Dad Fngewe 13 - Blaan Sarangani

¹ I tingà fulung faldam too mayè flinge i fngewe i maan, bay i tingà madoy too là flinge i kngak kenen.

² I to gamdawat i fye untung fagu di dad fye gmanan, bay i to gal mgaw, gamdawat i untungan fagu di toon kayè mimò samuk.

³ I to toon fangeye i dad manan, toon nifat i kton, bay i to talù laan funa fandam i manan, falmon i kton.

⁴ I to là mayè mimò, too dee knibalan, bay landè kiboan gamwè dun, bay i to too mayè mimò, gamwè balù tan i knayean.

⁵ I to matlu knangan i là glut, bay i to sasè, sasè na magagyà i nimoan.

⁶ I to matlu, én kamlung kenen i dad fye nimoan, bay i to gamsalà, én gafalmo kenen i dad sasè nimoan.

⁷ Nun dad to flingu nun knunla balù landè, bay nun dademe dad to flingu landè knunla, balù nun bong knunla.

⁸ I to nun knun, i knunan gafalwà kenen di agot dad sasè to mantak kenen, bay i to landè, landè to mantak kenen.

⁹ I dad to matlu, gambet i kalwa too fye knengan, bay i dad to sasè, gambet i salò mudaf i nengan du kagun mati.

¹⁰ I to fdatah i kton, landè dademe gukelan ku là samuk, bay i to flinge i fngewe, kenen fulung faldam.

¹¹ I knun gwè mdà di mlal kfagu, too mlal sa lana, bay i knun gwè fagu di tu, too lamnok.

¹² Ku nun fatanam na là gdohò, too gdanà i nawam, bay ku gdohò i knayè nawam, too ge lehew.

¹³ I to knangan flalò Dwata, én gafalmo kenen, bay i to mlalò i flaloan nun gufyen.

¹⁴ I dad tdò i dad fulung faldam gamtabeng ge, gambet yéél mdà di sfuten, na ku laloam, gafalwaan ge di ksasè i gamgebe ge di fati.

¹⁵ I to nun kaglabat too mgafè, bay i to là gsalig too malima gnagun.

¹⁶ I to fulung mebe i kton, funa faldam klon fa mimò, bay i to là fulung faldam, fiten di kdee i klandè kfulungan.

¹⁷ I to là gsalig dek ftulen i tulen, mlé sa i ksamuk, bay i to gsalig dek ftulen i tulen, én mlé ktanak.

¹⁸ I to là mayè flinge i fngewe kenen, kalima na kyà i mkel di kenen, bay i to flinge i kngak kenen, nafè i dad to.

¹⁹ Ku gdohò i knayè nawam, too ge lehew, na dad to là fulung faldam là mayè tmagak i sasè.

²⁰ I to sgalak i dad to fulung faldam, kenen mbaling fulung faldam, bay i to sgalak i dad to là fulung faldam nun kalmon.

²¹ I samuk samlalò i dad to gamsalà, bay i kafye, én samlalò i dad to matlu.

²² I to fye, nun knunan tnagakan di dad ngà i dad ngaan, bay i knun i to gamsalà, gfun i dad to matlu kadang di satu duh.

²³ I tanà magligo gamlé gablà knaan i dad to landè, bay dad to là matlu, làla faloh fafla.

²⁴ I to là mlayam i tingaan di gugsalaan du fye matdò, landè kakdon i tingaan, bay i to nun kakdon i tingaan, fanlayaman du fye matdò kenen.

²⁵ I dad to matlu, too gablà i knaanla, bay là tlag i kbitil i dad to sasè.