Dad Fngewe 11 - Blaan Sarangani

¹ Knang Dwata i to mlimbung di ktimbangan, bay i gulehewan i to tmimbang i glut ktimbang.

² I to fdag, là mlo nun bong kyaan, bay i to fdanaan i kton nun kfulungan.

³ I katlu i to matlu, mebe kenen di katlun, bay i kabigkò i to sasè, mebe kenen di kalmon.

⁴ I dad knunam landè gukmamum di kakel i duh kfatim, bay i katlum, i gafalwà ge di sasè kfati.

⁵ I katlu i to fye, én gafye i knean, bay i ksasè i to sasè, én gafalmo kenen.

⁶ I katlu i to gsalig, i gafalwà kenen, bay i to là gsalig, tamgikat kenen di sasè knayean.

⁷ Di kfati i to sasè, talandè i kdee imen nawan di tah tanà ani, na i ksaligan di knunan landè gukelan.

⁸ I to matlu, galwà di samuk, bay én baling nkel i samuk i to sasè.

⁹ I gman i to là faglut di Dwata, én gafalmo i demen to, bay i kfulung i to matlu, én gafalwà i demen to.

¹⁰ Too kanlehew i dad to di banwe ku nun fye kel di dad to matlu, na toola kanlehew i kfati dad to sasè.

¹¹ Fagu di nimò i dad to matlu mbaling mdengeg i banwe, bay fagu di talù i dad to sasè malmo i banwe.

¹² I to madoy i demen to kulang kaglabatan, bay i to nun kaglabat landè manan.

¹³ I to samtugad salék, là gsalig gutmulen i santulenam di kenen, bay i to gsalig, là samtugad i santulenam di kenen.

¹⁴ Malmo i banwe ku landè to fulung mebe dun, bay ku nun dee fulung mebe na fulung mngewe, nun ktanak di banwe.

¹⁵ Nsalam kadang ku makang ge mayad uteng i to laam dilè, fye fa ku là ge makang di kenen.

¹⁶ I libun fye ldam, too mgafè, bay i lagi labè, landè mafè kenen, én aloan gwè i knun.

¹⁷ Ku kamdo ge i demem to, én gafye i ktom, bay ku fansaseam i demem to, fansaseam sa i ktom.

¹⁸ I sasè to, landè fye untungan, bay i matlu to, nun fye untung toon gdawat.

¹⁹ Mlawil i to ku too ndà di nawan mimò i tlu, bay i to too mayè mimò sasè, mlal mati.

²⁰ Knang Dwata i dad to sasè fandam, bay én toon kanlehew i dad to mimò matlu.

²¹ I kaglutan, là galwà i dad to sasè di kaflayam Dwata dale, bay i dad to matlu falwaan.

²² Balù tan kafye baweh i libun, bay ku landè kaglabatan i fye nimò, salngad kenen i tising blawen di ilung sdè.

²³ I to matlu, én fatanan alò i fye, bay i to sasè, én fatanan alò kalbut Dwata.

²⁴ I to too mlé, too matnù i knunan, bay i to là mayè mlé mbaling kenen landè.

²⁵ Nun gufye di to too mlé, du ku tnabengan i dad demen to na lêla kenen tnabeng.

²⁶ Mnang nawa dad to i satu to fatan di kagket i btas mse klon fafabli dun, bay dagla i to fadlug fabli.

²⁷ Ku too ge mngabal fye, nafè ge, bay ku mngabal ge sasè, sasè sa i teenam.

²⁸ I to smalig di knunan, sasè knean salngad i dad doon mlanas di bang minit, bay i to matlu, fye knean salngad i dad doon mbaling mlunu di bang ulen.

²⁹ I to mebe i ksamuk di malayan, di gusenan lana i knunan, na i to là fulung faldam, mbaling kenen fasak di to fulung faldam.

³⁰ I bunge i nimò i to matlu, én gamlawil i demen to, bay i klabè, én gafalmo dun.

³¹ I kaglutan, ku glut nun untung di mgimò i to matlu di tah tanà ani, lumban fa nun untung di mgimò i to sasè na i to gamsalà.