Dad Fngewe 30 - Blaan Sarangani

I dad fngewe Agur

¹ Ani i dad fngewe Agur, i tingà Dyakeh fdu di banwe Masa, na talù kenen di ku Itil na Ukal, manan,

² “Deg sa i to landè gnadè, na landè kaglabat, là gambet dademe to.

³ Làgu lmen gambet du fye fulung, demen landè gnadègu gablà di Dwata i Landè Salà.

⁴ Nun kè to lmen magket salu di langit di gumnè Dwata, na samfulê dini fdu ditù? Nun kè to lmen samtifun i nus na nagotan di falelan? Nun kè to lmen mungas i klamang yéél na i klamang mahin di saulan? Nun kè to lmen mimò i klamang banwe na i dad gusablengla? Simto lmen mimò kdee ani, tan i dagitan na dagit i tingaan? Tulenam deg ku gadeam.

⁵ Kdee tnalù Dwata too glut, landè là glut, na kanlungan i kdee fikit di kenen.

⁶ Nang ge tamnù di tnaluan, du ku én nimoam nngakan ge na fgadean ge to tmulen kéng.”

⁷ Fakdogu di ge Dwata, di là agu fa mati, dnohoam di deg moon lwe ani.

⁸ Satu, tnabengam agu du fye là agu tmulen kakakéng, na i galwen, nangam blé di deg bong knun, na ku demen faloham di deg i klandè, tiam blé deg i gablà knaan di klit i duh,

⁹ du ku bong lukas i blém deg, ken mangu landè gukmamugu ge, demen ku landè agu, ken tmaku agu na gafalmogu dengeg Dwatagu.

¹⁰ Nangam tulen di satu amu i kdalamam i satu saligan, du ku ani nimoam, fanlagin ge, na ge baling maflayam.

¹¹ Nun dad to mlagi i màla, na là mlé kafye di yêla.

¹² Nun dad to flingu too ale mlaneb bay i kaglutan, di lam i nawala too ale magagsik.

¹³ Nun dad to fandamla too ale mdatah, na taman toola fdatah i ktola.

¹⁴ Nun dad to too ale mkut i dad to landè, na kdee sasè nimò nimòla di dad to landè, du fye gwèla i knunla.

¹⁵ Nun satu to too lom, na nun lwe ngaan libun, na galla man, “Banlém gami,” bay balù tan i blém, là gabsol dale, taman salngad ale di fat ani,

¹⁶ dunan banwe i dad mati, i libun là fakay mngà, i tanà là alì nulen, na lifoh fadlug smakuf na là fakay fnati.

¹⁷ I to madoy i maan, na too là mayè mimen i yéan, fye ku tnukè i dad anuk di bnas i dad matan, na i lawehan knaan i dad kablak.

¹⁸ Nun tlu tnikenggu, nun fat i làgu glabat,

¹⁹ kibò i kablak mayeng di langit, kibò i ulad fulu di tah i batu, kibò i kafal magu di talà mahin, na kibò i lagi kamdo i libun.

²⁰ Ani nimò i libun mlafà yaanan, di fandaman landè sasè nimoan, taman, manan, “Landè sa sasè nimògu.”

²¹ Nun tlu too sasè di fandam i dad to di tanà ani, nun fat i knangla,

²² i salig mbaling harì, i to là fulung faldam, i tanun kdee knayean knaan,

²³ i libun sasè ldam na landè kamdo kenen, bay gamwè yaan, na i libun alò salig mbaling amu di gumnè i amun.

²⁴ Nun fat too malnak dini di tah tanà, bay knean too ale fulung,

²⁵ i dad mamang balù too ale mlungay, knean santifunla i knaanla di bang nun gumwèla, du fatlagadla knaanla di bang i klandèla,

²⁶ i satu bung lmanaf dnagit kuni, too ale mlungay, knean gmagan ale mimò i gumnèla di gunun batu,

²⁷ i dad tlangas, balù landè malak dale, knean stadol ale mayeng,

²⁸ na i dad tikì balù fakay kanfè i kmalam, knean mnè ale di gumnè i dad harì.

²⁹ Nun tlu fye neye i kagula, du fulung ale magu, nun fat kadì,

³⁰ kagu i liyun labè di kdee lmanaf, na landè klikoan,

³¹ kagu i masel smagégél i tinefen, kagu i lagi kambing fdadong di libun kambing, na kagu i harì di muna i dad sundalun.

³² Ku lmenam fdatah, du là ge fulung faldam, demen tafandamam i kiboam mimò sasè, tanlagam ani na fandamam i gukel i dad nimò gambet ani.

³³ Ku mlo kanligongam gatas msut i tabè, na i ilung, ku snuntukam mlitè, salngad i klabè, ku ninitam mbaling nun samuk.