رومی کلیسارا نامه 4 - کتاب مقدس به زبان تالشی شمالیاِبراهیم پیغمبری صالِح حساب بییِه ایمانی نَه 1 بَس اَ چی درباره که اِبراهیم پِیغمبر بِه دَس وَردِشَه، چِه بَبی واتِه، اَ که از لحاظ جِسم چَمَه جَدّ حساب بَبی؟ 2 چوم اَگم اِبراهیم اِشتَن اَعمالی واسی صالح بِه حساب اومَه بَه، اِفتخار کَردِه را ایی چیی داری؛ امّا نِه خِدا وَری کا. 3 چوم که توراتی کا چِه نیویشته بییَه؟ «اِبراهیم بِه خِدا ایمان وَردِشه و اِم اَییرا صالحی حساب بَه.» 4 حِسَه اَ کسی که کار بَکَردی، چَیی مُزد چَیی حَق بَبی، نِه هدیه. 5 امّا اَ کسی که کار نِکَرِه، بَلکَم چَیی توکل بِه خِدایی یَه که بی خِدا اون نی صالِح حساب بواَردی، چَیی ایمان اَییرا صالِحی بِه حساب بومَی. 6 هَتَه که داوود پاُتشا نی، اَ کسی که خِدا اَیی بیدونِ اَعمالْ صالِح حساب بواَردی، خَسَه بخت بَزنی، و بَواتی که: 7 خَسَه بِبو اَ کسونی که چَوون خَطایِن بَخشِسته بینَه و چَوون گناه اِن پوشونده بینَه. 8 خَسَه بِبو اَ کسی که خِداوند چَیی گناه چَیی حِساب مَنه.» 9 مَگم اِم خَسَه بَختی اِن، فقط کسونی شِنَه که خَتنه بَیینه یا خَتنه نِبییَه اون شِن نی اِستَه؟ چوم واتِمونه که اِبراهیمی ایمان اَیی را صالِحی حساب بَه. 10 بَس چِنتَه اَیی را بِه حساب اومَه؟ اَ موقعی که خَتنه کَردَش بَه یا چَیی پیش؟ اَلبت که خَتنه بییِه پیش بَه، نِه چَیی پَش. 11 اِبراهیم خَتنه نیشونه ویگِتِشه تا چَیی صالِحی را مُهری بِبو که خَتنه بییِه پیش و ایمانی نَه چَیی نصیب بییَه بَه. اِنتَه، اَ گِردِ کسونی دَده یَه که بیدون خَتنه ایمان بواَردین تا اَوِن نی صالِح بِه حساب بان. 12 و اِبراهیم خَتنه بییَه اون دَده نی اِستَه، یعنی کسونی دَده که نِه فقط خَتنه بَیینه، بَلکَم ایمانی راه کا قدم پِگِرِن، هَ راهی دیلَه کا که چَمَه دَده اِبراهیم نی پیش از اِم که خَتنه بِبو، قدم پِگِری. خِدا وَعدَه ویگِتِه ایمانی واسطه نَه 13 چوم شریعتی راه نَه نِبَه که اِبراهیم و چَیی نَسلی وَعده دوعَه بَه که دنیا وارث بَبین، بَلکَم اَ صالِحی راه کایَه که ایمانی سَر پابَرجایَه. 14 چوم اَگم کسونی که شریعتی کا پیروی بَکَردین وارث بِبون، ایمان باطل بَبی و وعده هیچ. 15 چوم شریعت خِدا غَضَبی بواَردی؛ امّا جِگایی که شریعت نییَه، شریعتی چاکِندِه نی نییَه. 16 اِمی واسی، وعده، ایمانی واسطه نَه بومَی تا فیضی سَر استوار بِبو و اِبراهیمی نَسلی گِردی را ایلَه ضِمانت بِبو، یعنی نِه فقط کسونی را که شریعتی کا اِطاعت بَکَردین، بَلکَم کَسونی را نی اِستَه که اِبراهیمی ایمانی کا اِطاعت بَکَردین، که چَمَه گِردی دَده یَه. 17 هَتَه که توراتی کتابی کا نیویشتَه بییَه که: «از، تِه وِرَه میلَتون دَده کَردَمه.» و خِدا چِمی کا نی اِنتَه یَه، خِدایی که اِبراهیم بَیی ایمان وَردِشه، اَ که مَردَه اون زِنده آکَرِه و اَ چییونی که وجود نِدارِن هستی آدَه. 18 اَ جِگایی که هیچ اُمیدی نِبَه، اِبراهیم اُمیدی نَه باور کَردِشه که وِرَه میلَتون دَده بِبو، هَتَه که بَیی نَه واتَه بییَه بَه: «اِشتِه نَسل اِنتَه بَبی.» 19 اِبراهیم اِشتَن ایمانی کا سُست آنِبَه، اَ موقع که اِشتَن مَردَه بدنی دییَشته، چوم حدود صَد سالِش اِستبَه و سارا رَحِم نی خِشک آبییَه بَه. 20 امّا اَ بی ایمانی کا، خِدا وعده را شَک نِکَردِشه، بَلکَم ایمانْی کا قوی آبَه، خِدا جلال دوشَه. 21 اَ مُطمئن بَه که خِدا بَشای اِشتَن وعده وفا بِکَرِه. 22 اِمی واسی، چَیی ایمان «اَییرا صالِحی حساب بَه.» 23 ولی اِم گفِن که «اَییرا حساب بَه»، فقط اِبراهیمی را نیویشتَه نِبَه 24 بَلکَم چَمَه را نی نیویشته بَه، تا اَمَه را نی حساب بِبو، اَمَه که اَیی ایمان هِستِمونه که چَمَه خِداوند عیسی، مَردَه اون دیلَه کا زِنده آکَردِشه. 25 اَ که چَمَه گناه اون واسی مرگی تسلیم بَه و چَمَه صالِح حساب بییِه واسی، مَردَه اون دیلَه کا زِنده آبَه. |
@ 2024 Korpu Company