نامَه تیتوسیرا 2 - کتاب مقدس به زبان تالشی شمالی

دُرستَ تعلیمی آموتِه

¹ امّا تِه اَ چیی که مطابق دُرستَ تعلیمَه باموج.

² پیرَه مِردَکون هَواس جَمع بِبو، باوَقار بِبون، اِشتَن پیشی بِگِرِن و ایمان و محبت و پابَرجایی کا، دُرست رفتار بِکَرِن.

³ پیرَه ژِنَکِن نی بَسی اِشتَن حُرمتی بِدارِن، اِفتِرا مَژَنِن، وِرَه شَراو هَری بَردَه مَبون، اَوِن بَسی هَر چیی که چاکَه تعلیم بِدَن،

⁴ تا جَوونَ ژِنَکون باموجِن که شو دوست و خِردَن دوست بِبون

⁵ اِشتَن پیشی بِگِرِن و پاک بِبون، کدبانو، میهرَوون و اِشتَن شو مطیع بِبون، تا خِدا کلامی نَه بَد واتَه مَبو.

⁶ هِنتَه نی، جَوونَ مِردَکون نی اِصرار بِکَه تا اِشتَن پیشی بِگِرِن.

⁷ تِه اِشتَن، گِردِ چیون کا چاک کارون را ایلَه سَرمشق بِبَش. اِشتِه تعلیمی کا صاف و صادق و باوقار بِبَش،

⁸ و جوری دُرست گف بِژَن که کسی مَشا عیبی چَیی سَر بِنَن، تا وختی که مخالِفِن مَشان اَمَه کا بَدی بِوینِن و شَرمنده بِبون.

⁹ نوکرون تشویق بِکَه که هَر چیی کا اِشتَن اَربابون مطیع بِبون، بی اِمکه اَوون نَه زَوون بِه زَوون بِبون و اَوون راضی غَم بَرِن،

¹⁰ دِزدی مَکَرِن، بَلکَم اِشتَن چاکَه ایمانی تمام کمال نیشون بِدَن تا هَر چیی کا چَمَه نجات دَهنده خِدا تعلیمی خوشگیلی، چاک نیشون بِدَن.

¹¹ چوم خِدا فیض آشکار آبییَه، اَ فیضی که گِردِ مردمی نجات بَدای،

¹² و بَمون آموجِه که بی‌دینی و دنیایی یَه هَواهَوسون وِل آکَرَم، چَمَه پیشی بِگِرَم و صالحی و دینداری نَه اِم دورَه کا زِندگی بِکَرَم،

¹³ و چَمَه اَ مِوارکَه اُمیدی مُنتظِر بومونَم، یعنی چَمَه خِدای عظیم و چَمَه نجات دَهنده عیسایِ مسیح جلالی آشکار آبییِه،

¹⁴ که اِشتَن جانی چَمَه راه کا آدوشَه، تا هَر شِرارتی کا اَمَه رهایی بِدَه و اِشتَرا پاکَه مردمی وَج آکَرِه که چَیی اِشتَن شِن بِبون که چاک کارون را غِیرت بِدارِن.

¹⁵ اِم چییون اِعلام بِکَه؛ و تَمون اِقتداری نَه تشویق و توبیخ بِکَه. و مَرزِن کسی تِه ندیدَه بِگِرِه.