رومی کلیسارا نامه 6 - کتاب مقدس به زبان تالشی شمالیمَردِه گناه واسی و زِندگی خِدا را 1 بَس چِه بوآجَم؟ هی گناه بِکَرَم تا فیض وِر آبو؟ 2 هَرگز! اَمَه که گناه واسی مَردیمونه، چِنتَه بَشایمون هَنی چَیی دیلَه کا زِندگی بِکَرَم؟ 3 مَگم نیمَزنه اَمَه گِرد که مسیحْ عیسی کا غُسل تعمید گِتَمونه، چَیی مرگی دیلَه کا تعمید گِتَمونه؟ 4 بَس مرگی دیلَه کا تعمید گِتِه نَه، اَیی نه دَفن بیمونه تا هَتَه که مسیح، دَده جلالی نَه، مَردَه اون دیلَه کا زِنده آبَه، اَمَه نی ایلَه تازه زِندگی کا قدم بِنییَم. 5 بَس اَگم ایلَه مرگی کا که چَیی مرگی شیوارَه، اَیینه ایلَه بَیمونه، حتمَن زِنده آبییِه کا نی چَیی زِنده آبییِه شیوار، اَیینه ایلَه بَبیمون. 6 چوم بَزنیمون اَ آدَمی که قدیمون بیمونه، اَیی نه مصلوب بَه تا گناه بَدَن از بِین بِشو و دِ گناه نوکر مَبییَم. 7 چوم اَ کسی که مَردَه، گناه کا آزاد آبییَه. 8 حِسَه اَگم مسیح نَه مَردَه ایمونه، ایمان هِستِمونه که اَیی نه زِندگی نی بَکَردیمون. 9 اَمَه بَزنیمون که مسیح مَردَه اون دیلَه کا زِنده آبییَه، دِ هَرگز نِمِرِه و دِ مرگ چَیی سَری کا قدرتی نیشَه. 10 چوم که اَ اِشتَن مرگی نَه، ایی کَرَه هَمیشه را گناه واسی مَردَه و اِشتَن زِندگی کا که حِسَه هِستِشه خِدا را زِندگی بَکَردی. 11 بَس شِمَه نی بَسی اِشتَن گناه را مَردَه بِزونَه، و مسیحْ عیسی کا خِدا را، زِنده بِزونه. 12 بَس مَرزَه گناه شِمَه بَدنی کا که از بِین بَشی دستور بِدَه، تا چَیی پیسته اون کا اِطاعت بِکَرَه. 13 شِمَه بَدنی اَعضا آمَدییَه گناه دَس تا ناراستی وسیله بِبون، بَلکَم کَسونی شیوار که مرگی کا آگَردِستَه اینه زِندگی را، اِشتَن آدییَه خِدا دَس تا شِمَه بَدنی اَعضا خِدا دَسی کا راستی وسیله بِبون. 14 چوم گناه شِمَه سَر حُکم نِکَرِه، چیرا که شریعتی جیری کا نیرونه بَلکَم فیضی جیری کا ایرونه. صالِحی نوکَرِن 15 بَس چِه بوآجَم؟ چوم شریعتی جیری کا نیمونه، بَلکَم فیضی جیری کاایمونه گناه بِکَرَم؟ هَرگز! 16 مَگم نیمَزنه که اَگم اِشتَن نوکرونی شیوار که اِطاعت بَکَردین، آدییَه ایی نفری دَس اَ آدَمی نوکرون بَبیرون که اَیی کا اِطاعت بَکَردیرون، چِه گناه نوکر، که مرگی را خَتم بَبی، چِه خِدا اِطاعتی نوکر، که صالحی را خَتم بَبی؟ 17 امّا خِدا را شُکر، شِمَه که پیشتری گناه نوکرون بیرونه، حِسَه صِدق دیلی نَه اَ تعلیمی کا اِطاعت بَکَردیرون که خِدا شِمَه آدوعَشه. 18 و شِمَه گناه کا آزاد بییِه نَه، صالِحی نوکرون بَیرونه. 19 اَز آدَمی زَوونی نَه شِمَه نَه گَف ژَنِم، چوم که آدَمیرونه و شِمَه جسم ضعیفه. چوم هَتَه که پیشتَری شِمَه بَدنی اَعضا، ایلَه نوکری شیوار دَسپردَرون بَه، بِه ناپاکی و بی قانونی دَس که روز بَه روز وِر آبی، بَس حِسَه اَوون دَسپارَه صالِحی نوکری دَس که قدّوسیتی را خَتم بَبی. 20 اَ موقعی که گناه نوکرون بیرونه، صالِحی کا آزاد بیرونه. 21 بَس اَ موقع، اَ کارونی اَنجام دوعِه کا که حِسَه اَوون کا شَرمِرون هِستَه، چِه سودی بَردِرونه؟ چوم اَ کارون آخِر عاقبت مرگَه! 22 امّا حِسَه که شِمَه گناه کا آزاد آبَییرونه و خِدا نوکرون بَییرونه؛ چَیی ثَمر شِمَه را تقدیس بییِه یَه که آخِرسَر اَبَدی یَه زِندگی را خَتم بَبی. 23 چوم که گناه مُزد مرگَه، امّا خِدا هدیه، چَمَه خِداوند مسیحِ عیسی کا اَبَدی یَه زِندگی یَه. |
@ 2024 Korpu Company