رومی کلیسارا نامه 15 - کتاب مقدس به زبان تالشی شمالی

¹ اَمَه که قوی ایمونَه، بَسی کسونی که ضَعیفی نَه تحمل بِکَرَم و چَمَه خوشحال بییِه دومله مَبییَم.

² هَر کمیله اَمَه کا بَسی هَر چاکَ چیی که اِشتَن خَمسوعه کا بَویندی، چَیی درباره اَیی خوشحال آکَرِه، تا چَیی ایمانی تقویت بِکَرِه.

³ چوم که مسیح نی اِشتَن خوشحال آکَردِه دومله نِبَه، بَلکَم هَتَه که داوودی مزموری کا نیویشتَه بییَه: «کسونی سَرکوفت که تِه سَرکوفت ژَندِشونَه، چِمِن سَر گِنَه.»

⁴ چوم هَر چیی که گِذشته کا نیویشتَه بییَه، چَمَه تعلیمی را بَه تا مقاومتی نَه و اَ دیلگرمی نَه که مقدّس نیویشته اِن بَمون آدَه، اُمید بِدارَم.

⁵ بِبو که خِدایی که مقاومت و دیلگرمی بَدای، شِمَه عطا بِکَرِه اَتَه که مسیحْ عیسی پیستَه نَه جورَه، یَندی نَه مُدارا بِکَرَه،

⁶ تا یَندی نَه یَکدیل و یَک زَوون، چَمَه خِداوند عیسایِ مسیح دَده، یعنی خِدا پرستش بِکَرَه.

⁷ بَس هَتَه که مسیح شِمَه گرمی نَه قبول کَردِشه، شِمَه نی یَندی گرمی نَه قبول بِکَرَه تا خِدا جَلال بِگِرِه.

⁸ چوم شِمَه نَه بَواتیم که مسیح، خَتنه بییَه اون خدمتکار بَه، تا خِدا راستی نیشون بِدَه، تا اَ وعده‌ اونی که خِدا چَمَه اَجدادی دوشَه، تصدیق بِکَرِه،

⁹ و تا غیریهودیِن، خِدا چَیی رحمتی واسی جلال بِدَن. هَتَه که مقدّس نیویشته اون کا نیویشتَه بییَه که: «بَس از، تِه غیریهودیون دیلَه کا ستایش بَکَردیم، و اِشتِه نومی کا آواز بَخَندیم.»

¹⁰ هَنی بَواتی: «اِی غیریهودیِن، چَیی قومی نَه شادی بِکَرَه!»

¹¹ و هَنی مزموری کیتابی کا بَواتی: «اِی گِردِ غیریهودیِن، خِداوندی سِتایِش بِکَرَه! بِبو که گِردِ میلَتِن، اَیی جلال بِدَن!»

¹² و هَنی اِشعَیای پِیغمبر نی بَواتی: «یَسا بِن و بِنجِق بومَی، کسی که پِرِشتَه تا غیریهودیون سَر حُکمرانی بَکَرِه؛ غیریهودیِن اَیی اُمید دَوَسِن.»

¹³ بِبو، خِدایی که اُمید بَدای، شِمَه شادی و صُلح و سلامتی کاملی نَه که ایمانی کایَه، پُور آکَرِه، جوری که روح القدسی قدرتی نَه، اُمیدی کا لِبالِب پُور بِبییَه.

پولُسی خدمت غیریهودیون را

¹⁴ اِی چِمِن بِرااِن، اَز اِشتَن شِمَه کا خاطر جَمع ایمَه که شِمَه اِشتَن چاکی کا لِبالِب پُوری رونَه، و دانایی کا کامل پُوری رونَه و بَشایرون یَندی تعلیم بِدییَه.

¹⁵ ولی چَن گِله جریانی درباره وِرَه جسارت کَردِمَه، شِمَه را نیویشتِمَه تا اَوون شِمَه را ویر بواَرِم، چوم خِدا اِم فیضی بَه مِن آدوعَشَه،

¹⁶ که مسیحْ عیسی نوکر، غیریهودیون را بِبوم و خِدا اِنجیلی خدمت کَردِه را کاهِنَتی بِکَرِم، تا غیریهودیِن خِدا درگاه کا قابِلِ قبولَ هدیه ای بِبون که روح القدسی واسطه نَه تَقدیس بییَه.

¹⁷ بَس از مسیحْ عیسی کا، اِم خدمتی که خِدا را بَکَردیم دلیلی هِستِمَه که اِفتخار بِکَرِم.

¹⁸ چوم جرئت نِکَرِم که چیی کا گَف بِژَنِم، اَ چیی غِیراز که مَسیح چِمِن واسطه نَه اَنجام دوعَشَه، تا غیریهودیون ایمانی مطیع بِکَرِم، چِه چِمِن گَفون نَه و چِه چِمِن کارون نَه.

¹⁹ اَ اِمی علامت و مُعجزه اون قدرتی نَه، یعنی خِدا روح قدرتی نَه اَنجام دوعَشَه، هَتَه که اورشلیمی نَه شیمَه تا ایلیریکوم، مسیح اِنجیلی خِدمتی کامل، اَنجام دومَه.

²⁰ چِمِن آرزو همیشه اِم بَه جِگایی کا اِنجیلی موعظه بِکَرِم که مَسیح نومی دَرَسَشون مَبو، تا نَبادا که از ایی نفر دییَری پاکاری سَری کا بینا وَج آکَرِم،

²¹ هَتَه که اِشعَیای پیغمبری کِیتابی کا نیویشتَه بییَه که: «کسونی که اَیی کا بی‌ خَوَر بینَه، بَویندین و کَسونی که دَرسَشون نِبَه، فَهمِن.»

²² اِمی واسی یَه که چِندی کَرَه پیستِم بَه که بام شِمَه وَر و نِبَه.

²³ امّا حِسَه چوم که اِم مَنطقه کا، دِ کاری باقی مَنده نییَه که از اَنجام بِدَم، و چوم وِرَه سالَه که مُشتاقیمَه بام شِمَه وَر،

²⁴ اُمید هِستِمه چِمِن راه سَری کا اِسپانیا را، بام شِمَه ویندِه را تا روکَتِه پَش که شِمَه ویندِمه، مِن کمک بِکَرَه بِشوم اوآ سَفری را.

²⁵ حِسَه اورشلیمی را رایی ایمه تا اوآکا مقدّسون را کمک مالی بِبَرِم،

²⁶ چوم مقدونیه و اَخائیه کلیسااِن پیستِشونَه که اورشلیمی فقیرَه مقدسون را کمک مالی جَمع آکَرِن.

²⁷ اَوِن اِشتَن پیستِشون بَه اِم کاری بِکَرِن؛ و راس راسی اَوِن اورشلیمی ایماندارون مدیون بینَه. چوم اَگم غیریهودیِن، روحانی یَه بَرَکتون کا یهودیون نَه شریک بینَه، یهودیِن نی بَسی مالی یَه بَرَکتون کا اَوون خِدمت بِکَرِن.

²⁸ بَس، وختی اِم کاری تَمون آکَرِم و اَ چیی که جَمع آبَه آرِساوونِم چَوون دَس شِمَه وَری نَه بَشیم اِسپانیا را.

²⁹ بَزنیم وختی که بام شِمَه وَر، مسیح بَرکتی نَه که فَت و فراوونَه بومَیم.

³⁰ اِی بِرااِن، چَمَه خِداوند عیسایِ مَسیح واسی و مُحبتی که روح القدوسی کایَه، شِمَه کا خواهِیشت بَکَردیم که همیشه بَه مِرا خِدا درگاه کا دعا بِکَرَه، و اِم کاری نَه چِمِن خِدمتی کا شریک بِبییَه.

³¹ تا یَهودیَه بی ایمانون دَسی کا، سالِمَ جان بِه در بِبَرِم و چِمِن خدمت اورشلیمی واسی، مقدّسون را مورد قَبول بِبو.

³² دومله، اَگم خِدا پیستِشَه بَشایم شادی نَه بام شِمَه وَر و شِمَه نَه تازه جانی بِگِرِم.

³³ صُلح و سلامتی یَه خِدا شِمَه گِردی هَمراه بِبو. آمین.