رومی کلیسارا نامه 16 - کتاب مقدس به زبان تالشی شمالی

سلام و درود

¹ چَمَه خالا، فیبی سفارشی بِه شِمَه بَکَردیم. اَ کِنخْریَه شهری کلیسا خادِمون کایَه.

² اَیی خِداوندی کا، هَتَه که مقدسون شَئنی کایَه، قبول بِکَرَه و هَر کمکی که شِمَه کا پیستِشَه، اَیی کا دریغ مَکَرَه، چوم اَ وِر کسون، حَتی بَه مِن، وِر کمک کَردَشه.

³ چِمِن همکارِن مسیحْ عیسی کا، پْریسکیلا و آکیلا را سلُام آرِساوونه.

⁴ اَوِن اِشتَن جانی چِمِن واسی خطری کا دَرَفَندِشونه، و نِه فقط اَز، بَلکَم غیریهودیون کِلیسااِن گِرد، اَوون کا تشکر بَکَردین.

⁵ اِنتَه نی، بِه کلیسایی که چَوون کَ کا یَندی نَه جَمع آبون، سلام آرِساوونه. چِمِن عزیزگِرامی یَه رَفِقی، اِپینِتوسی سلام آرِساوونه. اَ، اوّلین کسونی کا بَه که آسیا کا بِه مسیح ایمان وَردَشونه.

⁶ مریمی را نی که شِمَه را وِرَه زحمت کَشِشه، سلام آرِساوونه.

⁷ چِمِن خویشون، آندْرونیکوس و یونیا که مِنَه زندانی کا بینَه، سلام آرِساوونه. اَوِن رسولون دیلَه کا، معروفی نَه که بَه مِن کا پیشتَر مَسیح کا بینَه.

⁸ چِمِن عزیزگِرامی یَه رَفِق خِداوندی کا آمپْلیاتوسی سلام آرِساوونه.

⁹ چِمِن همکارون مَسیح کا، اوربانوس، و چِمِن عزیز رَفِقی، اِستاخیسی، سلام آرِساوونه.

¹⁰ آپِلیسی را که اِشتَن اِمتحانی مسیح کا پس دوعَشَه، سلام آرِساوونه. آریستوبولُسی خانواده سلام آرِساوونه.

¹¹ چِمِن قوم و خویشی هیرودیون و نارکیسوسی خانوادَه که خِداوندی کا اینه، سلام آرِساوونه.

¹² تْریفینا و تْریفوسا، اَ خادِمونی که خِداوندی خِدمتی کا زحمت بَکَشدین سلام آرِساوونه و پِرسیس که چِمِن اَ ایلَه عزیزگِرامی یَه رفِقَه که خِداوندی کا وِر زحمت بَکَشدی، سلام آرِساوونه.

¹³ روفُس که خِداوندی کا اِنتخاب بَه و چَیی نَنه که چِمِن حقی کا نی نَنه گِری کَردَشَه، سلام آرِساوونه.

¹⁴ آسینکْریتوس، فْلِگون، هِرماس، پاتْروباس و هِرمِس و دییَر بِرااون را که اَوون نَه اینه، سلام آرِساوونه.

¹⁵ فیلولوگوس، یولیا، نیریاس و چَیی خالا، و اولیمپاس و گِردِ مقدّسونی را که چَوون هَمراه اینه، سلام آرِساوونه.

¹⁶ یَندی را ایلَه مقدّس ماچی نَه سلام بِکَرَه. مسیح کلیسااِن گِرد شِمَه را سلام ویسا آکَرِن.

آخِرین سفارش

¹⁷ اِی بِرااِن، پیستِمَه شِمَه کا خواهیشت بِکَرِم اَ کسونی ویرا بِبییَه که جِدایی باعیث بَبین و شِمَه راه کا سَد بَناین و تعلیمی نَه که شِمَه یاد گِتَرونه، مخالفت بَکَردین؛ اَوون کا دوری بِکَرَه،

¹⁸ چوم که اِنتَه رَه آدَمِن چَمَه خِداوند مسیح خِدمت نِکَرِن، بَلکَم اِشتَن اِشکمی فیکری کا اینه و قَشنگَ گفون و چاپلوسی نَه، سادَه آدَمون گول ژَنِن.

¹⁹ شِمَه اِطاعت کَردِه گف گِردی دیلَه کا چُو دَلَکَه؛ و شِمَه واسی وِر ذوق بَکَردیم. امّا شِمَه کا پیستِمَه که، اَ چیی پیشی کا که چاکَه، دانا، و اَ چیی پیشی کا بَدَه، سادَه بِبییَه.

²⁰ خِدایی که صُلح و سلامتی هِستِشَه هِم زودیون شیطانی شِمَه پا جیری کا لِه بَکَردی. چَمَه خِداوند عیسی، فیض شِمَه نه بِبو.

²¹ چِمِن همکار تیموتائوس شِمَه را سلام ویسا آکَرِه. چِمِن خویشِن لوکیوس، یاسون و سوسیپاتِر نی شِمَه را سلام ویسا آکَرِن.

²² اَز، تِرتیوس، که اِم نامه بَنویشتی، خِداوندی کا شِمَه نَه سلام بَکَردیم.

²³ گایوس که از و گِردِ کسونی کا که اییا کلیسا کا اینه میهمونداری کَردِشَه، شِمَه را سلام ویسا آکَرِه. اِراستوس که شهری خزانه‌دارَه، و چَمَه بِرا کوآرتوس شِمَه را سلام ویسا آکَرِن.

²⁴ «چَمَه خِداوند عیسایِ مسیح فیض شِمَه گِردی نَه بِبو. آمین».

²⁵ حِسَه جَلال اَیی بِبو که، بَشای طبق چِمِن اِنجیل و عیسی مسیح موعظه، شِمَه تقویت بِکَرِه- یعنی طبق ایلَه سِرّی آشکار آبییِه که وِرَه زمانون نِین بَه،

²⁶ امّا حِسَه بینا بَر پِیغمبرون نیویشته اون و اَبَدی یَه خِدا حُکمی نَه، گِردِ قومون را آشکار آبَه، تا اَوِن ایمان بواَرِن و اِطاعت بِکَرَن-

²⁷ اَیی که خِدای یِگانه ی دانایَه، عیسایِ مسیح واسطه نَه تا اَبَد جلال بِبو! آمین.