یوحنا موکاشیفَه 7 - کتاب مقدس به زبان تالشی شمالیمُهر بییَه اون تعداد 1 دومله، چار گِله مَلائیکَه ویندِمَه، زمینی چارگوشۀ کا مَند بینَه و زمینی چار گِله وا پیشی گِرین تا هیچ وایی زمینی سَر و دریا سَر و هیچ داری سَر مَوَزِه. 2 دومله ایلَه دییَر ملائیکه ای ویندِمَه اَ جِگایی نَه که آفتاو کفا بومَی، شَه آسمون کفا را و خِدای زِنده مُهر اَیی نَه بَه. و بِلندَه خِلِع نَه اَ چار گِله ملائیکه که اَوون قدرت آدوعَه بَه تا زمین و دریا ضَرر بِژَنِن، دَخوندِشَه و 3 واتِشه: «تا وختی که اَمَه چَمَه خِدا نوکرون تَقالی کا مُهر ژَندَه نیمونه، زمین یا دریا یا دارون ضَرر مَژَنَه.» 4 و دَرَسِمَه که مُهر بییَه اون تعداد صد و چِل و چار هَزار نفر، قوم بنی‌اِسرائیلی گِردی قبیله اون کا بینَه. 5 یهودا قبیله کا دونزَه هَزار نفر مُهر بینَه، رِئوبینی قبیله کا، دونزَه هَزار نفر، جادی قبیله کا، دونزَه هَزار نفر، 6 اَشیری قبیله کا، دونزَه هَزار نفر، نَفتالی قبیله کا، دونزَه هَزار نفر، مَنَسی قبیله کا، دونزَه هَزار نفر، 7 شَمعونی قبیله کا، دونزَه هَزار نفر، لاوی قبیله کا، دونزَه هَزار نفر، یِساکاری قبیله کا، دونزَه هَزار نفر، 8 زِبولونی قبیله کا، دونزَه هَزار نفر، یوسفی قبیله کا، دونزَه هَزار نفر، و بِنیامینی قبیله کا، دونزَه هَزار نفر مُهر بینَه. یالَ جماعتی هَر قومی کا 9 دومله دَیشتیمَه و دَیِس، ایلَه یالَه جماعتی که هیچکس نیمَشای اَیی بیشماری، هَر میلّتی کا و هَر طایفه کا و هَر قوم و هَر زَوونی کا، گِرد اَ تخت و وَرَه پیشی کا مَند بینَه، ایسبی یَه اَبا دَکَردَشون بَه و نخلی لاخه اون اِشتَن دسی کا دارین. 10 اَوِن بِلندَه خِلِع نَه خَندِشونَه: «نجات چَمَه خِدا شِنَه، که تختی سَری کا نِشتَه؛ و وَرَه شِنَه.» 11 و گِردِ ملائیکَه اِن، تختی دُور و پیرون و چار گِله مخلوق زِنده دُور مَند بینَه؛ و اَوِن تختی پیشی کا اِشتَن دیمی نَه بَلَکینَه زمینی سَر و خِدا پرستش بَکَردین و 12 واتِشونَه: «آمین! ستایش و جلال حکمت، شُکر و حُرمت و قوّت و قدرت چَمَه خِدا را بِبو، تا اَبَد و تا اَبَد. آمین!» 13 دومله ایلَه اَ پیرون کا مِن دَخوندِشَه و مِنَه واتِشَه: «اِمِن که ایسبی یَه اَبا دَکَردَشونه کیی اینَه و کییا کا اومَینَه؟» 14 از جَواو دومَه: «اِی آقا، اِمی تِه بَزنیش.» و اَ مِنَه واتِشَه: «اِمِن هَ کسونی اِستینَه که اَ یالَ عذابی کا دوییَردَه اینَه و اِشتَن اَبااون وَرَه خونی دیلَه کا شوشتَشونَه و ایسبی آکَردَشونَه. 15 اِمی واسی یَه که: «اِمِن خِدا تختی پیشی کا مَندینَه، و چَیی معبدی کا شَو اَندَه روز اَیی خدمت بَکَردین؛ و اَ تخت‌نشین، اِشتَن حضوری نَه اَوون سَرپَناه آدَه. 16 اَوِن دِ، وِشی نِبون، و دِ، تِشی نِبون، نِه آفتاو چَوون سَر دَتاوِه، و نِه هیچ گرمایی که بوسونِه. 17 چوم اَ وَرَه ایی که تختْی وَسطی کایَه چَوون شوونَه بَبی، و اَوون زِندگی بَخشَ آوی خانیون طرفی را راهنمایی بَکَردی. و خِدا هَر اِسِرگی چَوون چِمون کا پاک آکَرِه.» |
@ 2024 Korpu Company