رومی کلیسارا نامه 11 - کتاب مقدس به زبان تالشی شمالیاِسرائیلی باقی موندَه اِن 1 بَس دَفَرسِم: مَگم خِدا اِشتَن قومی رَد آکَردَشَه؟ هَرگز؛ چوم اَز اِشتَن اِسرائیلی ایمَه، اِبراهیمی نسلی کا و بِنیامینی تیر و طایفه کا. 2 خِدا اِشتَن قومی که پیشتری جِدا آکَردَش بَه، رَد آکَردَه نیشه. مَگم نیمَزنه مقدّس نیویشته اِن ایلیا درباره چِه بَواتی؟ اِم که اَ چِنتَه، قوم اِسرائیلی ضِد خِدا وَری کا گیلایَه کَردِشه و واتِشه: 3 «خِداوندا، اَوِن اِشتِه پِیغمبرون کِشتِشونه و اِشتِه قِربونگاه اون ویروونه کَردَشونه. فقط اَز مَندَه ایمَه و حِسَه پیستِشونَه مِن نی بِکِشِن.» 4 امّا خِدا چِه جَواوی بَیی دوشَه؟ اِم که «اَز بَه مِرا هَفت هَزار نفر کَنار نوعَمَه که بَعَلی بُتی پیشی کا زِنگ ژَندَه نیشونه.» 5 هَتَه نی، هِم حِسَه نی اَلباقیونی اِستینه که خِدا فیضی راه نَه اِنتخاب بَیینه. 6 امّا اَگم فیضی راه کا بِبو، دِ اَعمالی واسی نییَه؛ اَگم نِه فیض دِ فیض نییَه.امّا اَگم اَعمالی کا بِبو، دِ فیضی واسی نییَه؛ اَگم نِه عمل دِ عمل نییَه. 7 دومله چِه؟ اِم که، اَ چیی که قوم اِسرائیل ذوق و شوقی نَه چَیی بِه دَس وَردِه دومله بَه، بِه دَس نِوَردِشونَه. اِنتخاب بییَه اِن بِه دَس وَردِشونه ولی اَلباقی دیل سختی دُچار بینَه. 8 هَتَه که مقدّسَ نیوشته اون کا نیویشتَه بییَه که: «تا بِه اوری خِدا اَوون لَسَه روح آدوشَه و چِمونی که مَشان بِوینن و گوشونی که مَشان دَرَسِن.» 9 و داوود پاُتشا بَواتی: «چَوون سِفره اَوون را دام و تَله بِبو سِنگی که اَوون ژَنِه زمین چَوون را مُکافات بِبو. 10 چَوون چِمِن تار آبون تا مَشان بِوینن و چَوون کَمَرِن همیشه قات بِبون.» 11 بَس دَفَرسِم: یعنی اَوِن لغزش هَردِشونه تا هَمیشه بَلَکِن؟ هَرگز! بَلکَم چَوون نافرمانی نَه، غیر یهودییِن نِجات پیدا کَردِشونه، تا قوم اِسرائیل غیرتی بِبون. 12 امّا اَگم چَوون تقصیرِن دنیا ثروتمند کَردِشه و چَوون باخت، غیریهودیون ثروتمند کَردِشه، بَس وختی که قوم یَهود کاملا نجات پیدا بِکَرِن چَدَه وِرتَر فَراوونی باعیث بَبی! 13 حِسَه، شِمَه غیریهودیون نَه کارا گف ژَنِم. اوآنه که از غیریهودیون رسولی مَه، چِمِن خِدمتی را وِر اِفتخار بَکَردیم. 14 اِم امیدی نَه که چِمِن هَمنِژادون غیرتی بِکَرِم و بعضی اَوون نی نِجات بِدَم. 15 چوم اَگم چَوون رَد آبییِه معنی، خِدا آشتی دنیا نَه یَه، چَوون قبول بییِه معنی چِه بَبی، مَرده اون دیلَه کا زِنده آبییِه غِیراز؟ 16 اَگم ایی تیکَه اَ خمیری کا که نوبری را خِدا را تقدیم بَبی، مقدّس بِبو، اِنتَه، اَ خمیر گِرد مقدّسَه؛ و اَگم بِنَه مقدّس بِبو، پس لاخَه اِن نی مقدّسی اینه. 17 ولی اَگم بعضی لاخَه اِن دَوِردَه بَیینه و تِه که وَحشی یَه زیتونی لاخَه بیش، دییَر لاخه اون نه زیتونَ داری پیوند بیشَه و حِسَه زیتونَ داری بِنه شیره کا که مُقوی یَه بَردیش، 18 اَ لاخَه اون را پوز مَدَه. اَگم اِنتَه بَکَردیش، ویرِر بِبو که تِه نیشَه که بِنَه هِستِرَه، بَلکَم بِنه تِه هِستِشه. 19 شاید بوآجی: «لاخَه اِن دَوِردَه بینَه تا اَز پیوند بِبوم.» 20 راست بَواتیش. امّا اَوِن بی ایمانی واسی دَوِردَه بینَه و تِه فقط ایمانی نَه پا بَرجا ایش. بَس مغرور مَبش بَلکَم بِتَرس. 21 چوم اَگم خِدا، طبیعی یَه لاخَه اون رَحم نِکَردِشه، بَه تِه نی رَحم نِکَرِه. 22 بَس خِدا میهرَوونی و سختگیری ویر بَمَرکَه؛ سختگیری کسونی را که ایمانی کا بَلَکَه اینه، امّا بَه تِنه میهرَوونَه، البته بِه اِم شرط که چَیی میهرَوونی کا ثابت بومونی؛ اَگم نِه، تِه نی دَوِردَه بَبیش. 23 و اَگم اَوِن نی بی ایمانی اِدامه مَدَن، هَنی پیوند بَبین، چوم که خِدا بَشای اَوون هَنی از دِوارَه پیوند بِژَنه. 24 چوم اَگم تِه که وَحشی یَه زیتونه داری کا دَوِردَه بَبیش و برعَکسِ اِشتِه طبیعت، زیتون داری کا که آزادَه پیوند بیشَه، بَس چِندی وِرتَر اَصلی یَه لاخَه اِن بَشاین اَ زیتونَ داری کا که اَیی کا دَوِردَه بَیینه، پیوند بِبون. قوم اِسرائیلی نجاتی سِرّ 25 اِی بِرااِن، نِپیستِمه اِم سِرّی کا بیخَوَر بِبییَه- نَبادا اِشتَن دانا بِزونَه- که دیل سختی بعضی اِسرائیلی یون سَری کا حُکمفرما بییَه، تا کسونی تعداد که قَرارَه غیریهودیون دیلَه کا بِه مسیح ایمان بواَرِن کامِل آبو. 26 و اِنتَه قوم اِسرائیل گِرد نجات پیدا بَکَردین. هَتَه که مقدّسَ نیوشته اون کا نیویشتَه بییَه که: «صَهیونی کا ایی نفر بومَی که نجات بَدای، و بی‌دینی یعقوبی جَدّی کا ویگِرِه. 27 و چِمِن اِم عهد اَوون نَه بَمَندی اَ موقعی که چَوون گناه اون، پِگِرِم.» 28 از لحاظ اِنجیل یَهودیِن شِمَه واسی، دِشمَنی نَه؛ امّا از لحاظ خِدا اِنتخاب، اَجدادون واسی، خِدا عزیزگِرامی نَه. 29 چوم خِدا هرگز اِشتَن هدیه اون و اِشتَن دعوتی پس نِویگِرِه. 30 دُرست هَتَه که شِمَه ایی موقعی نسبت بِه خِدا نافرمونی بَکَردیرون، امّا حِسَه یَهودیون نافرمونی واسی، شِمَه مورد رحمت خِدا اِستیرونه، 31 بَس حِسَه اَوِن نی نافرمون بَیینه، تا خِدا رحمتی واسی بِه شِمَه، حِسَه بِه اَوون نی رَحم بِبو. 32 چوم که خِدا گِردی نافرمونی اَسیر کَردِشَه، تا گِردی رَحم بِکَرِه. 33 آه که خِدا دولتمندی، حکمت و دانایی چِندی عَمیقَه؛ چَیی داوریون نییَب سَربَروَردِه و چَیی راه اون نییَب فَهمِستِه. 34 «چوم کییَه که خِداوندی فیکری بِزونه یا کییَه که چَیی مُشاوِر بِبو؟» 35 کییَه که ایی چیی آدوعَشه خِدا تا اَیی پَس آدوعَه بِبو؟» 36 چوم که گِردِ چییِن اَیی کا اَیینه، و چَیی واسطه نَه، و چَیی شِنی نَه. تا اَبَد اَیی جلال بِبو. آمین. |
@ 2024 Korpu Company