رومی کلیسارا نامه 13 - کتاب مقدس به زبان تالشی شمالی

اِطاعت کَردِه صاحِب منصبون کا

¹ هَر کسی بَسی صاحب منصبون کا فرمان بِبَرِه، چوم هیچ صاحِب منصبی نییَه که خِدا طرفی نَه مَبو. صاحِب منصبونی که اِستینه، خِدا طرفی کا مُعین بَیینه.

² بَس هر کسی که صاحب منصبون ضِد پِرِزِه، اَ چیی ضِد پِرِزِه که خِدا مُعین کَردَشَه، و کسونی که اِنتَه بَکَردین، داوری بَبین.

³ چوم کسونی که دُرست رفتار بَکَردین حاکمون کا تَرسی نیشونه، امّا خَلافکارِن اَوون کا بَتَرسین. پیستِرَه صاحِب منصبون کا مَتَرسی؟ بَس، اَ چیی که دُرستَه، اَنجام بِدَه که تِه تحسین بَکَردی.

⁴ چوم که اَ اِشتِه خِیری را خِدا خِدمتکارَه. امّا اَگم کار خلاف اَنجام بَدای، بِترس، چوم شَمشیری اِشتَن کَمَری کا دَدار دَوَسته نیشَه. اَ خِدا خِدمتکارَه و کسی یَه که خِدا واسی اِنتقام ویگِرِه و خِدا غَضبی، خلافکاری سَر بواَردی.

⁵ بَس آدَم بَسی نِه فقط خِدا غَضبی واسی، بَلکَم وِجدانی واسی نی فَرمانبُردار بِبو.

⁶ اِمی واسی نی شِمَه مالیات آدییَه، چوم صاحِب منصبِن خِدا خِدمتکارِنی نَه و اِم چیون کا مواظبت بَکَردین.

⁷ هَر کسی حقی آدییَه بَیی: اَگم خَراجَه، خَراج آدییَه، اَگم مالیاتَه، مالیات آدییَه، اَگم اِحترامَه، اِحترام بِنییَه؛ و اَگم حُرمَتَه، حُرمت بِنییَه.

شریعتی اَنجام دوعه، مُحبتی واسطه نه

⁸ هیچکسی گَردنی کا هیچ دِینی مَدارَه، اِمی غِیراز که دائِم یَندی محبت بِکَرَه. چوم که هَر کسی ایی نفری محبت بِکَرِه، شریعتی بِه جا وَردَشه.

⁹ چوم که اِم حُکمِن ’زِنا مَکَه‘، ’قَتل مَکَه‘، ’دِزدی مَکَه‘، ’طَمع مَکَه‘، و هَر حُکم دییَری که بِبو، گِردِ اِم حُکمی کا خلاصه بَبی که «اِشتِه خَمسوعه نَه اِشتِه جانی شیوار خِش بِبَش.»

¹⁰ محبت، اِشتَن خَمسوعه نَه بَدی نِکَرِه؛ بَس محبت، شریعتی تمام و کمال اَنجام بَدای.

¹¹ چِمون غیراز شِمَه بَزنیرون که چِه زمانی کا زندگی بَکَردیرون، حِسَه اَ وختی یَه که خاوی کا پِرِزَه. چیرا که حِسَه اَ زمانی مقایسه نَه که ایمان وَردِمونه، چَمَه نجات نِزدیکتَر آبَه.

¹² شَو کارا تمون آبو و روز نِزدیکَه. پس بایَه تاریکی بَدَه کارون بِنییَم کَنار و نوری زِرِه دَکَرم.

¹³ بایَه اِنتَه دُرست رفتار بِکَرم که کَسونی شَئنی کایَه که روزی روشونی کا زندگی بَکَردین. نِه عَیاشی و عَرق هَری کا، نِه زِنا و هَرزِگی کا، نَه جنگ و جَدل و حَسودی کا.

¹⁴ بَلکَم عیسایِ مسیحِ خِداوندی شخصیتی ایلَه خَلایی شیوار دَکَرَه و جِسم و هوا هَوسی را تدارک مَوینَه تا چَیی پیستَه اون بِه جا بواَره.