نامَه تیتوسیرا 1 - کتاب مقدس به زبان تالشی شمالی

¹ پولُسی طرفی کا، خِدا نوکر و عیسایِ مسیح رسول، که تعیین بیمَه تا خِدا اِنتخاب بییَه اون ایمانی تقویت بِکَرِم و اَ حقیقتی که دینداری نَه مطابقَه بوآجِم،

² اِم حقیقت اَبَدی یَه زِندگی اُمیدی نَه یَه که خِدایی که دوروع نِواجِه، صِفتَه نَه چَیی وَعده اَمَه دوشَه

³ و مناسبَ وختی کا اَ وَعده آشکار آبَه، اَ کلامی نَه که چَیی اِعلام چَمَه نِجات​دهندۀ خِدا حُکمی نَه، بَه مِن دَسپَرده بَه.

⁴ تیتوسی را، که طِبق ایمانی که چَمَه گِردی نصیب بَه، چِمِن حقیقی یَه خِردَن: فیض و صُلح و سلامتی خِدای دَده طرفی کا و چَمَه نجات​دهندۀ مسیح عیسی طرفی کا بَه تِه را با.

مشایخون صِفَتِن

⁵ اِمی واسی تِه نومَه کْرِتی جَزیرَه دیلَه کا تا نصف نیمَه کارون سَر و سامون بِدَی و هَتَه که تِه نَه واتِمَه، هَر شهری کا شیخونی اِنتخاب بِکَری.

⁶ کلیسا شیخی زندگی کا نَبی چیی بِبو که چَیی واسی سرکوفت بَرِه، و ایلَه ژِنی شو بِبو و چَیی خِردَنِن با ایمان بِبون تا کسی مَشا اَوون هَرزگی و نافرمونی را متهم بِکَرِه.

⁷ چوم که ایلَه ناظر که خِدا مُباشِرَه، چَیی زندگی کا نَبی چیی بِبو که چَیی واسی سرکوفت بَرِه. اَ نَبی مغرور بِبو یا تِند اَخلاق یا عَرقَ هَر بِبو یا زورگو بِبو یا پولی را حرص بِژَنِه،

⁸ بَلکَم میهمون نواز بِبو، چاکی کَردِه نَه خِش بِبو، اِشتَن پیشی بِگِرِه، درستکار و مقدّس بِبو و منظم بِبو؛

⁹ اَ بَسی محکم دَچیکِه اَ قابل اعتمادَه کلامی که آموتَشَه، تا بِشا دُرستَ تعلیم باموجِه و کسونی که اِم تعلیمی ضِدی نه نی، توبیخ بِکَرِه.

¹⁰ چوم یاغی اِن، مِفتَه گَف ژَنِن و حُقّه بازِن وِری نَه، مخصوصاً کسونی که خَتنه بییَه را اِصرار دارِن،

¹¹ چَوون گَ بَسی دَوَسی، چوم که اَوِن گِردِ خانواده اون پاشونِن، و ناحَقَ سودی واسی اَ چییونی تعلیم بَداین که نَبی تعلیم بِدَن.

¹² چَوون ایلَه پِیغمبرون کا واتَشه: «کْرِتی مردم گِرد دروعَه واجی نَه، شَرورَه وحشی یَه حَیوون و اِشکم پَرَست و تنبلی نَه.»

¹³ اِم شهادتی راستَه. بَس اَوون بَرک توبیخ بِکَه تا ایمانی کا دُرست بِبون.

¹⁴ یهودی داستانون و چَوون حُکمون که حقیقتی کا دوری نَه،گوش مَدَن.

¹⁵ پاکَ آدَمون را گِردِ چییِن پاکی نَه، امّا کسونی را که نِجسی نَه و بی‌ ایمان، هیچ چی پاک نییَه، بَلکَم هَم چَوون فیکر نِجِسَه و هَم چَوون وِجدان.

¹⁶ اَوِن اِدعا بَکَردین که خِدا آزونِن، امّا اِشتَن کارون نَه اَیی هاشا بَکَردین. اَوِن نِفرت اَنگیز و نافرمونی نَه، و هَر چاکه کاری را ناجوری نَه.