یوحنا موکاشیفَه 6 - کتاب مقدس به زبان تالشی شمالیهفت گِله مُهر 1 اَ موقع وَرَه ویندِمَه که ایلَه اَ هفت گِله مُهری چاکِندِشَه، و دَرَسِمَه که ایلَه اَ چار گِله مخلوق زِنده ایلَه سَسی نَه که گِرخونَه سَسی شیوار بَه، واتِشَه: «بِری!» 2 از دَیشتیمَه و دَیِس، ایلَه ایسبی یَه اَسبی بَه! و اَ کسی که اَ اَسبی سِوار بَه، ایلَه تیرکَمونی داری، و ایلَه تاج اَیی آدوشونَه و اَ کسی که پیروزی نَه اومَه بِرون تا فَتح بِکَرِه. 3 وختی که وَرَه دوّمین مُهری چاکِندِشَه، دَرَسِمَه که دوّمین مخلوق زِنده واتِشَه: «بِری!» 4 و ایلَه دییَر اَسبی اومَه بِرون که آتشی شیوار سِر بَه. اَ کسی که اَ اَسبی سِوار بَه، اَیی اِجازَه دوعَه بَه تا صُلح و سلامتی زمینی سَری کا پِگِرِه تا مردم یَندی بِکِشن، و ایلَه یالَ شمشیری آدوعَه بَه اَیی. 5 هِنتَه که وَرَه سوّمین مُهری چاکِندِشَه، دَرَسِمَه که سوّمین مخلوق زِنده واتِشَه: «بِری!» و از دَیشتیمَه، و دَیِس، ایلَه سیاه اَسبی بَه و اَ کسی که اَ اَسبی سِوار بَه اِشتَن دَسی کا ایلَه قاپانی داری. 6 و اَ چار گِله مخلوق زِنده دیلَه کا، ایی چیی بِلندَه سَسی شیوار دَرَسِمَه که بَواتی: «ایی پیمونه گندِم، ایی دینار و سِه پیمونه ژَه، ایی دینار. ولی روعَن و شَراوی ضَرر مَژَن!» 7 وختی که وَرَه چارمین مُهری چاکِندِشه، دَرَسِمَه که چارمین مخلوق زِندَه واتِشَه: «بِری!» 8 و از دَیشتیمَه، و دَیِس، ایلَه اَسبی که چَیی رَنگ و روخ پَرِستَه بَه و اَ کسی که اَ اَسبی سِوار بَه چَیی نوم مرگ بَه و مَردَه اون دنیا، چَیی دومله کارا بومَی. و اَوون اِقتدار آدوعَه بَه تا زمینی یِک چارُمی، شمشیر و قحطی و کُشَندَه مَرَضون و زمینی وَحشی یَه حَیوون نَه، بِکِشِن. 9 وختی که وَرَه پنجمین مُهری چاکِندِشه، از قِربونگاه جیری کا، اَ کسونی جانی ویندِمَه که خِدا کلامی واسی و اَ شهادتونی که دوعَشون بَه، کِشته بَه بینَه. 10 اَوِن بِلند سَسی نَه خِلِع بَکَردین و بَواتین: «اِی خِداوندی که قادر و قدّوس و حَقّیش، تا کَینی داوری نِکَری و چَمَه خونی تقاصی زمینی مردمی کا، نِویگِری؟» 11 و هَر کمیله اَوون کا، ایسبی یَه اَبایی آدوعَه بَه و اَوون نَه واتَه بَه که تِلی وِرتَر آروم بِگِرِن تا چَوون هَمخدمتیون و بِرا اون تعداد که بَسی چَوون شیوار کِشتَه بِبون، کامل آبو. 12 و وختی که وَرَه شیشمین مُهری چاکِندِشه، از دَیشتیمَه و دَیِس، ایلَه بَرکَه زمین لرزه ای اومَه و آفتاو، کیلی شیوار سیاه آبَه و کامَلَ مانگ، خونی رنگ آبَه. 13 و آسِمونی ستاره اِن زمینی سَر ویبینَه، ایلَه اَنجیلَ داری شیوار که ایلَه تِندَه وایی نَه تَکان بَردی و چَیی کالَ میوَه اِن ویبون. 14 آسِمون ایلَه لول بییَه طوماری شیوار غِیب آبَه، هَر کو و جزیره‌ای اِشتَن جِگا کا پِگِته بَه. 15 دومله زمینی پاُتشااِن و یالَ آدَمِن، فرماندارِن و پولدارِن و قدرتمندِن، و هَر نوکَر و هَر آزادی، غارون دیلَه کا و کو و کَمَر و صخره اون دیلَه کا اِشتَن نِین آکَردِشونه. 16 اَوِن کو اون و صخره اون نَه بَواتین: «چَمَه سَر بَلَکَه و اَمَه اَ تخت‌نشینی چِمی کا و اَ وَرَه غَضبی کا نِین آکَرَه. 17 چوم که چَوون اَ یالَ غَضبی روز آرَستَه و کییَه که بِشا تاو بواَرِه؟» |
@ 2024 Korpu Company