نامَه تیتوسیرا 3 - کتاب مقدس به زبان تالشی شمالی

هر چاکَه کاری را حاضیر بِبییَه

¹ اَوون یادآوری بِکَه که حاکِمون و صاحبمَنصبون مطیع بِبون، و هَر چاکَه کاری را حاضیر بِبون،

² هیچکسی بَدی مَواجِن، دعوا مَکَرِن، آروم بِبون و گِردِ مردمی نه اَدبی نَه رفتار بِکَرِن.

³ چوم که اَمَه نی ایی زَمانی نادون بیمونه، نافرمون و گمراه بیمونه، همه جورَه هَواهَوسون و خوشیون نوکر بیمونه؛ و کینه و حسودی نَه زِندگی بَکَردیمون. مردم اَمَه کا بیزار بینَه و اَمَه نی یَندی کا.

⁴ امّا وختی چَمَه نجات دَهنده خِدا میهروونی، و چَیی محبت مردمی را آشکار آبَه،

⁵ اَ اَمَه نجات دوشَه. اِم نجات نِه چَمَه چاکَه کارونی واسی که صالِحی کا کَردَمون بَه، بَلکَم اِشتَن رَحمتی واسی، و اَ شوشتِه ای راه کا بَه که چَیی واسطه نَه روح القدوس اَمَه تولد تازه و تازه زندگی آدوعَشَه،

⁶ که خِدا، هَ مُقدسَ روح چَمَه نجات دَهنده عیسایِ مسیح واسطه نَه فَت و فراوون چَمَه سَری کا ویکَردِشه،

⁷ تا چَیی فیضی نَه، صالِح بِه حساب بایَم، و طبق اُمیدی که اَبَدی یَه زِندگی را هِستِمونه، وارِثون بِبییَم.

⁸ بَبی اِم گَفی اِعتماد کَردِه. و تِکا پیستِمَه که اِم چییون را اِصرار بِداری، تا کسونی که خِدا ایمان وَردَشونه، هَواسِشون جمع بِبو که اِشتَن وقف چاکَ کاروون بِکَرِن. اِم چیی اِن مردمی را چاک و فایدَه داری نَه.

⁹ ولی جَنگ و دعوا اونی کا که نادونی کا یَه، شجَره نومچه اون و اِختلافون و دعوا مُرافه اونی کا که شریعتی دربارَه یَه دوری بِکَه، چوم اِمِن بی فایده و بی اِرزِشی نَه.

¹⁰ اَ کسی درباره که جِدایی دَرَفنِه، ایی کَرَه و دومله دِ کَرَه اَیی اِخطار بِدَه، و چَیی پَش دِ اَیینه قطع رابطه بِکَه.

¹¹ چوم که بَزنیش اِنتَه رَه آدَمی فاسِد آبییَه و گناه کارَه. اَ اِشتَن، اِشتَن محکوم بَکَردی.

آخِرین نَصیحتِن و سَلامِن

¹² هَتَه که آرتِماس یا تیخیکوسی ویسا آکَرِم اِشتِه وَر، تا بَشای تَقّلا بِکَه تا بای چِمِن وَر نیکوپولیسی شهری را، چوم تصمیم گِتَمَه که زوموستون اوآکا بومونِم.

¹³ تا اوآ که بَشای، وکیل زیناس و آپولُسی چَوون سفری کا کمک بِکَه، اِشتِه هَواس جمع بِبو تا کم و کسری مَدارِن.

¹⁴ بِدا چَمَه مردم باموجِن اِشتَن، اِحتیاجاتی برطرف کَردِه واسی چاکَ کارون را وَقف بِکَرن و بی‌ ثمر مَبون.

¹⁵ گِردِ کسونی که مِنه اینه، بَه تِرا سلام دارِن. کسونی را که ایمانی کا اَمَه نَه خِشی نَه، سلام آرِساوون. فیض شِمَه گِردی نَه بِبو.