Dad Fngewe 2 - Blaan Sarangani

I dad untung fagu di kfulung

¹ Tingàgu, flinge ge i tdògu ge, na nangam nlifet i kafngewegu ge.

² Flinge ge i gman i kfulung faldam, na toom fkah di nawam na fnaglabatam di fandamam.

³ Hae, toom fni i kfulungam mebe ktom, na fadlug ge mni i kaglabat.

⁴ Na toom fanngabal i kfulung faldam, salngad i kafngabalam salafì demen i knun buni.

⁵ Du ku nimoam ani glabatam i klikò di Dwata, na nun gnadeam gablà di kenen.

⁶ Du Dwata mlé kfulung faldam, na di kenen gumdà i gnadè na kaglabat.

⁷ Mlé kenen tabeng di dad to matlu, na kenen i klungla.

⁸ Hae, kenen kamlung i dad to mimò fye di demela to, na nalakan dad to i gsaligan di dalan gumagula.

⁹ Na ku alò ge flinge deg, glabatam kadang ku tan i fye, na di kdee nimoam di demem to too matlu.

¹⁰ Du mbaling ge to fulung faldam, na mdà di gnadeam nun klehewam.

¹¹ I kfulungam mebe ktom na i kaglabatam i kamlung ge,

¹² du fye gawag ge di nimò na di talù i dad to sasè.

¹³ Dad to én, tagakla i matlu na malwa dalan, na magu ale di gukmifun.

¹⁴ Na too ale lehew mimò sasè na di kagsalàla, too ale baling flehew.

¹⁵ Na dad to ani, bigkò i dalanla, na là ale gsalig.

¹⁶ Na i too glut kfulung ani, fadnan ge di boyo i libun mkat lagi.

¹⁷ I libun gambet ani, kahan i yaanan, na nlifetan i fakangan di Dwata di ksongla.

¹⁸ Na ku salu ge ditù di gumnean, én gumagum di dalan fati, na i ksalum ditù, salngad ku salu ge ditù di gumnè i dad mati.

¹⁹ Balù simto tlang di kenen, landè di dale gasfulê di fye knè.

²⁰ Taman tingàgu, toom lalò i ldam dad to matlu, na magu ge di matlu dalan.

²¹ Du i dad to matlu, ale sa gamdawat i kafye blé Dwata, na mlawil ale di tah tanà ani.

²² Kabay i dad to sasè, snabà Dwata mdà di tah tanà ani, na nsoan ale, gambet i ksò i dad bnas mdà di tanà.