Dad Fngewe 7 - Blaan Sarangani

Knabasam i kfulung faldam

¹ Tingàgu, flinge ge i tdògu ge, na nangam nlifet i kafngewegu ge.

² Toom fkah di nawam fngewegu ge du fye mlawil ge, na toom fangeye i klaloam i dad tdògu ge, salngad i kafgeyem i dadmatam.

³ Toom fkah di fandamam, na di nawam i dad tdògu ge, du fye laam glifet dun.

⁴ Knabasam i kfulung, salngad i kakabasam i flanekam, na knabasam i kaglabat, salngad i kakabasam i demem sgalak,

⁵ du én kamlung ge di boyo i libun mlafà i yaanan, na gafadnan ge di kladal taluan.

Nang faloh i nawayu di ayè i libun mlafà i yaanan

⁶ Satu duh meye agu di bintanà i gumnègu.

⁷ Na teengu dee sawang lagi na kulang kfulungla, bay teengu satu di dale i landè kaglabatan.

⁸ Magu kenen di dalan mdadong di gumnè i satu libun, na là mlo mdadong kenen di gumnean.

⁹ Na i kagkah i duh, fan sdaf, na tafan kifu.

¹⁰ Na snitong i libun i lagi ani, na kamlaweh kenen i klaweh i libun mkat lagi, na tafandaman kiboan moyo kenen.

¹¹ Labè kenen na landè kyaan, na dee gal gusalun, na laan gal mnè di gumnean.

¹² Slaan déén kenen di kilil i dalan, slaan déén di fadyan di gunun dad to, fatanan du neyen ku simto bnoyon.

¹³ Na di kiten i lagi ani, lkafan, na nalakan, na too meye di kenen na manan,

¹⁴ “Duh ani tadnohògu i fakanggu, na nun utengu mdà di kadsùgu.

¹⁵ Taman fanngabalta ge, na du teenta ge taman smitong agu.

¹⁶ Na nlafingu i gumilègu i too fye baweh batak safut fdu di banwe Idyif.

¹⁷ Na tankokgu fangbun i gumilègu i dnagit mira, alo, na sinamon.

¹⁸ Taman magin ge deg du nimòta i knayèta i gaflehew gite kel mwal.

¹⁹ Là déén yaangu di gumnè, du mawag gusalun.

²⁰ Neben sa bong filakan, taman laan mlal samfulê, lwe linggu fa.” Ani gman i libun mlafà i yaanan.

²¹ Na tagboyon lagi ani fagu di kladal i dad gmanan.

²² Taman fanlalan lalò i libun ani, salngad i baka dyol salu di gumatin, salngad i uhe mfawel di fawel,

²³ na nun tbak di fufungan, salngad i anuk di bnas mayeng ditù di fawel, laan gadè i gukelan kadang di fati.

²⁴ Dad ngàgu, flinge gamu i tdògu gamu, na mimen gamu i mangu ani.

²⁵ Nangyu faloh i nawayu magin di ayè i libun gambet ani, na nang gamu mlalò i kenen dalan.

²⁶ Du tadee lagi falmon, na i dad lagi tamati du mdà di kenen, làyu gse dun du too dee.

²⁷ Na ku salu gamu di gumnean, én sa gusaluyu di banwe i dad mati, na i dalanyu ani salu di fati.