Dad Fngewe 23 - Blaan Sarangani

¹ Ku kmaan ge di saféd i mdatah to, toom fandam gablà di kton,

² na ku too ge tyan kmaan, dnanam i ayeam kmaan.

³ Nang ge too mibal di kafye nem i knaanan, du ken i knaanan ani i fawelan ge.

⁴ Fandamam funa, na nangam faflungay i ktom mngabal i bong knunam,

⁵ du i knun tatì lana di mata, salngad klana i kablak ku mayeng ditù di mdatah bulul.

⁶ Nang ge kmaan di saféd i to sasè ldam, demen nang ge too mibal kmaan i dad fye nem knaanan,

⁷ du kenen satu to gal faldam gablà di bong btas i knaanan. Manan di ge, “Kmaan na minum ge,” bay i manan ani là mdà di nawan.

⁸ Na ku gadeam i fandaman utaam i knaan fkaanan ge, na landè gukmamu i fye gmanam di kenen.

⁹ Là knabas i to là fulung faldam i kabtas i gmanam di kenen, taman nang ge tamdò kenen.

¹⁰ Nang mili ilè gusableng i tanà i kafkah di muna, na nang mlad i tanà i dad ilu,

¹¹ du Dwata i too mtulus, msen di dale na kamlung dale.

¹² Flinge ge i to tamdò ge, na toom dnawat di nawam i tdoan ge.

¹³ Nang ge gdè mlayam i tingaam, du laan mati ku sankélam di gugsalaan.

¹⁴ Kabay balingam kenen gafalwà di lanaw lifoh du tdoam fagu di kbadasam kenen.

¹⁵ Tingàgu, ku mbaling ge to fulung faldam, too lehew i nawagu.

¹⁶ Too lehew i nawagu flinge i glut i galam man.

¹⁷ Nang mibal nawam i knè i dad to gamsalà, bay balingam too kanlikò Dwata klom dini di tah tanà.

¹⁸ Ku ani nimoam, nun gufyem di satu duh, na gdohò i kafye i galam fatan.

¹⁹ Tingàgu, fanlingem agu, fafulung ge na mlalò ge i dalan matlu.

²⁰ Nang ge magin i dad to langal, demen i dad to too tyan kmaan,

²¹ du én gusen i dad langal na i dad tyan kmaan, dunan i klandèla, na ku tatì ge alò kudang du langal, én gukelam kadang alò kamlaweh i lwék.

²² Fanlingem i maam, du kenen mngà ge, na di ktua i yéam too ge mafè kenen.

²³ Toom fkah di nawam gambet i kaglut, kfulung, fye kafngewe, na kaglabat, na nangam fbayà bay toom knabas i kdee ani.

²⁴ I mà i to matlu nun bong klehewan, na i tingà fulung faldam too kanlehew i maan.

²⁵ Fye ku lehew i dad tuam gablà di ge, na fye ku lehew i yéam i mngà ge.

²⁶ Tingàgu, too ge flinge deg, na mlalò ge i deg nimò.

²⁷ Fawag ge di libun mkat lagi, na di libun mlafà yaanan, du salngad ale i fawel, na nun dalanla mawel ge.

²⁸ Dad libun gambet ani, salngad ale i dad to meye kfagu mlayam ge di dalanam, na dee dad lagi flafàla i yaanla.

^29-30 I to too minum i gamlangal, na gal meye i dee bung gamlangal too sasè i kagkahan, du too nun kliduan, gal smamuk, na gal mugak na i matan too fulè, na lamyalo kenen tamduk, na laan moon gaslok ani ku laan langal.

³¹ Na di kakokla i gamlangal di basu, nang ge meye balù tan i kafye bawehan na balù too fye i lyalo i to di kaflon dun, nangam ftabug i ktom,

³² du ku minum ge na langal ge, na di kwas i klangalam, lyalom too sasè, salngad ku nakét ge ulad i gamfati.

³³ Na ku minum ge, nun dee teenam sasè na gamlikò na tatì book i fandamam.

³⁴ Na lyom sadi déén ge di aweng di mahin too lamwek, na sadi déén ge di tah layal du too msayug.

³⁵ Na du mdà di kdee ani, manam, “Di fandamgu snuntukla agu, na bnunalla agu, bay làgu gafaldam i nimòla. Too agu mayè mukat, du fye mngabal agu i ninumgu.” Ani manam kadang ku én nimoam.