Dad Fngewe 1 - Blaan Sarangani

I kabtas i dad mabtas fngewe

¹ Na ani dad mabtas fngewe Solomon i tingà Dabid, na harì di banwe Israél.

² Sulatan i kdee ani, du tdoan i dad to, du fye gmadè ale i glut kfulung mdà di Dwata, na dnilèla i fye tdò, na glabatla i dad gal gman too mngalam gumtatekan,

³ du fye dnawatla na lalòla i gadèla fye, du fye matlu i nimòla di demela to,

⁴ du fye i dad to kulang i kfulung faldam là ale gasyat, gmadè na fulung i dad lamnok mebe i ktola di fye,

⁵ gafatnù di gnadè i dad to fulung faldam, na malak i dad to nun kaglabat,

⁶ du fye glabatla i dad gal gman too mngalam gumtatekan, na i dad fléd gal gman i dad to nun gnadè.

I kafngewe i dad lamnok lagi

⁷ Silang ge mbaling to nun gnadè, ku funa nun klikoam di Dwata. I dad to là fulung faldam knangla kfulung, na là ale mayè ku nun tamdò dale.

⁸ Tingàgu, toom lalò i kafngeweta ge, na nangam nlifet i tdò yéam.

⁹ Du ku laloam i tdòmi ge, matnù i kafye ldamam, salngad ku lamsak ge i dad fye baweh kas, na matnù i kafyebaweham.

^10-11 Tingàgu, nang ge magin dad to gamsalà di klakla ge, ku manla, “Flal ge, magin ge gami, meye ito to bnanoito, balù dad to landè salà meye ito dalan kiboito mlayam dale.

¹² Di kiteito i dad to ani kadang mto ale fa, bay di kafngeito mlayam dale mati ale.

¹³ Na teenito kadang dee bung knun, na too fnò i gumneito i tnakuito.

¹⁴ Na magin ge gami, na i kdee tnakuito kadang sansalelito.” Ani gman i dad to gamsalà.

¹⁵ Kabay tingàgu, nang ge magin dad to gambet ani, fawag ge di dale,

¹⁶ du too ale mlal mimò sasè, na mlal ale manò.

¹⁷ Neyem, ku nite i dad anuk i kimoam fawel, fulung ale fawag,

¹⁸ bay dad to gambet én mahal, du là ale fulung fawag di sasè nimò, bay baling dale taban i fawel nimòla na gafalmo dale.

¹⁹ Taman i dad to mwè i knun demela to, fagu di klabè, nun kalmola.

I katlo kfulung faldam i dad to kulang kfulung faldam

²⁰ I kfulung faldam flingen di satu to gal tamlo, na tamlo kenen di dalan di gunun dad to, na di fadyan du kayean ku lingela i tdoan.

²¹ Falbongan i taluan di gufusuk banwe, na balù nè gustifun dad to,

²² na manan, “Gamu dad kulang kfulung faldam, kan ku fadlug gamu di làyu kfulung? Gamu dad madoy, kilen i katlagyu madoy? Gamu dad là fulung faldam, tan i kloyu mnang i glut kfulung?

²³ Ku flinge gamu i kngakgu gamu, nun fye fngewegu gamu mdà di fandamgu, na fgadègu gamu i kfulunggu faldam.

²⁴ Kabay du knagolyu agu di katlogu gamu, na landè flinge deg di kalakgu,

²⁵ na fbayàyu i kafngewegu gamu, na làyu dnawat i kngakgu gamu,

²⁶ taman di kakel i bong kaflayamyu nulégu gamu, na di kakel i bong klikòyu nadoygu gamu.

^27-28 Na di kakel i too sè klikòyu, na too sè kaflayamyu, na too sè ksamuk mlibut di gamu, tloyu agu. Kabay di katloyu deg, là agu tmimel gamu, fanngabalyu agu, bay làyu agu teen.

²⁹ Du là gamu mayè gmadè i kaglut, na là gamu mayè mimen Dwata,

³⁰ na tooyu knang i kafngewegu gamu, na làyu dnawat i kngakgu gamu,

³¹ taman du én kayèyu lalò gamu knayè, là fakay ku là mulê di gamu bunge di ksasè nimòyu.

³² Du i dad to kulang kfulung, mlal ale mati, du là ale mayè fulung faldam, na i dad là fulung faldam, du làla knabas i kfulung, gamdawat ale kadang i kalmola.

³³ Kabay balù simto flinge di deg manak i knean, na galwà kenen kakel i sasè na landè gamlikò kenen.” Ani gman kfulung faldam.