رومی کلیسارا نامه 9 - کتاب مقدس به زبان تالشی شمالیخِدا اِنتخاب بییَه قوم 1 از مَسیح کا راست بَواتیم، دوروع نِواجِم، و چِمِن وجدان روح القدسی واسطه نَه چِمِن شاهدَه 2 که چِمِن دیلی کا ایلَه یالَ غَمی هِستِمَه و هَمَش غورصَه هِستِمَه. 3 چوم که کَشکی از چِمِن بِرااون راه دیلَه کا، کَسونی که مِنه همنِژادی نَه، لعنت بِبوم و مسیح کا جِدا آبوم. 4 اَوِن اِسرائیلی اینه، فرزند خوندَگی، جَلال، عَهدِن، شریعت اَوون آدوعَه بییَه، پرستش و وَعده اِن، اِمِن گِرد چَوون شِنی نه، 5 و جَدِن نی چَوون شِنی اینه، و مسیح نی از لحاظ جِسم چَوون نَسلی کایَه، خِدایی که گِردی کا کفاتَرَه، اَیی تا اَبَد شُکر بِبو. آمین. 6 ولی منظور اِم نییَه که خِدا کلام اَنجام بَه نییَه، چوم گِردِ کسونی که قوم اِسرائیلی کا اینه، حَقیقتن اِسرائیلی نینَه؛ 7 و گِردِ کسونی که اِبراهیمی نسلی کا اینه، چَیی خِردَنِن حساب نِبون. بَلکَم توراتی کا نیویشته بییَه که: «اِشتِه نَسل اِسحاقی کا حساب بَبی.» 8 یعنی خِردَنِنی که طبق جِسم دنیا اومَه اینه خِدا خِردَنِن نینَه، بَلکَم اِبراهیمی نَسل وَعدَه خِردَنِن حساب بَبین. 9 چوم اَ چیی که اَ وعده واتِشه اِم بَه که: «سال دیگه هِم موقع آگَردِم و سارا ایلَه زوعَه صاحاب بَبی.» 10 نِه فقط اِم، بَلکَم رِبکا خِردَنِن نی ایی نفری کا، یعنی چَمَه جَدّ، اِسحاقی کا بینَه. 11 هَر چَن پیش اَز اِم که اَوِن دنیا بان، و چاکَه کار یا بَدَه کار اَنجام بِدَن- اِمی واسی که خِدا هدف اِشتَنِش اِنتخابی کا پابَرجا بومونِه، نِه کارون واسی، بَلکَم چَیی واسطه نَه که دعوت بَکَردی- 12 رِبِکا نَه واتَه بَه که: «یالتَر، روکتَری خِدمت بَکَردی.» 13 هَتَه که مَلاکی پیغمبری کِیتابی کا نیویشتَه بییَه: «یعقوبی نَه خِش بیمَه، امّا عیسو کا بیزار بیمَه.» 14 بَس اَمَه چِه بوآجَم؟ بوآجَم خِدا بی اِنصافه؟ هَرگز! 15 چوم که موسی نَه بَواتی: «رَحم بَکَردیم هَر کسی که بَیی رَحم هِستِمَه؛ و دیلسوزی بَکَردیم هَر کسی را که چِمِن دیل بَسیستی.» 16 بَس ربطی بِه آدَمی پیسته یا چَیی تقّلا کَردِه نِدارِه؛ بَلکَم بِه خِدایی ربط دارِه که رَحم بَکَردی. 17 چوم توراتی کِیتابی کا، خِدا فرعونی نَه بَواتی: «از اِم هدفی واسی تِه بِه قدرت آرِساووندِمَه تا چِمِن قدرتی تِه کا آشکار آکَرِم، و تا چِمِن نوم گِردِ دنیا کا اِعلام بِبو.» 18 بَس خِدا هَر کسی که پیستِشَه رَحم بَکَردی و هَر کسی که پیستِشَه دیل سِنگ بَکَردی. 19 دومله مِنه بَواتیش: «بَس دِ چیرا اَمَه سَرکوفت بَژَی؟ چوم کی بَشای خِدا اِراده پیشی کا بومونِه؟» 20 امّا اِی آدَم، تِه کییش که خِدا نَه جَر و بَحث بِکَری؟ «مَگم مخلوق بَشای اِشتَن خالِقی نَه بوآجِه چیرا مِن اِنتَه وَج آکَردَرَه؟» 21 مَگم نِرَه ساج اِختیار نیشَه که ایی گولَه تِوِلی کا، ایلَه قَبی وَج آکَرِه مهمه کارون را و ایلَه قَبی نی وَج آکَرِه اَ کارونی را که مهم نینَه؟ 22 چِه بَبی واتِه با اِمکه خِدا پیستِشَه اِشتَن غَضبی نیشون بِدَه و اِشتَن قدرتی نیشون بِدَه، قَبونی که چَوون را غَضب کَرَدَشه و هَلاکتی را آمادَه آبَیینه بَرکَ صبری نَه تحمل بِکَرِه، 23 تا بِشا اِشتَن جلالی عظمتی، قَبونی را که رَحم کَردَشه نمایان بِکَرِه، قَبونی که اَوون پیشتری جَلالی را آمادَه آکَردَشَه- 24 حتی اَمَه نی که چَیی طرفی نَه دَعوت بَییمونه، دربَر بَگتی نِه فقط یهودیون کا، بَلکَم غیر یهودیون کا نی هَتَه. 25 هَتَه که هوشَع پیغمبر بَواتی: «اَوونی که چِمِن قوم نِبینَه، ’چِمِن قوم‘ دَخونِم، و اَ کسی که چِمِن عزیز نِبَه، ’چِمِن عزیز‘ دَخونِم.» 26 «و اَ جِگایی کا که اَوون نَه واتَه بَه: ”شِمَه چِمِن قوم نیرونه“، اوآکا ’خِدای زِنده زوعَه اون‘ دَخوندَه بَبین.» 27 و اِشَعیای پِیغمبر قوم اِسرائیلی درباره بَواتی که: «حتی اَگم قوم اِسرائیلی تعداد، دریا فورشی قَدَر بِبو، فقط روکَته اَوون کا نجات پیدا بَکَردین. 28 چوم خِداوند اِشتَن کلامی تمام کمال و بیدون مَعطلی زمینی کا اَنجام بَدای.» 29 و هَتَه که اِشَعیای پِیغمبر پیشگویی کَردَشه: «اَگم قُشونون خِداوند، اَمَه را نَسلی باقی مَنَی، اَمَه نی سُدوم و عَمورَه شهرون شیوار بَبیمون.» قوم اِسرائیلی بی ایمانی 30 بَس چِه بوآجَم؟ غیریهودیونی که صالِحی دومله نِبینَه، اَیی بِه دَس وَردِشونه، یعنی اَ صالِحی که ایمانی نَه بِه دَس بومَی؛ 31 امّا قوم اِسرائیل که اَ شریعتی دومله بینَه که اَوون بِه صالح بییِه آرِساوونی، اَیی بِه دَس نِوَردِشونه. 32 چیرا؟ چوم که نِه ایمانی نَه، بَلکَم اَعمالی نَه چَیی دومله بینَه. اَ ’سِنگی که لغزش بَدای‘ باعیث بَه که اَوِن بَلَکِن. 33 هَتَه که اِشعَیای پِیغمبری کیتابی کا نیویشته بییَه که: «دَیِس، صَهیونی کا ایلَه سِنگی بَنایم که لغزشی باعیث بِبو، و صَخره‌ای که بَلکِه باعیث بِبو؛ و هَر کسی که اَیی ایمان بواَرِه، خِجِل نییَب.» |
@ 2024 Korpu Company