Dad Fngewe 26 - Blaan Sarangani

¹ Là gablà kel i bagyù di bang minit demen là gablaan moon mulen di bang kaktu, salngad i to là fulung faldam, là gablà dnayen kenen.

² Ku fanlagi i satu to i demen to na là glut i duenan mlagi kenen, landè gukel i kaflagin, salngad anuk di bnas ku landè gumleenan fadlug mayeng na landè gukelan.

³ Sankélam i kudà, na knakangam i donki, na fanlayamam i to là fulung faldam, du fye slame ale matdò.

⁴ Ku tnimelam i salek i to là fulung faldam fagu di klandè ldam, baling ge là fulung faldam.

⁵ Kabay fye ku tnimelam kenen di fye du fye gadean laan fulung fagu di ktimelam kenen.

⁶ I to mdek i to là fulung faldam ftulen i tulen, baling di kenen gukel i sasè, salngad i ksasè ku kanlangan i kenen blì.

⁷ I mabtas fngewe i man i to là fulung faldam, landè gukmamu dun, salngad i dad blì i to kimay.

⁸ I kdayenam i to là fulung faldam, landè gukmamu, salngad i fintik, landè gukmamu ku batangam baling i batun.

⁹ I mabtas fngewe man i to là fulung faldam, sadi landè btasan di kenen, salngad i to langal magot i sual, du sadi laan nagot dun.

¹⁰ I to gal fimò i balù simto to i là fulung faldam, fsamukan i kdee dad demen.

¹¹ I to là fulung faldam samfulê di kulang nimoan, salngad i ayem balù i utaan sanfuléan knaan.

¹² Fye fa i to là fulung faldam, di to i man nawan kenen too fulung.

¹³ I to là mayè mimò galan man, “Ku lamwà agu di gumnègu ken nun labè liyun magu di dalan, na ken kamfè deg,” ani balibadan du fye là mimò.

¹⁴ Gambet i takab magsayug na landè guflesan, salngad i to là mayè mimò tatì blaling di gumilean na landè gukelan.

¹⁵ I to là mayè mimò, balù fa smungit i knaan là mayè.

¹⁶ I to là mayè mimò, man nawan too kenen fulung fa di balù fitu lagi fulung tmimel.

¹⁷ I to flabet di ksugak i landè kenen labet nun gaslokan, salngad gaslok i satu to smabà klinge i ayem.

^18-19 I to mgaw i demen to, na kafnge én manan alò kenen sfuba, nun gusasean, salngad i to book agafan i tek gamfati.

²⁰ Landè gugadlug kdinè i lifoh ku landè dutungan, salngad i ksugak landè gugadlugan ku landè kalsalék.

²¹ Là mati bala lifoh ku nun using, na là mati kdinè lifoh ku nun dutungan, na là tlag i ksugak ku nun mayè sugak.

²² I kastugad salék, too kanbayan fanlinge i dad to, di dale salngad i knaan too fye neman na too fye nawala mlo dun.

²³ Ku nun man i satu to, na bay ise én mnè di nawan fangawan i demen to, salngad i to mimò tibud tanà fangawan i demen to, du di kimoan dun alò di lwà too fye baweh, bay di lam sasè i bawehan.

²⁴ I to flingu muni i nun knang nawan fagu di fye taluan, bay busekan di nawan i kafgawan demen to.

²⁵ Balù too fulung kenen talù, nang ge faglut di kenen, du too fnò i nawan i knang nawa.

²⁶ Fakay sa ku laan fdilè nun knang nawan, bay i dad sasè nimoan teen i kdee.

²⁷ I to mawel i demen to baling kenen mfawel i fawelan, na i to flulid i bong batu di demen to baling di kenen gumlulidan.

²⁸ I to tmulen kéng di demen to, du knangan nawa, én i gafatduk nawa i demen to, na i to too dmayen i demen to fagu di dee fye manan bay kadì là mdà di nawan, gafalmo kenen.