Salmo 63 - Blaan Sarangani

Tnabeng Dwata i harì

Ani lingag Dabid di kadtuan di banwe gulandè to di bong banwe Dyudiya.

¹ E Dwata, ge i Dwatagu, na too sè klidùgu ge; i klidù nawagu ani, gambet too agu malau. Fanngabalta ge gambet i to mngabal yéél ninum di banwe too kafag na sasè tanà i landè yéél.

² Tagafdadong agu di ge déén di Bong Gumneam, na tateengu i bong enegam na kafyem.

³ Du i kakdom too mabtas fa di nawagu, na én duengu dmayen ge.

⁴ Mlé agu fye di ge di klogu mto fa, na kayanggu i dad sigalgu déén di ge du dmasal fagu di dagitam.

⁵ Toogu fabsol i layefgu di kafyem, na di klehewgu mlingag agu dmayen ge.

⁶ Di kilègu faldam agu ge; tayud i butang ge i fandamgu.

⁷ Mnè agu di ifatam salngad di knè i anuk di dungan fafak yéan, taman mlingag agu du ge sa i tmabeng deg.

⁸ Nlagafta ge na nagotam agu i kwananam du fye landè gaslokgu.

⁹ Kabay dad to mayè mwè i nawagu falmo; gtufa ale kadang ditù di lam i banwe dad to mati.

¹⁰ Sdulê ale mati di kasfati, na i lawehla knaan i dad ayem di bnas.

¹¹ Kabay i harì ani flehew di kfisan Dwata i dad dmuen deg; na kdee to makang msen di deg flehew du tamaklang i talù dad to tmulen kéng ani.