یوحنا موکاشیفَه 4 - کتاب مقدس به زبان تالشی شمالی

تخت، آسِمونی کا

¹ چَیی پَش دَیِشتیمَه و ایلَه آواجَه بَری آسِمونی کا ویندِمَه، و اَ اوّلین سَسی که دَرَسَم بَه که ایلَه شیپوری سَسی شیوار مِنَه گَف ژَندَش بَه، هَنی واتِشَه: «بِری اییا کَفا، و از اَ چیی که چِمی پَش بَسی اِتفاق دَلَکِه، بَه تِه نیشون بَدایم.»

² هَ لحظه خِدا روح مِن پُور آکَردِشَه و ایلَه تختی آسِمونی کا ویندِمَه که ایی نفر اَ تختی سَری کا نِشتَه بَه.

³ و اَ کسی که نِشتَه بَه چَیی سَر و شکل، یَشم و عقیقی شیوار بَه و اَ تختی دُور تا دُوری کا ایلَه رنگین‌کمانی بَه که زُمّردی شیوار بَه.

⁴ اَ تختی دُور تا دُوری کا، بیست و چار گِلَه تخت نوعَه بَه و اَ تختون سَری کا بیست و چار گِله پیر نِشتَه بینَه که ایسبی یَه خَلا دَکَردَشون بَه و طِلا تاج سَری کا دارین.

⁵ تختی کا، برق و بِلندَه خِلِع و گِرخونَه بومَی و هفت گِله وَش گِتَه مشعل تختی ناری کا نوعَه بَه، که خِدا هفت گِله روحی نَه.

⁶ و تختی ناری کا، ایی چیی بَه که شیشه ایی دریا مونی، بُلوری شیوار. تختی دُور تا دُور و چار گوشه، چار گِله مخلوق زِنده مَند بَه، که چَوون بَدَن هَر طرفی نَه پِشت و نار، چِمی کا پُور بَه.

⁷ اوّلین مخلوق زِنده، ایلَه شیری شیوار بَه و دوّمین مخلوق زِنده گا شیوار. سوّمین مخلوق زِنده، اِنسانی سَر و شِکلی داری و چارمین مخلوق زِنده، ایلَه عقابی شیوار بَه که پرواز بَکَردی.

⁸ و اَ چار گِله مخلوق زِنده، هَر کَمیله، شیش گِله بال هِستِشونَه و چوون دیلَه کا و دُور تا دُور، چِمی کا پُورَه، و شَو اَندَه روز یِکسَره بَواتین: «قدّوس، قدّوس، قدّوسَه خِداوندْ خِدای قادر مطلق، اَ که بَه و اِستَه و بومَی.»

⁹ هَر وَخت که اَ زِندَه مخلوقِن، اَ تخت نِشینی را، اَیی که تا اَبَد و تا اَبَد زِندَه یَه، جلال و حُرمت و شُکری تقدیم بَکَردین،

¹⁰ اَ بیست و چار گِله پیر اَ تخت‌نشینی ناری کا بلَکِن و اَئی که تا اَبَد و تا اَبَد زِندَه یَه پرستش بَکَردین و اِشتَن تاجی چَیی تختی ناری کا فِرآدَن و بَواتین:

¹¹ «اِی چَمَه خِداوندْ و اِی چَمَه خِدا، تِه قابِلیش که جلال و حُرمت و قدرت بَه تِن تقدیم بِبو، چوم که گِردِ چیون تِه خَلق کَردَرَه، و گِردِ چییِن اِشتِه پیستَه نَه بِه وجود اومَه و خَلق بَه.»