رومی کلیسارا نامه 5 - کتاب مقدس به زبان تالشی شمالی

خِدا نه صُلح کَردِه ایمانی واسطه نه

¹ بَس چوم که ایمانی نَه صالِح حساب بیمونه، چَمَه خِداوند عیسایِ مسیح واسطه نَه، خِدا نَه صُلح هِستِمونه.

² اَمَه چَیی واسطه نَه، ایمانی نَه، اَ فیضی که حِسَه چَیی دیلَه کا پابَر جا ایمونه بِه دَس وَردَمونه و خِدا جلالی اُمیدی کا شادی بَکَردیمون.

³ نِه فقط اِم، بَلکَم سختییون کا نی شادی بَکَردیمون، چوم بَزنیمون که اِم سختی اِن صبر بِه بار بواَردین

⁴ و صبر، شخصیت بِه بار بواَردی، و شخصیت اُمیدی بِه بار بواَردی؛

⁵ و اِم اُمید چَمَه خِجالتی باعیث نییَب، چوم خِدا محبت، روح القدسی واسطه نَه که بَمون آدوعَه بییَه، چَمَه دیلون دیلَه کا ویکَردَه بییَه.

⁶ چوم اَ موقع که اَمَه حَلا دَرموندَه بیمونه، مَسیح بِه موقع، بی‌ خِدا اون واسی جان دوشَه.

⁷ چوم کَم پیش بومَی که ایی نفر اِشتَن جانی ایلَه صالِح آدَمی واسی بِنه، هَر چَن شاید ایی نفر اِم جرأتی بِدارِه که ایلَه چاکَه آدَمی واسی اِشتَن جانی آدَه.

⁸ امّا خِدا اِشتَن محبتی بَمون اِنتَه نیشون دوشَه، اَ موقعی که اَمَه حَلا گناه کار بیمونه، مَسیح چَمَه واسی مَردَه.

⁹ بَس اِمی واسی که حِسَه چَیی خونی واسطه نه اَمَه صالِح حساب بَییمونه، چِندی وِرتَر چَیی واسطه نَه خِدا غَضَبی کا نجات پیدا بَکَردیمون.

¹⁰ چوم اَگم اَ موقعی که خِدا نَه دِشمَن بیمونَه، و چَیی زوعَه مرگی واسطه نه خِدا نَه آشتی دوعَه بیمونَه، چِندی وِرتَر حِسَه که اَیی نَه آشتی کا ایمونه، چَیی زِندگی واسطه نَه اَمَه نجات پیدا بَکَردیمون.

¹¹ نِه فقط اِم، بَلکَم اَمَه، چَمَه خِداوند عیسایِ مسیح واسطه نَه، خِدا آشتی چَمَه نصیب بَه، خِدا دیلَه کا نی شادی بَکَردیمون.

مرگ آدَمی واسطه نَه، زِندگی مسیح واسطه نَه

¹² بَس، هَتَه که گناه ایلَه آدَمی واسطه نَه اومَه اِم دنیا دیلَه، و گناه واسطه نَه، مرگ اومَه، و اِنتَه مرگ گِردِ آدَمون دومنی گِتِشَه، چوم که گِرد گناه کَردِشونه-

¹³ چوم راس راسی پیش از اِم که شریعت آدوعَه بِبی، گناه دنیا دیلَه کا بَه، امّا جِگایی که شریعت مَبو، گناه بِه‌ حساب نا.

¹⁴ با اِم حال، آدَمی دورانی نَه تا موسی دوران، مرگ گِردِ مردمی سَری کا حاکم بَه، حتی کَسونی سَر که چَوون گناه آدَمی نافرمانی شیوار نِبَه. آدَم، اَ کسی نمونۀ بَه که بَسی بای.

¹⁵ امّا هدیه، گناه شیوار نییَه. چوم اَگم ایلَه آدَمی گناه واسی وِر کَسِن مَردی نَه، چِندی وِرتَر خِدا فیض و هدیه ای که ایلَه آدَمی فیضی واسطه نَه، یعنی عیسایِ مسیح فراهم بَه، فَت و فَراوون، وِر کسون نَصیب بَه.

¹⁶ و اَ هدیه، اَ آدمی گناه نتیجه شیوار نییَه. چوم که اَ گناه دومله داوری اومَه و محکومیت وَردِشَه؛ امّا وِرَه گناه اون دومله هدیه اومَه و صالِح حساب بییِه اِشتَن هَمراه وَردِشه.

¹⁷ چوم اَگم ایلَه آدَمی گناه واسی، مرگ اَ آدَمی واسطه نَه حکومت کَردِشه، چِندی وِرتَر کسونی که خِدا بی حَد و اندازه فیضی و صالِحی هدیه ویگِتَشونه، اَ ایلَه آدَمی واسطه نه یعنی عیسایِ مسیح، زِندگی کا حکومت بَکَردین.

¹⁸ بَس هَتَه که ایلَه گناه باعیث بَه گِردِ آدَمِن محکوم بِبون، ایلَه صالِحانه کار نی باعیث بَبی گِردِ آدَمِن زِندگی بِدارِن و صالح بِه حساب بان.

¹⁹ چوم هَتَه که ایلَه آدَمی گناه نَه، وِر کَسِن گناه کار بینَه، ایلَه آدَمی اِطاعتی نَه نی وِر کَسِن صالِح بَبین.

²⁰ حِسَه، شریعت اومَه تا گناه وِر آبو؛ امّا جِگایی که گناه وِر آبَه، فیض نی بَرک وِرتَر آبَه.

²¹ تا هَتَه که گناه مرگی کا حُکومت کَردِشه، فیض نی صالِحی واسطه نَه حکومت بِکَرِه که چَمَه خِداوند عیسایِ مسیح واسطه نَه، اَبَدی یَه زِندگی را آرَستِه.