Dad Fngewe 18 - Blaan Sarangani

¹ I to ku én alò fandaman gufye i kenen kto, laan magin di balù tan i fye fandam i dademe.

² I to là fulung faldam, laan mayè gamlabat, bay aloan kayè fdag i gnadean.

³ Ku gamsalà i satu to, nun knang na kadoy kenen, na ku malmo dengeg i satu to, alò kyà samnagin kenen.

⁴ I dad gman i to fulung faldam gumwè i dademe kfulungla, na too mngalam gambet i mahin, na too fye gambet kaloh i yéél.

⁵ Là sa fye ku i to gal mukum msen di to nun salà, na là fakay ku laan banlé kagalwà i to landè salà.

⁶ I talù i to là fulung faldam, én gutambù i ksugak, na tatian mimò i tdukan.

⁷ I gafalmo i to là fulung faldam, dunan i dad galan gman, na mfawel sa mdà di kenen dad talù.

⁸ I kastugad salék too kanbayan fanlinge i dad to, di dale salngad knaan too fye i neman na too fye nawala mlo dun.

⁹ I to malwe mimò, salngad ksasè i to gal falmo.

¹⁰ Dwata salngad i bong mgal gumnè i gal gumila i dad to matlu, du fye giwas ale di sasè.

¹¹ I dad to nun knun, fandamla i knunla kamlung dale, salngad kaklung i bong mdatah labat batu glibut i syudad.

¹² I to fdatah, falmon i kton, bay i to fdanaan i kton, too mgafè.

¹³ I to là funa flinge klon tmimel, kenen i to là fulung faldam na nimoan i gumyaan.

¹⁴ I to fangalan i nawan di bang i nun fdasan, ani i dalanan tmabeng i kton, du fye mto, bay i to flungay i nawan di nun fdasan, landè imen nawan ku mto fa kenen.

¹⁵ I to nun kaglabat too mayè ku matnù i gnadean, na i to fulung faldam too flinge, du fye matnù i gnadean.

¹⁶ Ku mayè ge smite i satu bong to, mebe ge i blém kenen, fye mlal site.

¹⁷ I to muna talù di usay, fnaglutam glut i gmanan di là fa snalek i to demen susay.

¹⁸ Ku nun lwe mdatah to i masbalà di usay, na malima musay, fakay sulat i dagitla na kanligong, na simto dagit i muna lamwà, kenen mgalék i nun kaglut, na ani gmagan musay dale.

¹⁹ I flanekam tafatdukam i nawan, too malima samfulê di fye i nawan ge, na ku nugakam fa, én too gablabal di kasafyeyu.

²⁰ Ku tan gukel i kdee man i satu to, alò kenen sa tmimel dun.

²¹ I dad gman i satu to, én gafalwà i kton ku demen gafalmo i kton, taman là fakay ku laan tnimel ku tan gukel i dad manan.

²² I lagi ku tamite i fye yaan, teenan i kafye, du i kafye teenan tablé Dwata di kenen.

²³ Ku talù i to landè, too kenen fakdo talù, bay ku talù i to nun knun, too gamban i taluan.

²⁴ Nun dad dademe sgalak alò flingu nun kakdola, bay nun to samgalak i too kamdo i demen sgalak, mdatah fa di too flanekan.