Hibru 3 - Blaan Sarangani

I kdatah Dyisas di ku Mosis

¹ Na taman dad flanekgu di kafaglut, du gamu tanalék Dwata i mnè di safédan di langit di fulé duh, tooyu fandam Dyisas, du kenen sa dek Dwata salu di tah tanà ani, du fye mbaling kenen mdatah baito di kafaglutito.

² Too mimen Dyisas Dwata di kdee fimoan kenen gambet i kimen Mosis di kifatan i dad to Dwata.

³ Kabay di fandam Dwata mdatah fa Dyisas di ku Mosis salngad i kdatah to mimò i gumnè di gumnè i nimoan.

⁴ Hae, gadeito ku nun gumnè, nun to mimò dun, na i mimò i kdee dunan Dwata.

⁵ Na Mosis, too kenen mimen Dwata di kifatan i dad ton, du salig Dwata. Én nimoan tulenan di dad to i kaglut i man Dwata di kenen.

⁶ Kabay Dyisas Krayst ise alò salig Dwata, bay Tingaan. Na too kenen mimen Dwata di kifatan i dad to Dwata, na gito i dad ton ku fadlug ito di kafaglutito di ku Dyisas, na ku là ito myà tmulen gablà di fatanito di kasfuléan.

I kafaftud Dwata i dad ton

⁷ Na taman too ito mimen i fngewe i Mtiu Tulus fsulatan, manan, “E gamu, toogu fanlinge i man Dwata di gamu di duh ani,

⁸ na nangyu fgal i uluyu, salngad di mgimò i dad gutambulyu di knangla Dwata klola tmilew kenen di knèla di banwe gulandè to.”

⁹ Du gman Dwata manan, “Klo fat falò fali balù tateen dad gutambulyu dee too fye mgimògu di dale, knean tnilewla agu, du neyela ku tan kaftahàgu i nawagu di landè ksaligla deg.

¹⁰ Taman, too agu flabè dale, na mangu, ‘Ale i dad to fasyat i nawala, là ale mayè mimen i dad knayègu.’

¹¹ Taman du too agu flabè nun fakanggu, mangu, ‘I dad to ani, là ale sa gfusuk di banwe gufaftudgu dale.’ ”

¹² Taman dad flanekgu, too gamu fafye, du fye landè di gamu nun sasè fandam i là mayè mimen Dwata i gamgebe gamu di ktagakyu Dwata i too mto.

¹³ Kabay ani, du fye landè di gamu mafgaw i salà na mbaling mgal ulu, i balingyu nimò, satgal gamu nawa klit i duh di nun gdè bangyu mlinge i talù Dwata.

¹⁴ Du ku tooito smalig di Dwata gambet i tnanin ksaligito di kenen, kel di gusen i kneito di tah tanà, nun alelito di kdee nfun Krayst Dyisas.

¹⁵ Lêmangu nulit i man i Mtiu Tulus, manan, “E gamu, tooyu fanlinge i man Dwata di gamu di duh ani, na nangyu fgal i uluyu salngad di mgimò i dad to gutambulyu di knangla Dwata.”

¹⁶ Simto kè i dad to balù tamlinge ale i talù Dwata, bay knean, too mnang nawala dun? Gadeito i dad to ani dad bel Israél di kebe Mosis dale lamwà di banwe Idyif.

¹⁷ Na simto kè i fanlabè Dwata klo fat falò fali? Dunan lêman i dad bel Israél. Na du too ale gamsalà fanlayam ale Dwata, na di kfatila gilè i lawehla di tanà ditù di banwe gulandè to.

¹⁸ Na simto kè i dad to i gman Dwata di fakangan i là ale gfusuk di banwe gufaftudan dale? Dad to bel Israél sa lêman i là mimen Dwata.

¹⁹ Taman i gugamlabatito là ale gfusuk di banwe gufaftud Dwata dale, du là ale mayè faglut na smalig di kenen.