Dad Fngewe 16 - Blaan Sarangani

¹ Fakay sa di to ku funan fandam i fanan nimò, bay mdà sa di knayè Dwata ku dnohoan ku là.

² Kdee nimò i to fandaman too fye, bay Dwata i mukum i knayè nawa i to na i duenan mimò dun.

³ Saligam di Dwata i kdee nimoam na i kdee fandamam nimò, du fye gdohò.

⁴ Nun tafandam Dwata gufkelan i kdee mgimoan, na balù i dad to sasè nun gukella dunan i kalmola.

⁵ Too knang Dwata i kdee dad to fdatah, na i kaglutan, toon ale fanlayam.

⁶ Ku ge satu to too gsalig Dwata na nun kakdom kenen, nlifetan i salaam, na ku nun klikoam di Dwata niwasam i sasè.

⁷ Di kimò i to i nimò gaflehew Dwata, én i smafye kenen di dad to balù dad dmuen kenen.

⁸ Fye fa ku tukay knunam, syan fagu di matlu i kagweam dun, di bong knunam, bay gweam fagu di klimbung.

⁹ I to fakay faldam ku tan i fanan nimò, bay Dwata alò fakay malak kenen di kimoan dun.

¹⁰ I glal i harì mdà di Dwata, taman i kukuman mbaling matlu.

¹¹ Ani kayè Dwata di dad to fabli, ku là mlimbung i timbangla, na too matlu i kafablila.

¹² Knang i dad harì i sasè nimò, du én gutadag i kagotla i matlu nimò.

¹³ I dad harì mayè ale flinge i kaglut, na knabasla i to tmulen i kaglut.

¹⁴ I to fulung faldam, too fgal flehew i harì, du ku malbut i harì ken nun fafatin.

¹⁵ Kabay ku lehew i harì, mlé kenen i kafye di dad to gaflehew kenen, salngad i ulen mlé fye di dad fule.

¹⁶ Fye fa ku nun kfulungam faldam di nun blawenam, na fye fa ku nun kaglabatam di nun salafiam.

¹⁷ I to fye mlalò i dalan mawag di ksasè, na i to too fgeye ku tanè i gusalun, landè gaslokan.

¹⁸ I bunge i kafdatah na kafdag dunan kalmo.

¹⁹ Fye fa i to ku fdanaan i nawan na fadlug di klandean, di gakuf kenen di dad to fdatah na nun alelan di dad tnakula.

²⁰ I to too flinge i tdò kenen, nun gufyen, na nun kafye di to too smalig di Dwata.

²¹ I to fulung faldam dnagit to nun kaglabat, na i kafye taluan, én gmagan mebe i dad to.

²² I kfulung i to fulung faldam, én gafye na gatgal i nawan, bay i to là fulung faldam, landè gukmamu i katdò kenen.

²³ I to fulung faldam, too funa faldam di laan fa talù, taman i taluan too fnaglut i demen to.

²⁴ I fye talù, salngad i tnab too mi i neman, na gafye i laweh.

²⁵ Nun dalan fandam i to too matlu, bay i gusen i dalan ani di fati.

²⁶ I to mimò mdà di kbitilan too fgal mimò, du kayean gamkaan.

²⁷ I to sasè i landè gukmamu, galan neye i dalan kiboan fsasè i demen to, na i taluan too gafalmo, gambet i lifoh.

²⁸ I to sasè, gal mbel i kastulen, na i kalsalékan gamgimò samuk na samkah i dad to sgalak.

²⁹ I to labè, mgaw i demen sgalak, na malak kenen di sasè dalan.

³⁰ Fgeye ge i dad to flingu fye, fagu di kibòla meye di ge, du én dalanla fan mimò sasè.

³¹ I klawil, én untung i to matlu i nimoan, na i uben di wakan i gumgafean.

³² Fye fa i to là mlal malbut di to nun bong enegan, na fye fa i to gmagan damnan i kton di to magot i syudad.

³³ Fakay dee nimò i dad to, du fye gadèla knayè Dwata, bay Dwata alò fakay dmohò i gukelan.