رومی کلیسارا نامه 3 - کتاب مقدس به زبان تالشی شمالیخِدا وفادارَه 1 بَس یَهودی بییِه فایدَه چَه؟ یا خَتنه بییِه چِه اِرزِشی هِستِشَه؟ 2 هَر لحاظی کا وِر. اوّل اِم که خِدا کلام، اَمانتی دَسپَرده بییَه یَهودیون. 3 اَگم بعضی اَوون کا وفادار نِبینَه، چِه بَبی؟ مَگم چَوون وفادار نبییِه، خِدا وفاداری باطل آکَرِه؟ 4 هَرگز! حتی اَگم گِردِ آدَمِن دروعَه واج بِبون، خِدا راستَه واجَه! هَتَه که داوودی مزمورَه کیتابی کا نیویشته بییَه که: «اِمی واسی، وختی گف ژَنی راست بَواتیش، و اَ موقعی که داوری بَکَردیش، اِشتِه داوری دُرستَه.» 5 امّا اَگم چَمَه ناراستی خِدا راستی آشکار آکَرِه، چِه بَسی بوآجَم؟ مَگم اَ موقع که خِدا اَمَه را غَضَب بِکَردی ظالِمَه؟ از آدَمی شیوار گَف ژَنِم. 6 هَرگز. چوم که اَ موقع خِدا چِنتَه بَشای دنیا داوری بِکَرِه؟ 7 «ولی اَگم چِمِن دوروع واسطه نه خِدا حقیقت وِرتَر جلال بَگتی، دِ چیرا اَز ایلَه گناه کاری شیوار مَحکوم بَبیم؟» 8 و چیرا مواجَم که: «بایَه بَدی بِکَرَم تا چاکی بِه بار با»؟ هَتَه که بَعضی اَمَه بُختون ژَندَشونه و اِدعا بَکَردین که اَمَه اِنتَه بَواتیمون؟ چِمون محکوم بییِه عادلانه یَه. هیچ کس صالِح نییَه 9 بَس چِه بَسی واتِه؟ مَگم چَمَه یَهودیون وضع و اوضاع، غیر یَهودیون کا چاکتَرَه؟ نِه اَصلا! چوم که پیشتَری اِدعا کَردِمونه که گِرد، یَهود و غِیریَهود هَر دِ گناه باری جیری کا اینَه. 10 هَتَه که مقدّسَ نیویشته کا نیویشته بییَه: «هیچکس صالِح نییَه، حتی ایی نفر. 11 هیچکس فهمیده نییَه، هیچکس خِدا دومله نِگردِه. 12 گِرد خِدا کا دیم آگاردِنییَشونه، اَوِن یَندی نَه باطلَ راه اون را شینَه. هیچکس چاکی نِکَرِه، حتی ایی نفر.» 13 «چَوون لوک ایلَه آواجَه قَبری شیوارَه؛ اِشتَن زَوونون گول ژَندِه را بِه کار بَگَتین.» «چَوون لِوون جیری کا اَفعی زهر دَریَه؛» 14 «چَوون گَ نیفیرن و تِلی کا پُورَه.» 15 «چَوون لِنگِن خونَ ویکَری را کارا ویریتِن؛ 16 هَر جِگا که بَشین، ویرونگی و سیاه بختی بَناین اوآکا، 17 و اَوِن صُلح و سلامتی یَه راه آنِزونِن.» 18 «خِدا تَرس، چَوون چِمون دیلَه کا دَری نییَه.» 19 حِسَه بَزنیمون اَ چیی که شریعت بَواتی کَسونی شِنَه که شریعتی جیری کااینَه تا هَر گَ ایی دَوَستَه بِبو و گِردِ دنیا، خِدا پیشگاه کا جواب پَس بِدَن. 20 چوم هیچ آدَمی نییَه که شریعتی اَعمالی بِه جا وَردِه نَه، خِدا چِمی کا صالِح حساب بِبو، چوم که شریعتْ، گناه بَمون نیشون بَدای. خِدا صالِحی ایمانی راه کا 21 امّا حِسَه شریعتی کا جِدا، اَ صالِحی ای که خِدا کایَه آشکار آبَه، هَتَه که شریعت و پیغمبرِن اَیی را گواهی بَداین. 22 اِم صالِحی ای که خِدا کایَه، عیسایِ مسیح ایمان داشتِه راه نَه، و گِردِ کسونی نصیب بَبی که ایمان بواَرِن. چوم هیچ فرقی نییَه. 23 چوم گِرد گناه کَردَشونه و خِدا جلالی پیشی کا کَم بواَردین. 24 و خِدا فیضی نَه که چَمَه را ایلَه هدیه شیوارَه و اَ آزادی بَها واسطه نَه که مسیح عیسی کایَه، صالِح حساب بَبین، 25 خِدا، عیسایِ مسیح گناه اون کفاره شیوار نوشَه، اَ کفّاره‌ای که چَیی خونی نَه و ایمانی راه نَه بِه دَس بومَی. اِم، خِدا عِدالتی نیشون دوعِه واسی بَه، چوم اَ اِشتَن الهی یَه صبری نَه، اَ گناهونی که پیشتری اِتفاق دَلَکه بینَه، نَدید گِتِشه. 26 اَ اِم کاری کَردِشه تا اِشتَن عدالتی اِم دورَه زمانه کا نیشون بِدَه، تا اِشتَن عادِل بِبو و گِردِ کسونی که بِه عیسی ایمان هِستِشونه، صالِح حساب بِبون. 27 بَس دِ چَمَه اِفتخار کَردِه چَه؟ دِ هیچ اِفتخاری نییَه! چِه چی حِسابی نه؟ شریعتی اَعمالی نه؟ اَلبت که نِه، بَلکَم ایمانی قانونی نَه. 28 چوم اَمَه اِعتقاد هِستِمونه که آدَم بیدونِ اِم که شریعتی اَعمالی اَنجام بِدَه، ایمانی نه صالِح حساب بَبی. 29 مَگم خِدا فقط یَهودیون خِدایَه؟ مَگم غیریهودیون خِدا نییَه؟ اَلبت که اَ، غیریهودیون خِدا نی اِستَه. 30 چوم فقط ایلَه خِدا وجود دارِه، و اِم خِدا خَتنه بییَه اون بَر طبق ایمان و خَتنه نِبییَه اون نی بَر طبق هَ ایمان، صالِح بِه حساب بواَردی. 31 بَس مَگم اَمَه اِم ایمانی نَه، شریعتی از بِین بَبَردیمون؟ البَت که نِه! بَرعَکس، اَمَه شریعتی پابَرجا بَکَردیمون. |
@ 2024 Korpu Company