Dad Fngewe 19 - Blaan Sarangani

¹ Fye fa i to ku landè na matlu nimoan, di to là fulung faldam na tmulen kéng.

² Là sa fye ku nun nimoam na laam gadè dun, demen ku fnaflalam mimò na baling ge gsalà.

³ Nun dad to falmola i ktola fagu di dad sasè nimòla, kafnge én, banléla salà Dwata.

⁴ I to nun knun, too dee demen sgalak, bay i to landè, tatì tnagak i demen sgalak.

⁵ Ku là glut i ktulen i to tmulen di gususay, fanlayam kenen, na là galwà i to tmulen kéng.

⁶ I kdee to too mngabal i kfagu gaflehew nawa i mdatah to, na kdee to mayè samgalak i to gal mlé.

⁷ Balù dad flanek i to landè là fduf kenen, labi fa kfawag i dad demen sgalak di kenen. Na balù toon fangal fakdo di dale, là ale fdadong di kenen.

⁸ I satu to ku fulung faldam magtabengan i kton, na ku toon fkah di nawan i kaglabatan nun gufyen.

⁹ Ku là glut i ktulen i to tmulen di gususay, fanlayam kenen, na malmo i to tmulen kéng.

¹⁰ I kafye knè là blà i to là fulung faldam, na i to salig, là gablà ku kenen mdek i amun.

¹¹ I to fulung faldam gadnanan i klabean, na ku nun gamsalà di kenen, ku tatian fbayà, na dnayen kenen i dad to.

¹² I kaflabè i harì gaflikò salngad i bong ngal i lmanaf liyun, bay i kakdon too fye salngad i ulen tatì sanfatan.

¹³ I tingà là fulung faldam, gafalmo i maan, na i libun too mugak i yaanan too sasè fanlinge, salngad uni yéél là tlag tamdak.

¹⁴ I to gamfun i gumnè na filak mdà di dad tuan, bay alò Dwata i gmagan mlé kenen i yaan fulung mebe i kton.

¹⁵ I to malwe mimò tatì fadlug kudang, na i gukelan bitil.

¹⁶ I to mimen dad flalò Dwata, mlawil kenen, bay i to mnang i flaloan, mati kenen.

¹⁷ I to kamdo i to landè, salngad ku mlé kenen di Dwata, na Dwata malas kenen.

¹⁸ Fanlayamam i tingaam di gugsalaan di muhad fa i nawan di klom fa fakay tamdò kenen, du ku laam nimò ani, baling ge sa tmabeng kenen falmo i kton.

¹⁹ Én nimoam di to mlal malbut tatiam fbayà, fye kenen tmimel ku tan i gukelan, du ku tnabengam kenen sulê, kamnalam kenen na là ge tlag tmabeng kenen.

²⁰ Flinge ge i fngewe na dnawatam i tdò ge, du fye kadang ge mbaling to fulung faldam.

²¹ Nun dee fala fandam i to ku tan i fanan nimò, bay knayè Dwata, én gdohò.

²² Kayè i to ku nun kamdo kenen landè gusenan, na fye fa i to ku landè knunan di to tmulen kakakéng.

²³ I to nun klikoan di Dwata mlawil kenen, na nun ktanak nawan na gawag kenen di ksasè.

²⁴ I to là mayè mimò, balù fa smungit i knaan là mayè.

²⁵ Là fakay ku là fanlayam i to madoy, du fye matdò i to kulang i kfulungan faldam, fye fulung kenen mebe i kton, bay i to nun kaglabat, balù alò nngak, matnù i kaglabatan.

²⁶ I tingà mimò sasè di maan na mdal i yéan di gumnean, too sasè na fyaan i dad tuan.

²⁷ Tingàgu, ku tanlagam i kagbetam, là mlo gasyat ge di tagadeam.

²⁸ I to tmulen kéng di gumusay tatìan nadoy i matlu, na i to sasè, too mayè mimò sasè.

²⁹ I to madoy, too fanlayam, na sankél i to là fulung faldam.