Dad Fngewe 15 - Blaan Sarangani

¹ I mafganag timel gaflana i kaflabè, bay i makto timel i gafdinè dun.

² Ku nun man i to fulung faldam, too kayè i dademe ganbet, bay ku nun man i to là fulung faldam, landè gukmamu dun.

³ I kdee mgimò di klamang banwe teen Dwata, teenan i kdee nimoito balù fye ku demen sasè.

⁴ I fye talù gamlé klawil na ktanak nawa i dad to, bay i sasè talù gamlé tduk di nawa i dad to.

⁵ I to là fulung faldam là mayè flinge i tdò i maan, bay i to dmawat i kngak i maan, fiten i kfulungan mebe i kton.

⁶ I knun i to matlu là lana di kenen, bay i knun i to sasè tatì lana di kakel i kalima.

⁷ I kbel i gnadè fagu di to fulung faldam, ise ku fagu di to là fulung faldam.

⁸ I dsù blé i to sasè knang Dwata, bay i dasal i to matlu kanlehewan.

⁹ I nimò i to sasè knang Dwata, bay kanbongan nawa i to mimò i matlu.

¹⁰ Ku gasyat i to di fye dalan, too blat i kaflayaman, na mati i to ku laan dmawat i kngak kenen di gugsalaan.

¹¹ Du gadè Dwata i kdee gablà di gumnè i dad mati, lumban fa kgadean i kdee gablà di nawa i dad to.

¹² I to madoy là mayè ku nun mngak kenen, na là mayè mni fngewe di to fulung faldam.

¹³ I to lehew, teenam i klehewan di bawehan, bay i to mlidù, teenam i klidù nawan di bawehan.

¹⁴ I to nun kaglabatan mayè gambet, bay i to là fulung faldam fnò i nawan i klandè kfulungan.

¹⁵ I knè i to mdanà too malima, bay i to nun klehew, too lehew i knean.

¹⁶ Fye fa i to tukay knunan ku nun klikoan di Dwata, di to nun bong knunan i nun ksamuk.

¹⁷ Fye fa ku tatì ge alò kmaan i gulay dmeme i demem sakdo, di kmaan ge i too fye nem uten, bay nun kasnang nawa.

¹⁸ I to mlal malbut kenen gumdà i ksugak, bay i to là mlal malbut fakay smafye i dad to sugak.

¹⁹ I to là mayè mimò, balù tanè, nun dad sual gablabal i dalanan, bay i to matlu landè gablabal i dalanan.

²⁰ I tingà fulung faldam gaflehew i maan, bay i tingà là fulung faldam knangan i yéan.

²¹ I to landè kaglabatan toon sa kanlehew i sasè nimoan, bay i to nun kaglabatan, toon nimò i matlu nimò.

²² I tafandam i to là gdohò ku kulang i dad to mngewe, bay too gdohò fagu di dee dad to mngewe kenen.

²³ Lehew i to ku fye i ktimelan di bangan tmimel dun.

²⁴ I to fulung faldam, mlalò i dalan salu di nawa landè sen, là mlalò i dalan salu di fati.

²⁵ Lanbà Dwata i gumnè i to fdatah, bay nifatan i tanà i libun balu.

²⁶ Knang Dwata i fandam i dad to sasè, bay kanlehewan i talù dad to mlaneb i nawala.

²⁷ I to mlimbung fakufan sa i malayan di ksamuk, bay i to là dmawat i blé du fye msen di sasè, mlawil kenen.

²⁸ I to matlu funan too faldam di laan fa tmimel, bay i to sasè mlal timelan, bay sasè i manan.

²⁹ I dasal i to matlu too fanlinge Dwata, bay mawag Dwata di to sasè.

³⁰ Ku lehew i satu to, ge baling too lehew, na i fye tulen too gafgulê ge.

³¹ Ku flinge i satu to i kngak kenen, mbaling kenen satu di dad to fulung faldam.

³² Ku i to là mayè fatdò, fanlayaman i kton, bay ku fanlingen i kngak kenen, matnù i kfulungan.

³³ I klikò di Dwata, én gamlé di to i kfulung faldam, na silang nun mafè i to ku funan fdanà i kton.