Dad Fngewe 27 - Blaan Sarangani

¹ Nang ge fdag gablà di nimoam fayah, du laam gadè ku tan fa kel di ge fayah.

² Fye ku nun dademe dad to dmayen ge, nang ku ge dmayen i ktom.

³ I batu na falak too blat bay blat fa i ksamuk i nimò i to là fulung faldam.

⁴ I kaflabè gafatduk nawa i to na gafalmo, bay i kingà nawa too fa sasè gafalmo.

⁵ Fye fa ku nngakam i satu to, du ku laam nngak ken man nawan landè kakabasam kenen.

⁶ Fye fa i katduk nawam fagu di demem sgalak, du fakay smalig kenen, di kafafye i to dmuen ge du ken fangawan ge.

⁷ I to bsol, balù tnab laan mayè, bay i to bitil balù féét i neman mbaling mi.

⁸ I anuk di bnas tatì alò mayeng na là samfulê di fulalan, salngad i to ku tatì alò lamngab na là mnè di gumnean.

⁹ Ku ungafam i fangbun, too ge lehew, na ku nun samuk, lana i ktanak nawam.

¹⁰ Nang tatì fbayà i demem sgalak na i deme i maam sgalak, na ku nun smamuk ge, nangam ftabeng i flanekam mawag di ge, fye fa ku ftabengam i demem saldan mdadong di ge di flanekam mawag di ge.

¹¹ Tingàgu, fye ku mbaling ge to fulung faldam, du fye lehew i nawagu, du ku ani nimoam gadègu tmimel i dad to madoy deg.

¹² I to fulung mebe i kton tagadean i samuk fan kel, taman funan niwas, bay i to kulang i kfulungan faldam laan niwas i samuk, tatì fadlug kel di kagdawatan i flayam bunge i nimoan.

¹³ Ku nun to makang kenen mayad uteng i to laan gadè, fye ku nleges kenen smandà i knunan kel di kagbayadan i utengan.

¹⁴ Ku nukatam i demem sgalak too flafus na too makto i taluam di kenen balù fye i manam, man nawan fanlagim kenen.

¹⁵ Là too fye fanlinge uni i yéél tatì fadlug tamdak, salngad ksasè fanlinge i libun ku tatì fadlug too mugak i yaanan.

¹⁶ Na là fakay fatlag i kugakan, salngad i nus là fakay fatlag, demen là fakay magot i fngalo di falelam.

¹⁷ I tek fakay néhê di tek, salngad i demem to du fakay gamu séhê fandam.

¹⁸ I to mifat i kayu nun bunge, gamkaan sa i bungen, na salngad i satu salig mifat i amun, du gamdawat sa bunge i nimoan.

¹⁹ I alung i satu to fakay teen di yéél, na fakay teen ku tan mnè di nawa i satu to fagu di galan nimò.

²⁰ Là bsol i fati na gumnè i dad mati, du gal fatan i dademe, salngad i to là bsol, du dee fa knibalan.

²¹ Tnilew i salafì na blawen fagu di lifoh, du neye ku too glut, na tnilew i kafye ldam i satu to fagu di kdayen kenen, du neye ku too glut fye i ldaman.

²² Balù fa fakay ndak di sung i to là fulung faldam, knean là magwè di kenen i klandè kfulungan.

²³ Toom nifat i dad lmanafam, nifatam mda di nawam,

²⁴ du nun gusen i knun, na balù i to nun glal nun gusen i glalan.

²⁵ Ani i nimoam, nligom i bnas na santifunam du fkaanam i dad lmanafam klom fatan di lê ktabò i bnas.

²⁶ Na i bul dad lmanaf bilibili, fakayam nimò klaweham, na i dad kambing fakay fabli na i gweam fakay bayadam tanà.

²⁷ Na i dademe dad kambingam gamlé gatas di ge na dad malayam, na balù dad saligam libun.