رومی کلیسارا نامه 2 - کتاب مقدس به زبان تالشی شمالی

خِدا عادلانۀ داوری

¹ بَس تِه اِی آدَمی که ایی نفر دییَری داوری بَکَردیش، هَر کسی که بِبی هیچ بهونه ای نییرَه. چوم وختی ایی نفر دییَری داوری بِکَری، اِشتَن محکوم کَردَرَه؛ چوم که تِه، اِی داور، اِشتَن نی هَ کاری بَکَردیش.

² اَمَه بَزنیمون که خِدا داوری کَسونی را که اِنتَه رَه کارون بَکَردین، حَقّه.

³ تِه، اِی آدَمی که اَلباقی داوری بَکَردیش و اِشتَن نی هَ کاری بَکَردیش، خَیال بَکَردیش که خِدا داوری کا بَشای دَوزی؟

⁴ یا اِم که خِدا میهرَوونی، تاو و تحمل و چَیی بَرکَ صَبری روک بَزنیش و نیمَزنیش که خِدا میهرَوونی اِمی واسی یَه که تِه راهنمایی بِکَرِه تا توبَه بِکَری؟

⁵ امّا تِه، اِشتِه سَرسختی و اِشتِه دیلی واسی که نِپیستِشه توبه بِکَرِه، خِدا غَضَبی بَه تِرا غَضَبی روزی را اَنبار بَکَردیش، اَ روزی که اَیی کا خِدا عادلانۀ داوری آشکار بَبی.

⁶ خِدا «هَر کسی طبق چَیی اِشتَن کارون جَزا بَدای.»

⁷ خِدا، اَبَدی یَه زندگی کَسونی آدَه که صبری نَه چاکه کارون اَنجام دوعِه کا، جلال و حُرمت و اَبَدی یَه زندگی دومله اینه؛

⁸ امّا خودخواهَ آدَمون را و کسونی را که حقیقتی کا اِطاعت نِکَرِن، بَلکَم ناراستی کا اِطاعت بَکَردین، غیض و غَضَبی ویکَرِه.

⁹ هَر کسی که بَدَه کارون اَنجام بِدَه، رَنج و عَذاب چَیی نصیب بَبی، اوّل یَهود و دومله غِیریَهود.

¹⁰ امّا خِدا جلال و حُرمت و صُلح و سلامتی اَ کسونی نصیب بَبی که چاکی بَکَردین، اوّل یَهود و دومله غِیریَهود.

¹¹ چوم که خِدا فرقی نِنَه.

¹² چوم گِردِ کسونی که بیدون موسی شریعت گناه بَکَردین، بیدونِ شریعت نی هلاک بَبین؛ و گِردِ کسونی که شریعتی جیری کا گناه بَکَردین، شریعتی نَه داوری بَبین.

¹³ چوم کسونی که شریعتی دَرَسِن خِدا نظری کا صالِح نینَه، بَلکَم کَسونی صالِح حساب بومَین که شریعتی اَنجام بِدَن.

¹⁴ چوم وختی غیریهودی اِن که شریعت نیشونه، شریعتی اَعمالی طِبق غَریزَه بِه جا بواَردین، اَوِن با اِمکه شریعت نیشونه، امّا اِشتَن، اِشتَن را شریعتی اِستینه.

¹⁵ اَوِن نیشون بَداین که شریعتی اَعمال چَوون دیلی دیلَه کا نیویشته بییَه، جوری که چَوون وِجدان نی اِمی گواهی بَدای چوم که چَوون فیکرِن، یا اَوون محکوم بَکَردی یا حتی تبرئه بَکَردی.

¹⁶ اِم، اَ روزی کا اِتِفاق دَلکِه که خِدا بینا‌ بَر اَ اِنجیلی که اَز اِعلام بَکَردیم، اِنسانون سِرّون، مسیح عیسی واسطه نَه داوری بِکَرِه.

¹⁷ ولی تِه اِی که اِشتَن یَهودی بَزنیش و شریعتی کا تَکیه بَدایش و اِمی واسی که خِدا آزونی، بَه تِرا پوز بَدایش،

¹⁸ و چَیی اِراده بَزنیش و چوم شریعتی کا تعلیم گِتَرَه، چاکترین چییون اِنتخاب بَکَردیش،

¹⁹ و اَگم مُطمئِنیشَه که تِه کورون راهنماییش و کَسونی را که ظلمتی کا اینه نوریش،

²⁰ نادونون مربی و خِردَنون مُعلمیش، تِه، شریعتی که دانایی و حقیقَتَه هِستِرَه،

²¹ بَس تِه که خَلکی تعلیم بَدایش، اِشتَن یاد نِدَیش؟ تِه که دِزدی ضِد موعظه بَکَردیش، اِشتَن دِزدی بَکَردیش؟

²² تِه که بَواتیش زِنا مَکَه، اِشتَن زِنا بَکَردیش؟ تِه که بُتون کا بیزاریش، تِه اِشتَن، معبدون غارت بَکَردیش؟

²³ تِه که شریعتی داشتِه را پُوز بَدایش، شریعتی چاکِندِه نَه، خِدا بی‌ حرمتی بَکَردیش؟

²⁴ چوم هَتَه که پِیغمبرون کتابی کا نیویشتَه بییَه: «شِمَه واسی، غِیریَهودیون دیلَه کا خِدا نومی کُفر بَواتین.»

²⁵ خَتنه کَردِه اَ موقعی اِرزِش هِستِشه که شریعتی بِه جا بواَرَه، امّا اَگم شریعتی بِچاکِنَه، اِمی شیواره که خَتنه بَه نیرونَه.

²⁶ بَس اَگم ایلَه مِردی که خَتنه بَه نییَه، شریعتی حُکمون بِه جا بواَرِه، مَگم چَیی خَتنه نِبییِه خَتنه‌ بییِه حساب نِبو؟

²⁷ بَس اَ کسی که جِسمی کا خَتنه بَه نییَه، امّا شریعتی بِه جا بواَرِه، تِه محکوم بَکَردی، تِه ایی که هَم شریعتی نیویشته بییَه حُکمون هِستِرَه، و هَم خَتنه بییِه، ولی خِدا شریعتی چاکِنی.

²⁸ چوم که یهودی اَ کسی نییَه که بِه ظاهر یَهودی بِبو، و خَتنه نی کاری نییَه که جِسم و ظاهری کا بِبو.

²⁹ بَلکَم یَهودی اَ کسی یَه که باطِنی کا یَهودی بِبو و خَتنه نی کاری یَه دیلی، که خِدا روح اَیی اَنجام بَدای، نِه ایلَه نیویشته واسطه نه. اِنتَه رَه کسی، خِدا تحسین بَکَردی، نِه آدَم.