رومی کلیسارا نامه 7 - کتاب مقدس به زبان تالشی شمالیشریعتی کا آزاد آبییِه 1 اِی بِرااِن، مَگم نیمَزنه- چوم کَسونی نَه گَف ژَنِم که شریعتی بَزنین- فقط تا وختی که آدَم زِنده یَه شریعت چَیی سَر حُکم بَکَردی؟ 2 چوم که طبق شریعت، شو دارَه ژِنَک تا وختی که چَیی شو زِندَه یَه، چَیی وابَسته یَه. امّا اَگم چَیی شو بِمِرِه، اَ ژِن شرعَن اَیی کا آزاد بَبی. 3 بَس اَگم اَ موقعی که چَیی شو زِندَه یَه، ایلَه دییَر مِردَکی نَه بِبو، زِناکارَه. امّا اَگم چَیی شو بِمِرِه، اِم شریعتی کا آزادَه، و اَگم ایلَه دییَر مِردَکی نَه عروسی بِکَرِه، زِناکار نییَه. 4 اِنتَه نی، اِی چِمِن بِرااِن، شِمَه نی مسیح بَدَنی واسِطه نَه، شریعتی کا مَردیرونه تا ایی نفر دییَری نَه وَصلت بِکَرَه، یعنی اَیینه که مَردَه اون دیلَه کا زِنده آبَه، تا خِدا را ثمر بواَرَم. 5 چوم اَ موقعی که اَمَه جِسمی دیلَه کا زندگی بَکَردیمون، چَمَه هَوا هَوَس که گناه نه پُور بَه، که شریعت اَوون دَس بَگتی، چَمَه اَعضا دیلَه کا کار بَکَردی تا مرگی را ثمر بواَرَم. 6 امّا حِسَه، اَمَه شریعتی کا آزاد آبَیمونه و اَ چیی واسی که چَیی گیریفتار بیمونه مَردیمونه، تا روح القدوسی نَه ایلَه تازه راه دیلَه کا خدمت بِکَرَم، نِه کَنه راه نَه، که فقط ایلَه نیویشته ای یَه. شریعت و گناه 7 بَس چِه بوآجَم؟ مَگم شریعت گناه یَه؟ اَصلا! با اِم حال اَگم شریعت مَبی، نیمَزنیمون که گناه چَه. چوم که اَگم شریعت واتَش نِبَه «طَمع مَکَه»، نیمَزنیمون که طَمع کَردِه چَه. 8 امّا گناه، شریعتی اِم حکمی واسطه نَه ایلَه فرصتی تِلَفتِشه تا هَر جوره طَمعی بَه مِن کا بِه وجود بواَرِه. چوم شریعتی کا سیوا، گناه مَردَه یَه. 9 اَز ایی موقع ای شریعتْی کا سیوا زِنده بیمَه؛ امّا وختی شریعتی حُکم اومَه، گناه زِنده آبَه و اَز مَردیمَه. 10 هَ حُکمی که زِندگی وَعدَه دوعَش بَه، چِمِن مرگی باعیث بَه. 11 چوم گناه، شریعتی حُکمی واسطه نَه فرصت تِلَفتِشه، مِن گول ژَندِشَه و چَیی واسطه نَه مِن کِشتِشه. 12 بَس، شریعتْ مقدّسَه و شریعتی حُکم نی مقدّس، دُرست و چاک. 13 بَس مَگم اَ چیی که چاک بَه، بَه مِرا مرگی باعث بَه؟ هَرگز! بَلکَم گناه اَ چیی واسطه نَه که چاک بَه، مَرگی چِمِن دیلَه کا بِه وجود وَردِشه تا اِنتَه معلوم بِبو که گناه، گناه یَه، و شریعتی حُکمی واسطه نَه معلوم بِبو که گناه پلیدی چَدَه بی حد و اندازَه یَه. 14 چوم اَمَه بَزنیمون که شریعت روحانی یَه، امّا اَز جِسمانی یَه اِنسانیمَه و ایلَه بَردَه ای شیوار خِرَته بَییمَه بِه گِناه. 15 چیرا که اَز نیمَزنِم دِ چِه بَکَردیم. چوم اَ چیی که پیستِمَه اَنجام نِدَم، بَلکَم اَ چیی که اَیی کا بیزارمَه، اَنجام بَدایم. 16 امّا اَگم اَ چیی که نِپیستِمَه، اَنجام بَدایم، بَس قبول بَکَردیم که شریعت چاکَه. 17 بَس اِنتَه، دِ اَز نیمَه که اَ کاری بَکَردیم، بَلکَم اَ گناهی یَه که چِمِن دیلَه کایَه. 18 چوم بَزنیم که چِمِن دیلَه کا، یعنی چِمِن جِسمی دیلَه کا، هیچ چاکَ چیی نییَه. چوم پیستِمَه اَ چیی که دُرستَه اَنجام بِدَم، امّا نیمَشام اَیی اَنجام بِدَم. 19 چوم اَ چاکَ کاری که پیستِمَه، اَنجام نِدَم، بَلکَم اَ بَده کاری که نِپیستِمَه، هِی اَنجام بَدایم. 20 حِسَه اَگم کاری بَکَردیم که نِپیستِمَه اَنجام بِدَم، دِ اَز نیمَه که اَ کاری بَکَردیم، بَلکَم اَ گناهی یَه که چِمِن دیلَه کا مَندَه. 21 بَس اِم قانونی فَهمِم که وختی پیستِمَه چاکی بِکَرِم، بَدی، چِمِن دَم دَس نوعَه. 22 چوم اَز چِمِن باطنی دیلَه کا خِدا شریعتی کا کیف بَکَردیم، 23 امّا ایلَه دییَر قانونی چِمِن اَعضا کا بَویندیم که اَ شریعتی نَه که چِمِن عقل اَیی قبول بَکَردی، دعوا دارِه و مِن گناه شریعتی اَسیر بَکَردی که چِمِن اَعضا دیلَه کایَه. 24 آخ که از چِه سیاه بَخته آدَمی ایمَه! کییَه که مِن اِم مَردَه بَدنی کا آزاد آکَرِه؟ 25 خِدا را شُکر- چَمَه خِداوند عیسایِ مسیح واسطه نَه! بَس اَز چِمِن عقلی نَه خِدا شریعتی نوکری بَکَردیم، امّا چِمِن جِسمی نَه گناه شریعتی نوکریمَه. |
@ 2024 Korpu Company