Salmo 22 - Blaan Sarangani

I to tamlo di Dwata du maflayam

Ani satu lingag Dabid.

¹ E Dwatagu, Dwatagu, tan duenam tmagak deg? Too agu ftabeng ge moon bay laam linge i dalonggu, na laam agu tnabeng.

² E Dwatagu, di mduh fakdo agu di ge fye tnabengam agu, bay laam agu tnabeng, di butang fakdo agu na landè kaftudgu.

³ Kabay knean too ge mtiu, landè salaam. Déén ge di gumneam too mdatah, na ge i dnayen i dad tom, i bel Israél.

⁴ Ge i gusmalig dad gutambulmi; smalig ale di ge na falwaam ale di kaflayamla.

⁵ Tamlo ale di ge na galwà ale; smalig ale di ge na landè gugdanà nawala.

⁶ Kabay agu, salngad agu i safat, ise to, du landè mafè deg, na knang agu nawa i kdee to.

⁷ I kdee to mite deg, toola agu nulé, na lamaméd ale du slame dalanla madoy deg.

⁸ Manla, “A, én kun gusmalig to ani di Amun Dwata. Fadé neyeito ku tnabeng kenen i Amun! I Amun nan falwà kenen, ku glut toon kenen kando.”

⁹ Kabay ge, Dwata, i fsut deg mdà di tien yêgu, na ge i mifat deg di ktutùgu fa di yêgu.

¹⁰ Alò ge i gusmaliggu mdà di ksutgu kel ani, na landè dademe dwatagu, alò ge.

¹¹ Nang ge moon fawag di deg, du too mdadong i kaflayam di deg, na landè dademe fakay tmabeng.

¹² Too dee to mnang nawa samlibut deg, du fanla agu falmo. Salngad ale i dad labè lagi baka mdà di banwe Basan mayè falmo i dad to.

¹³ Na salngad ale i dad malbang labè lmanaf liyun mngat i dad bàla du kagula makét na samkah deg, na gambet too ale mngal fite i klabèla.

¹⁴ Taman too tì landè gal i lawehgu di klikògu, salngad di yéél mkok di tanà, tì landè sa. Lyalogu i dad tulangu mti mkah di gusagotla, na lêman i kafalyalogu i ktogu sadi mtunal di klikògu gambet i talu mtunal.

¹⁵ Na i bkakonggu too kafag salngad di kfung, na damkat dilàgu di laflalgu. Ani i kagkahgu du gambet tatnagakam agu di kfung, di agot i fati.

¹⁶ I kibòla deg salngad i dad labè ayem samtlaban falmo deg, du nun dee to mimò sasè samlibut deg; na tatanbakla i dad kmalgu na dad blìgu.

¹⁷ Too gfan kdee tulangu, na tatì meye dad to dmuen deg na too ale lehew di kaflayamgu.

¹⁸ Sansalella i klawehgu; na fagu di kasbunut neyela ku simto gamfun dun.

¹⁹ Kabay ge, Amugu Dwata, nang ge fawag di deg, du alò ge i Gumgal Nawagu. Gasil ge tmabeng deg!

²⁰ Falwaam agu di fati; falwaam i ktogu di agot dad to gambet i labè ayem mayè falmo deg.

²¹ Falwaam agu mdà di dad to gambet i labè liyun, na i dad mlayal lagi baka; falwaam agu du landè kibògu falwà i ktogu.

²² Na tulengu kadang di dad togu i kafye mgimoam, na dnayenta ge déén di kastifun i kdee tom.

²³ Mangu di dale, “Kdeeyu nun klikò di Amuito Dwata, dnayenyu kenen. Fdatahyu kenen, gamu bel Dyékob; nafèyu kenen, gamu bel Israél.

²⁴ Hae, du laan tì tnagak i to maflayam, na laan fbayà di kaflayaman. Laan kenen knagol, bay galan kenen fanlinge ku tamlo du ftabeng di kenen.”

²⁵ Dwata, du too mdatah i mgimoam, toogu ge dnayen kadang di bong kastifun i kdee tom. Di kanfe i dademegu to i nun klikò di ge blégu di ge i dsù tafakanggu.

²⁶ Na di duh én, i dad to landè, gamkaan ale gusen i nawala; na i dad to fdadong di Amuito Dwata, dnayenla kenen. Kayègu ku banlé gamu Dwata fye knè landè gusenan.

²⁷ Na di duh én, gafaldam kdee to di klamang banwe i Amuito Dwata, na samfulê ale di kenen; i kdee to, lkuad ale du mangamfù di kenen,

²⁸ du i Amuito Dwata, kenen i too nun glal mebe i dad to, na kenen i mebe i kdee sahal bung dad to di klamang banwe.

²⁹ Balù dad to too mdatah di tah tanà ani fdanàla i ktola di kenen di duh én, na kel di kdee to i mto alò flo di tah tanà ani, fdanàla i ktola di kenen.

³⁰ Na i belito fa mamu ale kadang di Dwata; i dad tuala samtugad i tulen di dad ngàla i kafye mgimoan.

³¹ Balù fa dad to là fa sut gutmulen kadang gablà di mgimò Dwata di kafalwaan i dad ton.