Dad Fngewe 12 - Blaan Sarangani

¹ I to mayè flinge i kngak kenen di gugsalaan maye gmadè, bay i to là mayè flinge i kngak kenen di gugsalaan laan fulung faldam.

² Kanlehew Dwata i to fye, bay i to falan fandam i sasè nimoan, nukum kenen Dwata.

³ I to sasè landè gutadagan du sasè nimoan, taman fugen, bay i to matlu nun gutadagan du fye nimoan, taman là kenen fugen.

⁴ Lehew na dag i satu lagi i yaanan fye ldam, bay ku nun libun gafyà i yaanan, salngad kenen i satu tduk di dad tulan i yaanan na gafalmo kenen.

⁵ I fandam i to matlu gablà di demen to too tlu, bay i to sasè malak i demen to fagu di kafgawan.

⁶ I talù i dad to sasè gafalmo i demen to, bay i talù i dad to matlu gafalwà i dad to fanla falmo.

⁷ I dad to sasè mati, na landè tnagakla bella, bay i dad bel i dad to matlu, landè gusenla.

⁸ I to fulung faldam magdayen, bay i to là matlu fandaman mgadoy.

⁹ Fye fa i to mdanà ku too malgad mimò du fye mto, di to baling tatì flingu kenen bong to, bay mnè kenen di kbitil.

¹⁰ I to matlu, too fye kifatan i dad lmanafan, bay i to sasè, too sasè kiboan i dad lmanafan.

¹¹ I to too malgad mimò fule nun lukas i knaanan, bay i to mlalò i dad nimò landè gukmamu, landè kaglabatan.

¹² I dad to sasè, én alò kayèla nimò i sasè, bay i dad to matlu, là mgili i kimòla fye.

¹³ I to sasè mfawel kenen fagu di sasè taluan, bay i to matlu galwà di ksamuk.

¹⁴ I to gamdawat i untung fagu di dad gmanan na i dad mgimoan.

¹⁵ I to là fulung faldam, fnaglutan slame fye i kdee nimoan, bay i to fulung faldam too flinge i fngewe.

¹⁶ I to là fulung faldam, laan gadnan i kaflabean, bay i to nun kaglabat, fbayaan i kafyà kenen.

¹⁷ I to tmulen i kaglut di gususay falwaan i kaglut, bay i to tmulen i là glut falwaan i kakakéng.

¹⁸ I to i là funa fandam i manan gamban salngad i kagban i fais, bay i to fulung faldam, i manan salngad i bulung du gafgulê.

¹⁹ I kakakéng là sa mlawil du nun gusenan, bay i kaglut mlawil landè gusenan.

²⁰ I to faldam mimò sasè, klimbung mnè di nawan, bay i to faldam mimò fye, klehew mnè di nawan.

²¹ Landè sasè mkel di to matlu, bay i to sasè gal nkel i samuk.

²² Too knang Dwata i dad to tmulen kakakéng, bay toon kanlehew i dad to tmulen i kaglut na dmohò i manla.

²³ I to fulung mebe i kton laan fdag i gnadean, bay i to là fulung faldam balingan fdilè i klandè gnadean fagu di taluan.

²⁴ I to malgad mimò, kenen mbaling to mebe i nimò, bay i to là mayè mimò, landè fye kel di kenen, bay mimò fagu di leges.

²⁵ I to gal nun ksamuk i nawan landè klehewan, bay fagu di too fye talù i demen to, mbaling matgal i nawan.

²⁶ I to matlu, kenen malak i dad demen sgalak di fye, bay i dalan i to sasè gafasyat dale.

²⁷ I to là mayè mimò, laan gwè i knayean, bay i to malgad mimò, nun kafye gwean.

²⁸ I matlu dalan salu di klawil, bay i bigkò dalan salu di fati.