Salmo 91 - Blaan Sarangani

Dwata guflidung i dad to gmadè kenen

¹ Balù simto mnè di ifat Dwata Too Mdatah, kanlung sa, du Dwata i Too Mtulus.

² Fakaygu man di Amugu Dwata, “Ge i guflidunggu na i kamlung deg; ge i Dwatagu na i gusmaliggu.”

³ Gmanam én, du falwaan ge mdà di dad sasè gamfawel ge; na mdà di dad tduk magu i gamfati.

⁴ Snafangan ge di dad gamsasè ge, salngad di anuk smafang i dad ngaan di dungan i fafakan fye landè sasè gafat di ge; kanlungan ge du too gsalig kenen.

⁵ Taman landè duenam likò i too kanlikò mkel di butang, ku demen i gamsasè ge mkel di mduh,

⁶ ku demen i dad tduk tmadè ge di kifu, na demen i gamsasè gafalmo ge di ltu duh.

⁷ Balù kel i bong gaslok na mlibu to mati mdadong di ge, na balù sfalò libu to mati di glibutam, là mkel di ge i sasè gaslok én.

⁸ Teenam sa i flayam Dwata i dad to sasè, bay là ge gakuf.

⁹ Ku én gumneam di ifat i Amum Dwata na i Too Mdatah i guflidungam,

¹⁰ là ge nkel i sasè gaslok, na là gafdadong di gumneam i gamsasè ge,

¹¹ du dek Dwata i dad kasaliganan mifat ge, fye kanlungla ge balù nè gusalum.

¹² Silungla ge i dad kmalla, du fye là gtadè di batu i bliam.

¹³ Landè gaslokam balù magu ge di bleng i dad malbang lmanaf liyun, ku demen ndaam i dad saldafan, balù too labè i dad liyun demen too nun alas i dad ulad.

¹⁴ Man Dwata, “Du bong nawan deg, falwàgu kenen di dad gamsasè kenen, na kanlunggu, du fgadean na deg i Amun Dwata.

¹⁵ Di katlon deg, tnabenggu kenen, na làgu kenen tnagak di bang i nun samuk, bay falwàgu na fdatahgu kenen.

¹⁶ Fsengu i nawan di klawilan, na banlégu kenen kagalwà mdà di dad gamsasè kenen.”