یوحنا موکاشیفَه 9 - کتاب مقدس به زبان تالشی شمالی

¹ و پنجمین ملائیکه اِشتَن شیپوری دیلَه کا فو دَکَردِشه، و از ایلَه ستاره‌ای ویندِمَه که آسمونی کا بَلَکه زمینی سَر و هاویَه چاه اَچَری که تون نیشَه، اَیی آدوعَه بَه.

² اَ ملائیکه هاویَه چاه آکَردِشَه. اَ چاه دیلَه کا ایی چیی ایلَه یالَ کورَه دو شیوار پِرِشتَه، و آفتاو و هوا اَ چاه دو کا تاریک آبینَه.

³ دومله دو دیلَه کا چَک اُردکِن اومینَه زمینی سَر و اَوون ایلَه قدرتی، زمینی عقربون قدرتی شیوار آدوعَه بَه.

⁴ و اَوون نَه واتَه بَه که زمینی واشون، و نِه هیچ سَوزَه گیاهی یا داری صَدمَه مَژَنِن، بَلکَم فقط کسونی صَدمَه بِژَنِن که خِدا مُهری اِشتَن تقالی کا نیشونَه.

⁵ و اَوون اِجازَه دوعَه بَه که اَ مردمی پینج مانگ عذاب بِدَن، بی اِمکه کسی بِکِشِن. و چَوون عذاب، عقربی عذابی شیوار بَه، اَ موقع که ایی نفری گَزِه.

⁶ اَ روزون کا مَردم مرگی دومله گَردِن، امّا اَیی نِتلَفِن؛ مرگی آرزو دارِن، امّا مرگ اَوون کا دَوَزِه.

⁷ و اَ چَک اُردَکِن اَسبونی مونین که جنگی را حاضیر آبین. چَوون سَری کا ایی چیی نوعَه بَه که طِلا تاجی مونی و چَوون سَر و شکل، آدَمی شیوار بَه.

⁸ چَوون سَری مو، ژِنَکون سَری مو شیوار بَه چَوون گازِن، شیرون گازون شیوار بینَه.

⁹ ایلَه آهنی یَه سینه‌پوشی، اِشتَن سینه اون کا دارین، و چَوون بالون سَس، وِرَه اَسبون و اَرابه‌ اون سَسی شیوار بَه که بَوریتین جنگی را.

¹⁰ چَوون دُم و نیش، عقربی دُم و نیشی شیوار بَه، و اِشتَن دُمی کا اِم قدرتی دارین که پینج مانگ مردمی عذاب بِدَن.

¹¹ هاویَه چاه ملائیکه چَوون پاُتشا یَه، که عِبرانی زَوونی کا چَیی نوم ’اَبَدون‘، و یونانی زَوونی کا ’آپولیونَ‘ یعنی خَراوَه کَر.

¹² اوّلین ’وای‘ دَوییَردَه، دَیِس دِ گِله ’وای‘ نی حَلا بَسی با.

¹³ دومله شیشُمین ملائیکه اِشتَن شیپوری دیلَه کا فو دَکَردِشه، و از ایلَه سَسی دَرَسِمَه که قِربونگاه طِلا چار شاخی کا که خِدا پیشی کا نوعَه بَه؛

¹⁴ که شیشُمین ملائیکه که شیپور داری، واتِشَه: «اَ چار گِله ملائیکه که یالَ رِوار، فُراتی وَری کا اَسیری نَه، آزاد آکَه.»

¹⁵ بَس اَ چار گِله ملائیکه که اَ ساعت و اَ روز و اَ مانگ و اَ سالی را حاضیر آبَه بینَه، آزاد آبینَه تا آدَمون یک‌ سوّمی بِکِشِن.

¹⁶ سوارَه‌ نظامون تعداد دویست میلیون نفر بَه که چَوون تعدادی دَرَسِمَه.

¹⁷ اَسبون و چَیی سِوارونی که چِمِن رؤیا کا ویندِمَه اِنتَه بینَه: چَوون زِرِه اون رنگ آتشی سِری و آبی کَئو و گوگِردی زردی داری. اَسبون سَر، شیری سَری شیوار بَه و چَوون گَ کا آتش و دو و گوگِرد بِرون بومَی.

¹⁸ اِم سِه گِله بَلا نَه آتش و دو و گوگِرد که چَوون گ کا بِرون بومَی، آدَمون یک سوّم کِشتَه بینَه.

¹⁹ چوم که اَسبون قدرت چَوون گَ و دُمی دیلَه کا بَه. چوم چَوون دُمِن، ایلَه نَلتی شیوارَه که سَر هِستِشَه و اَیی نَه صَدَمَه ژَنین.

²⁰ الباقی آدَمِن، که اِم سِه گِله بَلا نَه کِشتَه نِبینِه، نِه اِشتَن دَسی کارون کا توبه کَردِشونَه و نِه دیوون پرستش کَردِه کا و نِه طِلایی یَه بُتون و نقره ای و برنجی و سِنگی و چو یَه بُتون پرستشی کا، که نِه بَشاین بِوینِن و نِه دَرَسِن و نِه راه بَشین.

²¹ اَوِن اِشتَن آدَمکِشیون و جادوگریون و بی‌عفتیون و دِزدیون کا نی توبه نِکَردِشونَه.