Dad Fngewe 17 - Blaan Sarangani

¹ Fye fa ku kmaan ge balù tan i tukay gdè knaan, syan nun ktanak di gumneam, di kmaan ge di bong fista di gumnè i nun ksamuk.

² I salig fulung faldam, kenen kadang magot tingà i amun i landè gukmamu, na nun kadang alelan di knun tagak i amun di dad ngaan di kfatin.

³ I to tmilew i blawen na salafì di lifoh, bay Dwata tnandakan nawa i to.

⁴ I to sasè, bayan flinge i dad sasè talù, na i to tmulen kéng, bayan flinge i talù gafalmo.

⁵ I to madoy i dad to landè, salngad nadoyan Dwata i mimò dale, na i to lehew di sasè gaslok i demen to, nun kaflayaman.

⁶ I dad tua mdag i dad fùla, na salngad i dad ngà du mdag ale i dad tuala.

⁷ I kafye talù là blà di to là fulung faldam, lumban i ktulen kéng là fakay blà i ulu di dad to.

⁸ Én fandam i dademe to, ku mlé filak di gugbuni salngad i satu imò, du balù simto gumléla dun, gwèla i knayèla.

⁹ Ku mayè i to too kando i dad to, nlifetan i dad salàla di kenen, bay ku galan sansulit man i salà i demen to, én gaskah i dad sgalak.

¹⁰ I to nun kaglabat, too mlal tdò balù fa alò fagu di sulê kngak kenen, di to i là fulung faldam, balù fa tamaskél mlatu dulê.

¹¹ I to sasè gal mlét i dad to di banwe, taman nun ganlal i landè kakdo salu di kenen na bnalas i sasè nimoan.

¹² Fye fa ku gamsitong ge i labè lmanaf béar tnaku i dad ngaan, di gamsitong ge i to là fulung faldam, di kimoan sasè i landè gukmamu.

¹³ Ku sasè baling balasam i fye, too là tlag i sasè di gumneam.

¹⁴ I katbù i ksugak, salngad kaloh yéél matbe di ksangam dun, taman fanlalam tanlag di là fa tambù, du fye là mbaling bong.

¹⁵ I to gal mukum falwà i to gamsalà, du fye là maflayam, nafanlayaman i to landè salà, i nimoan ani slame knang Dwata.

¹⁶ I to là fulung faldam, là mayè fulung, taman landè lubay fagbet kenen, du tatì falmo filak.

¹⁷ I dad to sgalak, toola fite i kasakdola, na landè gukmamu i kasaflanek ku là ale stabeng di bang nun kaflayam.

¹⁸ I to kulang kaglabat, makang kenen mayad dad uteng i demen to.

¹⁹ I to mayè sugak, mayè gamsalà, na i to too fdag, mayè ku malmo.

²⁰ I to faldam sasè, landè fye fatanan, na i to talù sasè, sasè gukelan.

²¹ I tingà là fulung faldam, alò mlé klidù nawa i maan, na landè klehew i maan di tingaan là fulung faldam.

²² I klehew nawa, gafye i laweh, na i klidù nawa, gafsasè i laweh.

²³ I to sasè i gal mukum i usay dmawat filak di gugbuni, na msang i kaglut.

²⁴ I to nun kaglabat, kayean ku i kdee nimoan fagu di fye kfagu, bay i to là fulung faldam, sbalét i fandaman.

²⁵ I tingà là fulung faldam, mlé klidù nawa di maan, na mlé ksal di yéan i fsut kenen.

²⁶ Là sa fye ku fanlayam i to landè salà, na là sa fye ku fanlayam i to fye na mgafè.

²⁷ I to nun gnadè, toon funa fandam ku tan i manan, na i to nun kaglabat, là sukaf i nawan.

²⁸ Balù i to là fulung faldam ku tatì fanak na là talù, én fandam i dademe nun kfulungan na kaglabatan.