຕສ໊ຽວ ເຢ​ຊູ ຄອຍ ເຈົ໊າ ປຸນ ເຢຍ ບົວ ໄຮ່ ມີ່ງ ເຖົາ ເມີ່ຍ ບົວ ໜ່າຍ.

¹² ຢ່າ ໂທ້ ຕສ໊ຽວ ເຢ​ຊູ ປຸນ ເມີ່ຍ ບົວ ລ່ານ ຮນ້ຳ ລ່ານ ຢ່າ ຮນ້ຳ ຕສວັ໋ງ ມ່ຽນ ທສ້ຳ ຈ໊ຽນ ຝາວ, ຮນັ້ງ ເຢຍ ບົວ ຮນ້ຳ ເມີ່ຍ ບົວ ວົ້ວ ນໍ.

¹³ ໂທ້ ນິ່ນ ຫລຽບ ວ້ວນ ເມີ່ຍ ບົວ ເຍີຍ ໂຮຍ້ວ, ຕສົ໊ວ ຕສ໊ຽວ ເຢ​ຊູ ເຖສົາ ຢຽດ ຕສູ໊ງ ເປ໋ນ ນິ່ນ ເຍີຍ ມ່ຽນ ວົ້ວ ເຕີ໋ຍ ແອ໋ງ ຕ້າຍ ວົ້ວ ຕສັ່ນ, ເມີ່ຍ ບົວ ຕສ່ຽວ ໄຮ່ ຢຽມ ບົວ ເຍີຍ ຕສັ່ງ ເຕ໋ຍ ທິນ-ຮູ່ງ ເຍີຍ ດສະຮມຽນ ທສີງ-ເດສ່ງ, ໄມ້ ລ່ຳ ເອກ້ມ ຕ໋ອງ.