1 โค​ลิน​โท 4 - ฉบับอักษรลาว

ກີ​ຕູ່ ເຍີຍ ກົງ-ໂຕສ້

¹ ຮນັ້ງ ໜ່າຍ, ເມີ່ຍ ບົວ ຫອບ ຕສຸ ຝຸນ ເຢຍ ບົວ ໂຕສ໋ວ ກີ​ຕູ່ ເຍີຍ ໂປວ, ຢ່າ ຕຸ໊ ຕສິ໋ວ ໂກ໋ວ ທິນ-ຮູ່ງ ເກມ ຈ໊ຽນ ເຍີຍ ຕສຽນ ເລີ໌ຍ.

² ໂຕສ໋ວ ນ້າຍ ຫຍູ່ງ ໂປວ ເກົ້າ ຫລົ່ງ ຈ໊ຽນ ເຈ໋ຍ ເຊ ອ໋ອຍ ຕສຸ ຕສຽບ ຕສົ໊ວະ ເຍີຍ ໂຕສ໋ວ.

³ ເຫວີ່ຍ ເຢຍ ນໍ, ເມີ່ຍ ບົວ ໄຟ ຫາຍ ເຕົ້າ ຫລົ່ງ ຫາຍ ຫຍູ່ງ ປ້າມ ມ່ຽນ ເຍີຍ ເລີ໌ຍ ຊ້ຽມ ເຢຍ, ເຢຍ ຝຸນ ເຊ ໄຝ-ຟິ້ວ ເຍີຍ ສີ່. ລ່ຽມ ເຢຍ ກັ້ນ ຢ່າ ໄມ້ ຊ້ຽມ ເຢຍ ກັ້ນ ອ໊ະ.

⁴ ເອີຍ ເຢຍ ກັ້ນ ເຍີຍ ໂຮຍ້ວ ໄຮ໌, ເຢຍ ໄມ້ ມ່າຍ ຕ່ອງ ເຍີຍ ຕ໋ອງ, ມປ່າ ນ້າຍ ໄມ້ ເຕສີ໌ຍ ປຸນ ທສີງ ເຢຍ ໄມ້ ຕ່ອງ. ຂູງ ຕສ໊ຽວ ກັ້ນ ໄຮ່ ຕີ່ງ ເຢຍ ຕ່ອງ ໄຟ ໄມ້ ຕ່ອງ.

⁵ ຮນັ້ງ ໜ່າຍ, ຊ້ຽມ ເຍີຍ ຕສຢັ້ງ ໂຫ່ ໄມ້ ແກ້ງ ເຖົາ, ໄມ້ ຕູ໋ງ ຕີ່ງ ຫາຍ ເຕົ້າ ເຍີຍ ຕສຸ໌ຍ. ອ໋ອຍ ຕສຸ ຕສົ໊ວ ຕສ໊ຽວ ແອ໋ງ ຕ້າຍ ວົ້ວ ຕສັ່ນ, ນິ່ນ ຖສີງ ຕ້າຍ ຊ້ຽມ ຕີ່ງ. ນິ່ນ ອ໋ອຍ ເຕສ໊າະ ປີ໋ງ ຈ໊ຽນ ຢຽມ ຫຮມວັງ ກະຍົ໌ວ ເຍີຍ ສີ່ ທສວດ ຕ້າຍ ຢຽມ ອຈັງ. ມ່ຽນ ຢຽມ ໂຮຍ້ວ ຮນ້ຳ ເຍີຍ ສີ່ ນິ່ນ ຢ່າ ອ໋ອຍ ປຸນ ທສວດ ເດສ່ງ ຕ້າຍ. ເຖົາ ວົ້ວ ຕສັ່ນ ເອີຍ ທິນ-ຮູ່ງ ປວັດ ເກ໊າະ-ມ່ຽນ ຜຸຍ ຕຸ໊ ເທສງ, ທິນ-ຮູ່ງ ຕສ່ຽວ ເທສງ ອ໊ະ.

⁶ ກໍ໋-ໂຢ໌ວ ອ່າ, ກ໊ອງ ລິ໌ວ ນ້າຍ ເຕີ໋ຍ ຢຽດ ຕສູ໊ງ ສີ່, ເຢຍ ເຕສ໊າະ ຕ້າຍ ເປີ໊ຍ ເຢຍ ກັ້ນ ເຖສົາ ອາ​ປໍ​ໂລ ເຫວີ່ຍ ໂຕສ໋ວ ຫຍູ່ງ ເຕສີ໊ຍ ປຸນ ເມີ່ຍ ບົວ ຮິ້ວ ຕຸ໊, ໄມ້ ຕູ໋ງ ເຈ໋ຍ ດ່າງ ກີງ-ໂຊວ ເຍີຍ ຫວ່າ. ຮນັ້ງ ໜ່າຍ, ເມີ່ຍ ບົວ ຕສ່ຽວ ໄມ້ ໂຕສ໋ວ ເໝົາ, ທ່າຍ ນ້າຍ ເຕົ້າ, ໝັ່ງ ເຜຍ ວົ້ວ ເຕົ້າ.

⁷ ຫາຍ ເຕົ້າ ປຸນ ເມີ່ຍ ໂຕສ໋ວ ເກົ້າ ໂຮລ ກັ້ນ ເຕົ້າ? ເມີ່ຍ ມ່າຍ ຫາຍ ຫຍູ່ງ ໄມ້ ເຕສີ໌ຍ ເມີ່ຍ ຕສິ໊ບ ຕ້າຍ? ວົ້ວ ຫຍູ່ງ, ເຊ ກ໊ອງ ເມີ່ຍ ຕສິ໊ບ ຕ້າຍ, ເມີ່ຍ ເຫວີ່ຍ ຫາຍ ຕິ່ວ ປູ໋ງ ຫວ່າ-ເໝົາ ຮນັ້ງ ໄມ້ ເຕສີ໌ຍ ຕສິ໊ບ ຕ້າຍ ນໍ?

⁸ ເມີ່ຍ ບົວ ຫຍູ່ງໆ ມ່າຍ ດສ້ອຍ ເດສ່ງ ອ໊ະ ເອາະ? ເມີ່ຍ ບົວ ປຸ໊ດ ຕສ້ອຍ ເດສ່ງ ອ໊ະ ເອາະ? ເມີ່ຍ ບົວ ກັ້ນ ຕຸ໊ ໂຕສ໋ວ ຮູ່ງ ຮນັ້ງ ອ໊ະ ເອາະ? ເຢຍ ບົວ ໄມ້ ຕຸ໊ ໂຕສ໋ວ. ເຝີຍ ຕຸ໊ ເມີ່ຍ ບົວ ຕສະເກ້ງ ໂຕສ໋ວ ຮູ່ງ, ເຢຍ ບົວ ຕສ່ຽວ ຕຸ໊ ເຖສົາ ຈ໊ຽນ ເມີ່ຍ ບົວ ໂຕສ໋ວ.

⁹ ເຢຍ ຮນ້ຳ ຕ້າຍ ທິນ-ຮູ່ງ ປຸນ ເຢຍ ບົວ ກົງ-ໂຕສ້ ຢຽມ ອກະຮ້າ ເຈ໋ຍ, ຮນັ້ງ ຕສຸ ຕີ່ງ ຕສຸ໌ຍ ຕອງ ຕສວັ໋ງ ໄຕ໋ ໄຕ່ ເຍີຍ ມ່ຽນ ນໍ, ເຫວີ່ຍ ປຸນ ຢຽດ ຕສູ໊ງ ຟິນ-ມ່ຽນ ເຖສົາ ປ້າມ ມ່ຽນ ໝັ່ງ ອະດສຢ່າວ.

¹⁰ ເຫວີ່ຍ ກີ​ຕູ່ ເຢຍ ບົວ ໂຕສ໋ວ ມ່ຽນ ຫຮງົງ ມ່ຽນ, ມປ່າ ເມີ່ຍ ບົວ ເຖສົາ ກີ​ຕູ່ ຈວັ່ງ ແໝ່ງ ຕສຢັ້ງ ຕສ່ຽວ ມ່າຍ ທສົງ-ເມ່ງ ອ໊ະ ເອາະ? ເຢຍ ບົວ ເມົາ ມປ່າ ເມີ່ຍ ບົວ ເຮ້ນ ເອາະ? ເຢຍ ບົວ ຕສຸ ມ່ຽນ ໝັ່ງ ເຜຍ ມປ່າ ມ່ຽນ ທ່າຍ ເມີ່ຍ ບົວ ເອາະ?

¹¹ ເຖົາ ອີ້ ຕສັ່ນ ເຢຍ ບົວ ໂຮຍ້ວ ເຊຍ, ຈາງ ອກ໊າດ. ເຢຍ ບົວ ຕສຸ໊ ລຸຍ-ໂຫວ-ຮູ້. ເຢຍ ບົວ ຕສຸ ມ່ຽນ ເບ໊າະ ຢ່າ ໄມ້ ມ່າຍ ຕີ້ງ ເຕສ໊ບ ຕ໋ອງ.

¹² ເຢຍ ບົວ ຫລົ່ງ ກັ້ນ ເຍີຍ ປົ໌ວ ໂຕສ໋ວ ກົງ ໂຄ້ວ ເຫວີ່ຍ ຢູ໌ງ ກັ້ນ ເຍີຍ ແໝ່ງ. ຕສຸ ມ່ຽນ ຕສ໋ຽວ, ເຢຍ ບົວ ປວັງ ຫວ່າ ນິ່ນ ບົວ. ຕສຸ ມ່ຽນ ໂຕສ໋ວ ໂຕະ, ເຢຍ ບົວ ເຕ໊ຍ ຈ໊ຽນ.

¹³ ຕສຸ ມ່ຽນ ກ໊ອງ ຫວ່າ-ຮູ້, ເຢຍ ບົວ ກ໊ອງ ຫລົງ ປຸນ ນິ່ນ ບົວ. ເຖົາ ອີ້ ຕສັ່ນ ເຢຍ ບົວ ໂຕສ໋ວ ປ້າມ ມ່ຽນ ເຍີຍ ຫລະຟັບ-ຕສາ, ຢ່າ ໂຕສ໋ວ ປ້າມ ເກນ ເຍີຍ ກະນ້າຍ-ຕ້ຽນ.

¹⁴ ເຢຍ ເຟ້ຍ ນ້າຍ ເຕີ໋ຍ ຫວ່າ ໄມ້ ເຕສີ໌ຍ ເຫວີ່ຍ ປຸນ ເມີ່ຍ ບົວ ໄຍ້. ເມີ່ຍ ບົວ ເຊ ຮນັ້ງ ໂຕສ໋ວ ເຢຍ ກັ້ນ ເຍີຍ ຝຸຈ໊ວຍ ນໍ. ເຢຍ ຕສ່ຽວ ເຟ້ຍ ຝຽນ ຂວິນ ເມີ່ຍ ບົວ.

¹⁵ ໄມ້ ກຸ໊ນ ມ່າຍ ຢຽດ ຫວ່ານ ເຕົ້າ ຟິນ-ແຊງ ຕໍ້ ເມີ່ຍ ບົວ ກັນ ກີ​ຕູ່, ເມີ່ຍ ບົວ ຂູງ ມ່າຍ ດຸ ເຕົ້າ ເຕຍ ຮນັ້ງ. ເມີ່ຍ ບົວ ເຖສົາ ກີ​ຕູ່ ເຢ​ຊູ ຈວັ່ງ ແໝ່ງ ຕສຢັ້ງ, ເຢຍ ຕສ່ຽວ ຕຸ໊ ເປ໋ນ ເມີ່ຍ ບົວ ເຍີຍ ເຕຍ, ເຫວີ່ຍ ຕສຸ ເຢຍ ຕໍ້ ຄູ້ ຝຽນ ຕ້າຍ ບົ໋ວ ເມີ່ຍ ບົວ.

¹⁶ ຮນັ້ງ ໜ່າຍ, ເຢຍ ໂທ້ ເມີ່ຍ ບົວ ຕສວດ ເຢຍ ເຍີຍ ຫຍູ່ງ ເຕສີ໊ຍ ໂຕສ໋ວ.

¹⁷ ເຫວີ່ຍ ນ້າຍ ເຢຍ ພ້າຍ ທິ​ໂມ​ໄທ ມີ່ງ ເມີ່ຍ ບົວ ໜ່າຍ. ນິ່ນ ເຊ ຮນັ້ງ ໂຕສ໋ວ ເຢຍ ເຍີຍ ຕອນ-ຮນ້ຳ ຢ່າ ເຂົາ ຕສ໊ຽວ ໂຕສ໋ວ ຕສຽບ ຕສົ໊ວະ ເຍີຍ ມ່ຽນ. ນິ່ນ ອ໋ອຍ ເຖງ ເມີ່ຍ ບົວ ຈັ໋ງ ເຢຍ ເຖສົາ ກີ​ຕູ່ ເຢ​ຊູ ຈວັ່ງ ແໝ່ງ ຕສຢັ້ງ ໂຕສ໋ວ ເຍີຍ ເຈົ໊າ, ເຊ ຮນັ້ງ ເຢຍ ຢຽມ ນອມໆ ຕ໋ອງ ເຍີຍ ຈິວ-ປາງ ອຈ໋າວ ນໍ.

¹⁸ ຢຽມ ເມີ່ຍ ບົວ ໜ່າຍ ມ່າຍ ເຕີ໋ຍ ຫລ່າຍ ເຢຍ ໄມ້ ໄຮ່ ເຖົາ ເມີ່ຍ ບົວ ໜ່າຍ ຕສ່ຽວ ໂຕສ໋ວ ເໝົາ.

¹⁹ ມປ່າ ເຊ ກ໊ອງ ເອີຍ ຕສ໊ຽວ ເຍີຍ ເອີ໋ຍ, ໄມ້ ເລົ່າ ເຢຍ ເຖົາ ເມີ່ຍ ບົວ ໜ່າຍ ອ໊ະ. ເຖົາ ວົ້ວ ຕສັ່ນ ເຢຍ ຕສ່ຽວ ຕຸ໊ ປວັດ ວົ້ວ ເຕີ໋ຍ ໂຕສ໋ວ ເໝົາ ເຍີຍ ມ່ຽນ, ໝັ່ງ ກ໋າ ນິ່ນ ບົວ ເຍີຍ ທຈະ ຮນັ້ງ ຫາຍ ນໍ, ໄມ້ ເຕສີ໌ຍ ຂູງ ໝວັງ ນິ່ນ ບົວ ກ໊ອງ ເຍີຍ ຫວ່າ.

²⁰ ເຫວີ່ຍ ຕສຸ ທິນ-ຮູ່ງ ໂຕສ໋ວ ຕສ໊ຽວ ກຸ໊ນ ມ່ຽນ ປຸນ ທສີງ ຢຽມ ມ່ຽນ ມ່າຍ ສີງ ລີ່ງ ເຍີຍ ທຈະ, ໄມ້ ເຕສີ໌ຍ ຢຽມ ມ່ຽນ ກ໊ອງ ເຍີຍ ຫວ່າ.

²¹ ເມີ່ຍ ບົວ ອ໋ອຍ ເຢຍ ຮນັ້ງ ຫາຍ ນໍ ໂຕສ໋ວ? ອ໋ອຍ ເຢຍ ຕໍ້ ຈ໊ຽນ ປຢ໊າ-ປິນ ຕ້າຍ ໄຟ ອ໋ອຍ ເຢຍ ມ່າຍ ໂຮຍ້ວ ຮນ້ຳ ມ່ຽນ, ສ່ວນ ຕສີ້ງ ສ່ວນ ເອີ໋ຍ ເຍີຍ ຕ້າຍ ໄຟ?