Salmo 49 - Blaan Sarangani

Là gbayad i knun i nawaito

Ani satu lingag i bel Kora.

¹ Kdeeyu, fanlingeyu ani! Kdee to di kdee banwe di klamang tanà flinge gamu!

² Dad mdanà to na dad mdatah to, dad to nun knun na dad to landè, flinge gamu!

³ I fandamgu i dad mabtas mngalam fandam, na talù agu i dad tnalù i nun gukmamu dun.

⁴ Nun santulengu i too malima glabat, na fgadègu i gumtatekan fagu di klingag slenggu kambit i arfagu, na dunan ani:

⁵ Là agu likò di bang i nun fan fsasè deg, balù maglibut agu i dad to mlayam deg,

⁶ dunan i dad to smalig di bong filakla, na fdag i bong knunla.

⁷ Kabay balù simto to dun laan gagan msò i kton; laan gbayad di Dwata i knun nawan,

^8-9 fye mto kenen kel di landè sen, na fye laan mati na lbang; hae, du too mabtas i bayad i nawa dad to; landè gablà bayadan dun.

¹⁰ I kdee to teenla na balù i dad to too fulung faldam mati, na salngad i dad to là fulung faldam na i dad to mgal ulu, kdeela mati, na gtagakla i knunla di dademe to.

¹¹ Man nawala i tanà gumnèla nfunla kel di landè sen, taman dagitla i tanàla sngad dale dagit, bay i kaglutan, i lbang gumnèla kel di landè sen.

¹² Balù nun kdatah i dad to, knean mati ale salngad i dad lmanaf.

¹³ Tatìyu neye ku tan gukel i to smalig di kton, na fsen nawan di knunan.

¹⁴ I gukel dad to smalig di ktola mati salngad di dad bilibili nebe di gutmatê dale; fati i mebe dale ditù di lam i lbang. Na di là mlo mdanà ale di dad to matlu, du i too fye kagkahla baling lana di kbalok i lawehla di lam i gumnèla di lbang.

¹⁵ Kabay nsò agu Dwata mdà di agot i fati, na neben agu di safédan.

¹⁶ Taman nang ito fsamuk i nawaito gablà di to mbaling nun bong knunan, na ku baling matnù i kafye nfunan,

¹⁷ du di kfatin laan sa gebe i knunan; là magin di kenen i kdatahan ditù di lbang.

¹⁸ Du balù fa too msen nawa satu to di knean di tah tanà ani, na too kenen dag i dademe to du mdà di bong gnaganan,

¹⁹ knean mati sa na mnè ditù di saféd i dad tuan, ditù di gukmifun kel di landè gusenan.

²⁰ Balù nun kdatah satu to bay landè kaglabat, knean mati salngad i dad lmanaf.