Dad Fngewe 6 - Blaan Sarangani

I uteng i dademe

¹ Tingàgu, ku makang ge na ge mayad uteng i demem to,

² neyem ken mfawel ge di kfakangam.

³ Tingàgu, ku tadéén ge di falel i demem to, ani nimoam, du fye galwà ge di kfakangam. Salu ge ditù di kenen na fdanaam i ktom, na toom fni di kenen ku began ge falwà di kfakangam di kenen.

⁴ Nang ge kudang balù ftud silang ku tagalwà ge.

⁵ Falwaam i ktom di fawel, gambet i kfulung i anuk falwà i kton di fawel, ku demen uhe, falwaan i kton du mila i to dmulak.

I to là mayè mimò

⁶ I to là mayè mimò, fye ku fafulung kenen faldam salngad i dad gulam, du too ale mimò.

⁷ Landè ulula mebe dale,

⁸ bay balù landè ulula, too ale musek i knaanla di bang i nun gumwèla, du tagàla di bang klandèla.

⁹ Kabay ge, i là mayè mimò, tan i klom kudang? Na kilen i kukatam?

¹⁰ Tmimel i to là mayè mimò manan, “E ftud agu na kudang agu fa là mlo.” Ani gman i to là mayè mimò.

¹¹ Kabay klon kudang makto kel di kenen klandean, salngad kakel i to tmaku mebe tek.

¹² I to sasè landè gukmamu, balù nè gusalun gal tmulen kéng.

¹³ Én gukmamun i dad matan, dad blian, na dad kmalan, falyakan du fye nun gafgawan.

¹⁴ Na too fnò sasè di nawan, du toon fandam i kiboan mimò sasè, na balù nè gusalun mebe kenen i ksamuk.

¹⁵ Na du ani nimoan, makto kel i too sasè gaslokan, na landè gugalwaan.

¹⁶ Nun nam too knang nawa Dwata, fitu kadì i knang nawan, na ani dunan,

¹⁷ i kafdatah, i ktulen kéng, i kbanò dad to landè salà,

¹⁸ i gal faldam kibò mimò sasè, i mlal mimò sasè,

¹⁹ i kdalam di salà, i mebe kasnang nawa i dad to sgalak.

Sasè gukel i to mlafà i yaanan

²⁰ Tingàgu, toom lalò i kafngewe maam, na nangam nlifet i tdò yéam.

²¹ Toom busek ani di fandamam, na toom busek di lam i nawam, du fye laam glifet kel di atuan.

²² I kafngewela i malak ge di dalan gumagum, na kamlung ge di kifu, na mngewe ge di mduh.

²³ Du i kafngewe ani, salngad i saloam tmuyal i dalanam, na i kngakla, tamdò ge i kiboam mebe i ktom.

²⁴ I kafngewela, kamlung ge di boyo i libun mkat lagi, na gafadnan ge di kladal talù yaan i demem to.

²⁵ Nang ku én kibalam i kafye bawehan, too ge fgeye i ktabugan ge fagu di keyen di ge.

²⁶ I libun mkat lagi, là mabtas i bayadam kenen, bay klafà i yaan, too bong i bayadam du gamgebe ge di gumalmom.

²⁷ Tan i fandamam, fakay ku lamkaf ge lifoh na là sakuf i klaweham?

²⁸ Na fakay ku mdà ge di minit bala, na là myu i bliam?

²⁹ Salngad gukelam ku nlafaam i yaanam, du balù simto mimò ani, là fakay ku là maflayam.

³⁰ Là mnang dad to i satu to tmaku i knaan, ku mdà di kbitilan.

³¹ Kabay knean, ku makfè kenen fuléan di to mangfun fitu dulê kalbongan, kel di kti i kdee nfunan.

³² Kabay mahal i satu to mlafà i yaanan, landè sa kaglabatan, na toon falmo i kton.

³³ Na i dengegan too malmo, na too kenen fatduk, na i bong kyaan là lana kel di atuan,

³⁴ du yaan i libun ani, too malbut du mingà nawan, na landè gusen i kbalasan.

³⁵ Là magwè i kalbutan balù tan i kalbong bayadam na blém kenen, laan dnawat dun.