Dad Fngewe 9 - Blaan Sarangani

I kfulung faldam na i là fulung faldam

¹ Na i kfulung faldam flingengu di to fdak i gumnean, na nun fitu lahanan.

² Kmatê kenen i lmanaf du fnistan, na nun bolan fye nem di ninuman, na tafnatlagadan i gukmaanan.

³ Na dekan i dad saligan libun ditù di gunun dee to, du nlakla i dad to.

⁴ Na manla, “Na gamu dad kulang kfulung, salu gamu dini, na gamu landè kaglabat,

⁵ salu gamu dini, du kmaan gamu i knaan na minum gamu i ninum i tafnatlagadan gamu.

⁶ Tnagakyu i kulang kfulungyu, du fye mlawil gamu, na lalòyu i dalan kaglabat.” Ani gman kfulung fagu di dad saligan.

⁷ Ku nngakam i to madoy, balingan ge fyà, na ku nngakam i to sasè, balingan ge fansasè.

⁸ Nang ge mngak i to madoy, du knangan ge, bay ku nngakam i to fulung, toon ge nafè.

⁹ Fngewem di to fulung, gatnù i kfulungan, tdoam di to matlu, gatnù i gnadean.

¹⁰ Du fye mbaling ge to nun kfulung, fye ku funa nun klikoam di Dwata. Du ku gmadè ge Dwata i Landè Salà, gfunam i kaglabat.

¹¹ Ku fulung ge faldam, én sa gamlawil ge.

¹² Du ku fulung ge faldam, ge gukel i kafye, bay ku knagolam i kfulung, ge gukel i kaflayam.

¹³ Guflingengu i to là fulung faldam di satu libun too mugak, na landè gnadean, na landè kyaan.

¹⁴ Déén gusudengan di bà takab i gumnean ku demen sudeng kenen di gugfan i banwe di gumite i dee dad to kenen,

¹⁵ na tamlo du nlakan i dad to magu mlius i dad to fadlug di kagula,

¹⁶ na manan di dad to landè kaglabat, manan, “Gamu dad kulang kfulung, fusuk gamu.

¹⁷ Too mi fa i yéél tnaku, na fye fa nem i knaan ku kmaan ge di gugbunin.” Ani gman i libun là fulung faldam.

¹⁸ Kabay i kdee mgeben di gumnean, làla gadè i gukella ku gfusuk ale déén, du dad muna mgeben tamati ale, na tasbool ale di gumnè i dad mati.