Dad Fngewe 21 - Blaan Sarangani

¹ Dwata malak fandam i harì, nalakan fagu di knayean, salngad kalakan i kaloh yéél.

² Kdee nimò i satu to di fandaman too fye, bay Dwata mukum ku tan i knayè nawa i to na i duenan mimò dun.

³ Mabtas fa di Dwata i kimò fye na matlu di nun dsuam di kenen.

⁴ I dad to sasè, én mebe dale i kafdatahla na i kafdagla, na ani i gafsalà dale.

⁵ I to funan too fanse faldam ku tan i fanan nimò nun bong untungan di nimoan, bay ku tatì kalyakan mimò, landè gwean.

⁶ I knun gwè fagu di klimbung tatì mlal lana na gamgebe i to di fati.

⁷ I dad to labè, malmo fagu di dale ksasè, du là ale sa mayè mimò i matlu nimò.

⁸ Là matlu i dalan gumlalò i dad to nun salà, bay i dalan gumlalò i dad to fye ldam, too matlu.

⁹ Fye fa ku i lagi nun yaan mnè di too tukay lawig di satnù di gumnè i yaanan mayè mugak.

¹⁰ I to sasè, toon knayè mimò sasè, na landè kakdon i demen to.

¹¹ Fagu di kaflayam i to madoy, én tamdò i to kulang i kfulungan faldam, na di katdò i to fulung faldam, too matnù i gnadean.

¹² Dwata Too Matlu, gadean i nimò i dad to sasè di lam i gumnèla, na kenen i falmo dale.

¹³ Ku nun to là flinge i kafakdo i dad to landè, di satu duh, ku kenen i fakdo landè flinge kenen.

¹⁴ Ku flabè i ganlal, magwè i kaflabean ku nun blé di kenen di gugbuni.

¹⁵ Too lehew i dad to matlu di fye kukum, bay di dad to sasè, too sasè i fandamla dun, du gafalmo dale.

¹⁶ I to talà mlalò i dalan kaglabat, én gukelan kadang di gumnè i dad mati.

¹⁷ I to too mayè mimò i knayean i alò gaflehew kenen, mbaling kenen to landè, na i to too mayè minum i dad gamlangal na kmaan i dad too mabtas knaan, laan mbaling to nun bong knun.

¹⁸ I dad to sasè, maflayam ale fagu di knayèla mimò sasè di dad to matlu, du magbalas di sasè nimòla.

¹⁹ Fye fa i lagi nun yaan mnè di banwe landè to, di satnù i yaanan sukaf nawan na too mayè mugak.

²⁰ Di gumnè i to fulung faldam nun mabtas kandeen na fye nem knaan, bay i to là fulung faldam, too mlal i kafalmon i kdee knunan.

²¹ Ku kamdo ge i demem to na mimò ge i matlu nimò, mlawil ge, matlu ge, na nafè ge i dad to.

²² I to fulung faldam, gmagan mlad i satu syudad nsen i dad to nun kgal, na gmagan lambà i mgal labat batu i snaligla glibut i syudad.

²³ I to là mayè gakuf di samuk, toon fangeye i manan.

²⁴ I to fdatah na fdag i kton, nadoyan i demen to, na taalì i kafdagan.

²⁵ I to là mayè mimò, too dee knibalan na én gamfati kenen, du là mayè mimò.

²⁶ Na i to là mayè mimò, tayud i duh aloan fandam i knibalan, bay i to matlu, fandaman i dademen to, du too kenen mayè mlé.

²⁷ I dsù blé i to sasè, knang Dwata, lumban ku blén fagu di sasè knayè i nawan.

²⁸ I to tmulen kéng di gususay, malmo kenen, bay i to fulung flinge na tmulen i kaglut, fanlinge i dad to i manan.

²⁹ I to matlu, nun ksaligan i kton kenen matlu, bay i to sasè, alò tatì flingu kenen matlu.

³⁰ Balù nun kfulung i to na nun kaglabatan na nun fye kafngewen, bay ku knang kenen Dwata, i kdee ani là gamtabeng kenen.

³¹ I to fakayan fnatlagad i dad kudà nebe di kasfati, bay Dwata sa alò mlé i katu.