یوحنا موکاشیفَه 5 - کتاب مقدس به زبان تالشی شمالیطومار و وَرَه 1 اَ موقع تخت نشینی راستَه دَسی کا ایلَه طوماری ویندِمَه که چَیی پِشت و رو، نیوشتَه بَه، و هفت گِله مُهری نَه مُهر و موم بییَه بَه. 2 و ایلَه قوّی یَه ملائیکه ای ویندِمَه که بِلندَه سَسی نَه اِعلام بَکَردی: «کییَه که لایق بِبو طوماری آکَرِه و چَیی مُهرون بِچاکِنِه؟» 3 و هیچکس، آسمونی کا یا زمینی سَری کا، یا زمینی جیری کا، شاستَش نییَه که طوماری آکَرِه یا چَیی دیلَه دَیِسِه. 4 و از دَمَندیمَه های های داد کَردِمَه چوم هیچکسی نِویندِمَه که لایق بِبو اَ طوماری آکَرِه یا چَیی دیلَه دَیِسه. 5 دومله ایلَه اَ پیرون کا مِنَه واتِشَه: «داد مَکَه. دَیِس، اَ شیر که یهودا قبیله کایَه، و داوودی رَگ و ریشه شِن، پیروز آبَه، تا طومار و چَیی هفت گِله مُهری آکَرِه.» 6 و تختی وسطی کا اَ چار گِله مخلوق زِنده و پیرون دیلَه کا ایلَه وَرَه ویندِمَه مَندَه بَه که ایلَه قِربونی شیوار بَه، هفت گِله شاخ و هفت گِله چِم داری، که خِدا هفت گِله روحی نَه که گِردِ زمینی سَری را ویسا آبَینه. 7 اَ وَرَه شَه و طوماری تخت نشینی راستَه دَسی کا ویگِتِشه. 8 هِنتَه که طوماری ویگِتِشه، اَ چار گِله مخلوق زِنده و اَ بیست و چار گِله پیر، وَرَه ناری کا بَلَکینَه. اَوِن هَر کَملیه، ایلَه ساز چَنگ دَسی کا دارین و طِلا جامونی دارین، بخوری کا پُور بَه که هَ مُقدسون دعا اِن اینَه. 9 و اَوِن تازَه سرودی خَندِشونَه که بَواتی: «تِه لایقیش که اَ طوماری ویگِری و چَیی مُهرون بِچاکِنی، چوم که تِه قربونی بیشَه، و اِشتِه خونی نَه مردمی، هَر طایفه و زَوون و مردم و میلّتی کا، خِدا را خِریرَه؛ 10 و اَوون چَمَه خِدا را، پاُتشایی و کاهِنون کَردِرَه، و اَوِن زمینی سَری کا سلطنت بَکَردین.» 11 دومله دَیشتیمَه و وِرَه ملائیکه اون سَسی دَرَسِمَه، که اَ تخت و زِنده مخلوقون و اَ پیرون دُور آکَردَشون بَه. چَوون تعداد دَسته دَسته هَزارون هَزار بینَه. 12 بِلندَه سَسی نَه بَواتین: «اَ وَرَه که قِربونی بَه لایقَه که قدرت و ثروت و حکمت و قوّت، و حرمت و جلال و برکت چَیی تقدیم بِبو.» 13 دومله دَرَسِمَه که هَر مخلوقی که آسمونی کا و زمینی سَری کا و زمینی جیری کا و دریا کا، و هَر چیی که چَوون دیلَه کایَه، بَواتین که: « اَ تخت نِشینی را و وَرَه را، ستایش و حرمت، و جلال و قوّت با، تا اَبَد و تا اَبَد.» 14 و اَ چار گِله مخلوق زِنده واتِشونَه: «آمین»، و اَ پیرِن دیمی سَر زمین بَلَکینَه و اَیی پرستش کَردِشونَه. |
@ 2024 Korpu Company