Salmo 5 - Blaan Sarangani

I dasal kafni klung di Dwata

Ani satu lingag Dabid.

¹ E Amugu Dwata, fanlingem i dasalgu, na balù i mnè fa di lam nawagu, i làgu gagan mangman dun, begam fanduf.

² Ge, i Harìgu na Dwatagu, fanlingem i kafnigu di ge, du alò ge i gudmasalgu.

³ Amugu Dwata, di flafus lingem i talùgu, di ksut i duh dmasal agu di ge, na fatangu i ktimelam deg.

⁴ Gadègu ge i Dwata landè ayè i sasè nimò, na laam faloh ku nun sasè to mnè di safédam.

⁵ I to fdatah i kton là gtadag di kanfem, du toom knang nawa i kdee to mimò sasè.

⁶ I dad to gal tmulen kéng falmom; toom knang nawa i to mayè mati to na i to mlimbung.

⁷ Kabay agu, fakay agu fusuk di gumneam du mdà di bong kakdom landè kgilin. Déén di gumangamfù di ge, di Bong Gumneam, fdanàgu i ktogu di ge gagin i klikògu.

⁸ Amugu Dwata, begam agu nalak di matlu nimò salngad ge, du fye là agu fisan di dad dmuen deg. Tdoam deg ku tan i dalan knayeam gumagugu.

⁹ Én fnigu du dad to dmuen deg, landè manla gsalig, na én alò kayèla falmo. I bàla gambet sol i lbang là maglimun, fagu di kafdagla ftatekla i demela to.

¹⁰ Taman nukumam ale, Dwata, fye moon ku i dad sasè nimòla mulê di dale. Knagolam ale du tadee dulê nlafàla i knayeam, na taknagolla ge.

¹¹ Kabay kdee dad to smalig di ge, banlém ale klehew, fye too ale gal mlingag di klehewla. Kanlungam ale, fye lehew di ge i dad to ani i mbong nawa ge.

¹² E Amugu Dwata, ge i mlé kafye di dad to matlu, na i kakdom smafang dale gambet i klung.