یوحنا موکاشیفَه 8 - کتاب مقدس به زبان تالشی شمالیهفتمین مُهر 1 وختی که وَرَه هفتمین مُهری چاکِندِشَه، دُروبَر نیم‌ساعت آسمونی کا سکوت برقرار بَه. 2 اَ موقع اَ هفت گِله ملائیکه ویندِمَه که خِدا پیشی کا بَمَندین، و اَوون هفت گِله شیپور آدوعَه بَه. 3 و ایلَه دییَر ملائیکه ایی اومَه که ایلَه طِلایی یَه منقلی اِشتَن نَه داری، و قِربونگاه وَری کا مَندَه. اَیی وِر بُخور آدوعَه بَه تا اَیی گِردِ مقدّسون دعا اون نَه طِلایی یَه قِربونگا سَری کا تختی پیشی کا تقدیم بِکَرِه. 4 و بُخوری دو، اَ ملائیکه اون دَسون کا مقدّسون دعا اون نَه تا خِدا حضور، کَفا شَه. 5 دومله ملائیکه، منقلی بُخوری پِگِتِشَه و اَیی قِربونگا آتشی کا پُور آکَردِشَه فِرآدوشَه زمینی سَر. اَ موقع گِرخونَه سَس، بَرقی که آسمونی کا ژَنی و زمین لَرزَه اومَه. هفت گّله شیپور 6 اَ هفت گِله ملائیکه که هفت گِله شیپور دارین، حاضیر آبین تا چَوون سَسی بِرون بواَرِن. 7 اوّلین ملائیکه اِشتَن شیپوری دیلَه کا فو دَکَردِشه و تَگرگ و آتشی که خونی نَه قاطی بَه، زمینی سَر وارِستَه و زمینی یک سوّم سیستَه و دارون یک سوّم سیستَه و گِردِ سَوزَه واشِن سیستینَه. 8 دوّمین ملائیکه اِشتَن شیپوری دیلَه کا فو دَکَردِشه، ایی چیی ایلَه یالَه کوهی شیوار که آتش گِتَش بَه، دریا دیلَه کا دَرَفندَه بَه و دریا یک سوّم خون آبَه. 9 و دریا جانِوَرون کا یک سوّم مَردی نَه و کَشتیون کا یک سوّم نابود بینَه. 10 سوّمین ملائیکه اِشتَن شیپوری دیلَه کا فو دَکَردِشه، و ایلَه یالَ ستاره، ایلَه سوزانَ مشعلی شیوار آسمونی کا بَلَکَه رِوارون و آوَه خانیون یک سوّمی سَر. 11 اَ ستاره نوم ’اَفْسَنْتین‘ بَه، و آوون یک سوّم اَفْسَنْتینی نَه تِل آبینَه. و اَ مردومون کا وِر کَسِن اَ آوی نَه که تِل آبَه بَه، مَردی نَه. 12 چارمین ملائیکه اِشتَن شیپوری دیلَه کا فو دَکَردِشه، و آفتاوی یک سوّم، و مانگی یک سوّم، و سِتاره اون یک سوّمی ضَربَه گِنه، جوری که چَوون نوری یک سوّم تاریک آبَه. و روزی یک سوّم بی‌نور مَندَه و شَوی کا نی یک سوّم هَتَه. 13 دومله دَیشتیمَه، و دَرَسِمَه که ایلَه عقاب آسمونی کا هَتَه که پرواز بَکَردی بِلندَه سَسی نَه خِلِع ژَنی: «وای، وای، وای بَر زمینی مردم، چوم که چیی مَندَه نییَه که اَ سِه گِله ملائیکه شیپورون سَس بَرا.» |
@ 2024 Korpu Company